E-Max Outlet 掃 童裝 最平15蚊有交易
廣告
開咗幾個月嘅 E-Max Outlet ，由最初得幾間舖，終於到有十幾間舖進駐，睇落多嘢行咗，Sunday Kiss血拼媽寶為咗要證實吓有幾多嘢啱大家買，就搵個星期日最旺場嘅日子，孖住兩隻怪獸去直擊，影底筍貨 童裝 俾大家參考。
Gap童裝25折
童裝和BB衫原價25折，但衫款唔算多，目測只有50款以內，尺碼亦唔算齊，但係就勝在平到$14.9就買到頂BB帽，三四十蚊件夏天衫，六七十蚊就買到條裙或背囊。厚身衫唔多，依家去可能又番多咗冬裝。小朋友大得快，部分衫可以買大兩個size，留返下年著。
以下童裝全部$50內買到︰
巴西膠鞋折上折
巴西膠鞋一直都有買開，但主要都係睇款同有無promotion先落手，啱心水就買俾自己著，不過細路女同BB款實在太得意，某些設計跟大人款又好似，搞到我都忍唔住買埋俾阿囡，Outlet款都好多，有主線、副線嘅鞋款，最少都有7折，百幾蚊對起，買兩對有額外9折，三對仲有額外75折，其實當買親子裝真係唔錯，好鬼抵！
Palladium多款抵買
呢個牌子比較型格，又出名好著，平時買對童裝款都至少要三百幾蚊，呢度BB、小童、中童款都有，仲有好多顏色和圖案揀。冬天就梗係買綁帶軍靴俾阿囝，其實阿囡著埋都幾型，部分款更低過半價。現場仲有大量大人款，不過呎吋就唔知齊唔齊，想買親子裝就要花多少少時間揀。
