香港快運|無賴家長霸付費座位 苦主鬧爆UO:講大話!追究到底
香港快運|港人搭UO遇無賴家長 付費座位慘被霸佔
本月15日,有網民在Facebook專頁「HK Express 香港快運及旅行資訊關注組」發佈帖文,表示乘搭UO690航班時,目擊一位乘客的付費座位被霸佔:「有怪獸家長挾小朋友之名搶其他乘客付費位置,要求一齊坐,但UO又entertain班怪獸喎。搞到被搶位乘客㷫到爆!」
香港快運|結局睇到網民勁嬲
隨後的發展更令網民震驚:「位置已經被搶,有位客服哥哥入機倉,叫被搶位乘客返香港後申請退款」
香港快運|疑受害者現身回應:唔係好細,已經係中學生
帖文出街後,疑引來受害者現身留下評論,當中寫道:「我哋係受害者,最後冇堅持係因為唔想耽誤其他乘客嘅時間,驚延遲班機,同埋嗰兩個已經唔係好細嘅小朋友,已經係中學生」
又透露涉事的家長態度非常差,向他們直言:「個位媽媽同佢老公講『唔好諗住郁佢哋,佢哋一定唔會讓』」
![uo 香港快運 疑受害者現身回應,兼貼出當時的情況的照片。(圖片來源:Facebook@HK Express 香港快運及旅行資訊關注組)](https://imgs.gotrip.hk/wp-content/uploads/2024/07/450718675_10229933725943081_7669786526763377967_n-1_6912944386694ed381db0a.jpg)
香港快運|網民鬧爆:以後大家唔洗買位啦,鐘意坐邊就坐邊!
上述的情況令不少網民為被搶位置的乘客戥唔抵,紛紛留言表示:「一個二個話個乘客廢,如果佢堅持唔讓搞到班機delay幾個鐘,同機既人會撐佢定X佢呢?大家香港人應該知道答案。」、「中學生使乜痴住屋企人坐啊,你好好人,識為其他人着想。可惜呢個世界就係自私先有着數,有同理心嘅蝕底」、「俾我一定玩無賴!死都唔肯坐返低!話自己買咗嘅位依家俾人霸咗冇位坐!玩攬炒!成架機飛唔到,睇吓邊個蝕」、「以後大家唔洗買位啦,鐘意坐邊就坐邊,慳返d買位費,正!」
香港快運|UO回應
香港快運回覆傳媒查詢指,該一行四人的家庭預訂的座位,由於機型轉換的關係,變成緊急出口旁的座位。根據規定,未成年乘客不能坐在緊急出口,而該家庭的其中兩位成員屬未成年人士,因此需要調位。安排亦得到另一排乘客的同意後(包括兩位已付費自選座位的乘客),迅速安排調位,當時已向協助對調的乘客解釋,並承諾退回自選座位費用,集團十分感謝當日所有乘客的理解和配合。
香港快運|疑似苦主現身怒轟:「UO講大話」
不過相關的報導出街後,疑似事主本人再度回應,直指「UO講大話」,她表示「由頭到尾我哋冇人協商過,check-in嗰陣時係一樣嘅座位號碼,去到Boarding嗰陣時被通知攔截轉位」又指「由頭到尾都沒有和一家四口說過任何一句說話,一直只找UO的地勤協商」
隨後有質疑既然未成年人不能坐在緊急出口座位排,為何不能與他們的父母調換,反而硬性讓他們調位,為此會追究到底。
![uo 香港快運 苦主現身怒轟(圖片來源:Facebook@HK Express 香港快運及旅行資訊關注組)](https://imgs.gotrip.hk/wp-content/uploads/2024/07/451594879_3742504329349396_3559888477042381917_n-1_234403944669761eb92db2.jpg)
香港快運|網民反應
事件的發展令不少網民議論紛紛:「其實最好UO搵曬苦主,家庭嗰四個人,三個party,全部人出嚟對質,咁自然水落石出!」、「下次搭飛機,大家要鬥早排隊登機揾位坐」、「我諗本身只係諗住郁兩個細嘅,但係老母話本身都買左位成家一齊坐,要調就一齊調,先會郁埋兩個當事人。」、「比咗錢就要一齊坐呢個邏輯係咪onX㗎,搭公共交通工具實有連位比你㗎?更何況而家講緊係劃位,呢4條onX咁X有道理就死去坐其他航空公司買經濟去霸頭等」、「其實講咗咁耐苦主已經出咗嚟,但係嗰個X街怪獸家長仲未走出嚟講兩句」