ETV開播半世紀終告停拍細數9位曾拍攝教育電視童星｜重溫8部ETV經典作品

Apr 22 2020

伴隨不少年青人成長的ETV(教育電視）於4月17日正式宣布停拍。香港電台為教育局製作嘅ETV及視像資源由於營運成本過高，而且近年其收視率每況愈下，有不少人都曾批評指內容早已過時，更指不應再拍ETV以免浪費公共資源。然而，ETV可說是很多人的童年回憶，不論是上堂或放學時間都一定會追看，現在就與大家細數8部ETV經典作品，以及9位曾參與ETV拍攝的藝人啦！

撰文：Kammy｜編輯：YCL｜圖片來源：我們都是看ETV長大的@Facebook，Youtube截圖

95%受訪教師同意保留ETV

教育電視ETV於1971年首播，至今已有48年歷史。去年審計署發表報告，表示ETV成本過高，但其總體收看率就偏低。近日，教協就發表報告，以問卷訪問咗656名小學教師，有94.6%指上堂有使用ETV輔助教學，有88.4%受訪教師就指會喺課堂外，如課後輔導、家課自習等使用ETV。有近95%教師同意保留ETV。但係有教師指出課時不足，教育電視選擇唔多，節目內容又未必切合課程同教學需要，亦都有更佳嘅視像教材可以幫助。

教育電視ETV於1971年首播，至今已有48年歷史。

盤點8部ETV經典作品

1. 細菌週年大會

相信唔少人都會記得《病菌大王》，入面嘅角色更係深入民心！《病菌大王》喺1992年製作，共分為《病魔的毒計》同《擊退病魔》兩集，以「細菌週年大會」為主題，一眾細菌包括霍亂菌家族、黑死病大王、結核菌等，成班細菌病毒聚首一堂，喺度講解自己點感染人類，透過得意嘅角色為學生講解衛生常識。

2. 分數王國

以前細個學分數，書本上一定係用切蛋糕同塗圓形嘅方法，而ETV嘅《愛麗絲夢遊分數王國》就打破傳統，以童話嚟包裝數學概念，並以分數嚟區分王國內嘅居民，真係吸引過書本好多！

3. 游水學東南西北

呢一集真係好好笑，因為兩個主角遊遊下渡海泳，無啦啦攞指南針同地圖出嚟話要睇方向，其實搞咁多嘢都只係為咗教大家東南西北！相信依家好多都市人都冇咩人識用指南針喇，快啲睇返呢集重溫下啦！

4. 麥包飾啞老師教部首

啞老師係邊個？冇理由會唔知呀？！由麥包飾演嘅啞老師，配合經典故事《后羿射日》，教一眾小英雄學識查字典：「部首檢字法」、「難檢字部」同「變形部首」，查出寫喺太陽上嘅字，然後獲得神箭再將太陽落嚟，呢一集簡直係中文科ETV嘅經典！

5. 「下雨天留客天」學標點

「下雨天，留客天。留我不？留！」定「下雨天留客。天留，我不留！」呢兩句話靈活咁運用標點符號，只要擺放唔用位就有唔同意思喇！

6. 街邊魚蛋檔

香港80年代經常都會有街邊車仔檔，佢哋所賣嘅魚蛋、碗仔翅真係諗起都流曬口水，但街邊檔嘅衛生問題嚴重，教育局就製作咗相關嘅ETV，教小朋友進食前要手，仲呼籲各位唔好光顧街邊檔，如果唔係就有機會要住醫院醫病喇！

7. 貨幣村的故事

要學用貨幣，大家就可以睇下《貨幣村的故事》，入面有每紙幣村同硬幣村，每個角色都有唔同嘅幣值，而佢哋嘅幣值就等同佢哋各自嘅力量，節目中仲會透過每個人嘅合作去教大家加法。

8. 傻校長教食橙皮

最經典嘅ETV就一定要數《大勇的故事》，呢一集之所以咁出名，係因為好多人細個都有跟片中嘅傻校長食橙皮！故事中，校長帶一班學生去行山，但由於冇帶到足夠嘅水，校長就教大家橙皮有止渴作用，然後成班就坐埋一齊食橙皮。唔少網民都曾表示「到依家，我每次食橙，都只食橙皮」、「我細個睇完真係去食橙皮食完最後都係要飲水」、「好彩傻校長唔係帶榴槤」