順豐速遞員垃圾桶旁吃飯遭投訴 林盛斌護航！初入行曾遭無禮對待 教女勿講人壞話

順豐速遞員於街邊吃飯遭投訴 林盛斌護航

現時疫情嚴峻，由2月26至3月5日政府收錄到18.4宗快測報告，每日都有逾2至3萬多人確診。順豐速遞公司都有不少人中招，導致人手不足，很多身體健康的速遞員要運送大量貨物，一個做幾個人的工作量，身心負擔極重。近日一名速遞員於送貨期間在大廈地下一角，垃圾桶旁邊抽空吃飯，竟被網民指很影響環境衛生，向公司投訴。

林盛斌有留意到事件，他很尊重每一位速遞員，他指投訴者的擔心並非無道理，但他覺得投訴者很無良心，呼籲大家應該包容其他人。他指該位送貨員其實都是逼不得已，為免影響到其他人，已經盡量找個角落，想快快吃完飯繼續送貨。最後他表示如果該速遞員被炒，佢會馬上為對方提供一份工作。

呢個世界，好多嘢，無百分百嘅啱定錯，
但係有一樣嘢，係最基本嘅，就係包容。

呢段日子，對速遞行業嘅影響非常之大，
因為人手不足好多時一個人要做三個人嘅嘢，
一日幾萬單確診嘅時候，佢哋仍然辛苦工作，
其實我真係好尊重每一位做速遞嘅工作人員。

你估如果佢有得舒舒服服坐喺餐廳入面食嘢，
佢會唔會選擇坐喺個垃圾桶旁邊食呢個飯盒？
人哋已經匿喺一個盡量唔影響其他人嘅地方，
諗住嗱嗱聲扒埋嗰兩啖飯就繼續送貨送件，
然後你影咗佢張相放上網諗住公審再去投訴，
其實唔可以話你唔啱，你係有你嘅道理嘅，
只不過成件事，好無同理心，好唔善良。

如果之後其士同埋進源投訴到去順豐，
而呢位速遞員嘅上司又覺得個投訴係成立嘅，
最後要紀律處分甚或至要炒佢魷魚，
麻煩認識呢位速遞哥哥嘅朋友叫佢聯絡我，
我即刻安排一份工畀佢。

網民一面倒支持 順豐＋速遞員回應事件

不少網民都很贊同林盛斌，有本來不喜歡他的網民表示對他另眼相看：「原來佢咁有正義感」、「呢次我就撐你」、「做阿bob介紹嘅工可以仲好搵」、「抵佢住九龍塘獨立屋」、「呢啲時勢仲敢發聲 bob都好值得尊重」。另外一眾藝人好友都紛紛留言，支持林盛斌的言論，如孫慧雪：「講得啱，佢已經匿埋食飯，仲想佢點！」、吳若希：「啱呀～～～人係要食飯嘅！呢啲咁嘅環境，大家互相包容吓啦！」、袁偉豪：「冇錯！一張相好難去定誰對誰錯，但有時候如果大家可以將心比己，停一停諗一諗，呢個世界就會少咗好呢一啲事情發生，會和諧很多」、陳敏之：「完全同意」

順豐回應指：已慰問該員工，不會作任何處分，並指於疫情下盼望社會更需體諒和理解。而速遞員透過其他網民留言，表示已向公司了解，獲通知不會被扣人工。

林盛斌經歷過被看不起的日子

做售貨員曾被白眼

早前林盛斌抽空支持慈善團體活動，希望透過分享為學生注入正能量，幫助他們減壓，讓他們擁有健康的校園生活。他特別分享了自己初入行做電台DJ時遇到的挫折，他提到自己不是一開始就可以成為DJ，他也是由一名Sale做起。他曾經被看不起，更加被人稱為「阿豬阿狗」。他坦言當時雖然心情低落，但未有因此放棄。

初入行遭陳姓歌手無禮對待 屈辱永記於心

其後林盛斌再分享被一個歌手無禮對待的經歷，他亦曾於TVB清談節目《各位觀眾4條傾》中重提此事。以前做電台時，他被指派到會展大型音樂會演出找一些歌手錄關於節日的祝賀說話，場面盛大。人人都很願意錄音，直到要找陳姓歌手錄音時，他已有不祥預感：「我都知道瀨瀨哋嘢，我同佢唔識，同唱片公司講：『唔好意思啊，我想搵佢錄啲嘢，得唔得？』佢睇一睇：『佢唔講嘢㗎喎…唔緊要啦，你咁勇啊？你試吓囉，佢唔錄唔關我事㗎。』」
林盛斌拿著寫上對白的紙和錄音筆找陳姓歌手錄音：「唔好意思啊！我叫…可唔可以幫我錄呢個Jingle啊？」怎料那位歌手先深呼吸，接過那張紙說：「咩嚟㗎？」看完那些對白後，他皺一皺眉，想爆粗：「What？What the f…」然後他望一望林盛斌，竟把紙拋在地上，調頭離開。唱片公司工作人員先到即表示不好意思，拍拍林盛斌的手以作安慰，隨即快步追上那位歌手。

他默默撿起地上的紙，直言這是一個不愉快的經歷：「有一位歌手，我一定記得！嘩呢吓真係好傷…使唔使咁大支嘢啊？都唔好要我受呢啲嘢吖！當時我係Nobody，都唔係…嗰陣已經開始有自己節目《新香蕉俱樂部》，啱啱做無耐。嗰吓對我嚟講好大打擊，我心諗你有報應嘅！」即被陸永、C君笑道：「你個人咁負面嘅，記埋啲屈辱！」他笑言：「咁馬雲都係記呢啲嘢：『黃曉明同邊個影相唔應我，我要有日你搵番我影相！』」當時他覺得不開心，但他並沒有氣餒，振作起來繼續工作。

大家應該十分好奇這位歌手是誰，但他只說︰「佢好靚仔，亦愛hip hop打扮。」他指該歌手過要退出娛樂圈，不過現時仍活躍於圈內。

教導女兒不要講人壞話

事後，林盛斌坦言不擔心分享會引起網上熱烈討論，他坦言分享經歷的目的是要啟發學生，無論遇到甚麼挫折都要保持正面思想法，不要因為一時的逆境、挫折而放棄，要勇氣去克服難關：「每個人都有勇氣，就用勇氣去克服困難，大家都要加油。」雖然女兒年紀尙小，未必會遇到很大壓力或挫折，但他亦有教導女兒要遠離是非，他說︰「大女同我講，朋友A會喺佢面對講朋友B壞話，而朋友B亦會咁做，所以我叫佢同呢啲朋友講：『唔好喺背後講人哋嘅不是。』」