T恤大急救！再見「荷葉邊」3步回復平整踢走變形
廣告
T恤變形大急救！大家夏天經常著T恤，但時常著到衫領變鬆，變成了荷葉邊！原來有方法可以還原！日本專家教你拯救T恤！
撰文：SY｜資料來源：《ZIP!》｜原文刊於：新假期
還完變形T恤3招踢走荷葉邊
相信好多人都知，如果T恤洗多幾次，衫領會慢慢變形，漸漸變得唔美觀。日本電視節目《ZIP!》指，T恤喺曬衫過程中，會因為水份積聚，令到衫領部份變形。所以節目邀請當地洗衣服務公司最高技術負責人神崎健輔先生，神崎健輔先生有「洗衣博士」之稱，佢話有一個小技巧可以對付「荷葉邊」，3個簡單步驟就令T恤變返正常。
3步拯救「荷葉邊」T恤
1. 摺完浸冰水
首先將鬆咗嘅T恤衫領反覆摺成波浪形狀，再將佢浸入冰水一分鐘。然後用以按壓方式將衫領水份盡量擠出。記得！記得唔好「扭乾」，如果唔係衫領又會再變形。
2. 用手指將衫領推平
之後將T恤放喺枱面攤平，由下而上用手指將衫領推平，重複做幾次。
3. 熨少少再風乾
最後，用熨斗由下而上將衫領熨平，唔需要熨乾，最好維持少少濕度。再將T恤平放自然風乾，但記得唔好掛起！
有唔少網民都試咗呢個方法，T恤雖然冇變成新嘅一樣 ，但都令衫領唔再變形。好多網民仲話，晾衫時，可以用兩個衫架將T恤水平晾起，咁樣水份嘅重量就唔會搞到衫領位變形。
