「味之天使」 張韋怡 誤請地獄 陪月王

2014年，GoGo 與拍拖一年的男友意外懷孕，患有多囊卵巢症的她一直未有察覺，直至懷孕五個月，穿起泳衣時發覺自己肚凸凸，檢查下才驚悉，心急如焚找床位、找陪月，但她太遲已找不到 陪月 ，輾轉去到BB展一個攤位，聲稱提供「金牌 陪月 王」，GoGo 以每月38,000元聘用該「 陪月王 」，24小時住在GoGo家中貼身照顧，豈料是噩夢的開始……
撰文：Ling
攝影：Simpson Chiu（部分相片由受訪者提供）
鳴謝：玩具反斗城提供泡泡機

五個月才發現有孕臨急找陪月
這位烏龍孕婦懷孕頭五個月時，完全沒孕吐、沒水腫、口味都沒大改變，食量正常，加上多囊卵巢症令她經期不準，最長試過半年沒有經期，所以一直沒有察覺懷孕。「到五個月發現條腰粗咗，個胸大咗，但照去生日船P，嗰晚睇番啲相就自責，點解條腰粗咗咁多？摸個肚發現硬咗有啲嘢鼓起，以為自己有婦科病，驗完出嚟醫生恭喜我有咗，即刻瞓低再照超聲波，已經成個脊骨、頭顱、人形出咗嚟，只係未睇到男定女，已經有咗19周。」
得悉有孕一刻，GoGo又喜又驚，喜是她與男友有計劃將來生小朋友，驚是過去五個月所做的事，有機會危害BB。「我不嬲有揼骨習慣，仲要踩背，我唔食煙但有飲酒，試過兩次飲到斷片，玩wakeboard、香蕉船、水上樂園滑梯，去埋深圳玩賽車，我差唔多乜都玩齊晒。」

GoGo想起做過以上種種，帶着惶恐的心情去做產檢，好多項目都已經遲check，幸好胎兒無事，飽食驚風散，隨即告之當時正拍攝的《愛．回家》劇組，改劇情指其角色大肚，隨後讓她休息好好養胎。懷孕時GoGo正踏入30歲，感覺人生的新階段開始，戒酒戒蒲，學做一個好媽媽。

打第一份工 自稱金牌陪月
一切懷孕準備工夫急急上馬，搵完床位仲要搵陪月，但熟人介紹的陪月均無期，GoGo去BB展找到一間陪月中介公司，支付最貴價錢38,000元便可聘請「金牌陪月王」，24小時居住媽媽家中貼身照顧，並強調好安全，一簽三個半月。豈料所謂的「金牌陪月王」，原來沒有陪月經驗，GoGo竟是她的第一個客人，她育有兩個長大了的孩子，所謂的陪月知識已經十多廿年前。
首先BB剛出世回家，陪月已用米水開奶，幾日大的BB內臟未發育健全，飲米水會加重腸胃負擔，未能消化。「BB塊面出晒暗粒，全身出晒毒素紅點，醫生都搵唔出原因，淨係開類固醇俾佢，咁細個就要搽類固醇，後來我哋先知原來關米水開奶事，因為到BB六個月大時，醫生話可以食固體，我問點解之前唔食得？佢話因為依家可以分解澱粉質，我即刻話佢好細個就被餵飲米水。」當時GoGo不知道太早飲米水的禍害，因陪月話自己兩個小朋友都是飲米水大，養到好大隻，「可能係嘅，但唔係咁細個開始飲囉，起碼大約兩三個月先俾BB飲。佢以老一輩嘅方式就當專業經驗，究竟陪月牌有冇監管？」

媽媽餵人奶 勁煮「退奶」菜
坐月膳食方面，陪月亂煮一通，沒有煲補品不特止，更煮「退奶」菜式給餵人奶的GoGo！「佢煮韭菜炒蛋、豆豉蒸魚俾我，我事後先知呢啲係斷奶嘅。」GoGo略讀過一些懷孕及坐月知識，雖偶有懷疑陪月煮的餸菜，但相信她經驗豐富，沒理由害自己，照食無誤。
不過陪月一煲到花膠，GoGo就拒飲，她早已明言自己開刀產子，餵人奶，而花膠會影響傷口復元及塞乳腺，即使親友送贈亦暫放一旁，怎料陪月一見花膠海參就盡煲，自己食嫌唔夠，叫埋個女上門齊齊食，非常大貪！「佢日日同我工人喺屋企開大餐，完全冇問過我，所有嘢都夾硬嚟，到佢走嗰陣，佢將人哋送俾我嗰啲花膠海參全部清走晒，嗰度好大量㗎！」

陪月平日買餸錢都疑有「打斧頭」，GoGo是大家庭，家中有十多人，陪月就開價500元一餐，但只煮幾味餸，湯水欠奉。「就係佢聲稱嘅嘉美雞一隻、蒸紅棗杞子黑木耳、韭菜炒蛋、豆豉蒸魚，冇湯水，但佢會拎我啲花膠煲雞湯俾自己飲。」

食藥後沉睡 BB狂喊唔理
GoGo為了息事寧人，打算忍夠三個半月就送走她，飲食上自己小心就算，但第二個月發生的一件恐怖事情，令GoGo想立即炒魷！「陪月同BB一間房，有日BB喺房喊得好犀利，陪月鎖咗門，我敲極門都唔開，BB又喊個不停，我哋因為尊重私隱無即時搵鎖匙開，希望陪月自己開門，但踢晒門佢都冇反應，我好驚，一攞鎖匙開門我即刻抱住BB嚇到喊。我以為個陪月死咗，老公話佢仲有呼吸，扯晒鼻鼾。」
第二日GoGo老公搖醒陪月，兩夫婦質問為何睡到不省人事？BB喊到聲嘶力竭都聽不到？「佢話自己食咗感冒藥，呢件事同佢嘅專業已經背道而馳，你負責照顧我BB，佢喊到咁點可以瞓到咁？你要食藥都應該話我哋聽。好彩BB仲未識翻身，如果佢翻身、焗親，件事可以好嚴重。」

GoGo嬲到臨界點，提出與陪月解約，陪月求饒指自己家境差，並自爆這是她的第一份陪月工！「點樣釐定佢係『金牌陪月王』，仲要收我每月38,000元呢？我即刻搵番中介公司投訴，但合約已簽中介公司玩賴皮，我騎虎難下唔想再同佢嘈，陪月又喊苦喊忽話經濟有問題，好需要份工幫手，最後俾佢做到三個月，我真係頂唔順請佢走。」GoGo建議新手媽媽一定要多閱讀懷孕及坐月知識，俾人呃都即刻知，請陪月更一定要找熟人介紹，勿亂信中介公司，如果找不到陪月，寧願請工人姐姐幫手。

地獄陪月王七宗罪
1. 第一次做陪月就自稱「金牌陪月王」。
2. 米水開奶餵初生BB。
3. 與BB同房，食藥瞓到死豬，BB狂喊聽不到，事前亦沒有告之要食藥。
4. 媽媽餵人奶，屢次煮韭菜、豆豉等退奶餸。
5. 擅取花膠海味自己食，甚至叫個女上門一齊食，完約離開時花膠海味已全吃掉。
6. 買餸「打斧頭」，部分買餸錢私自落格。
7. 擅自離家購物，交低BB俾工人湊，而工人出外倒垃圾亦忘記帶鎖匙，獨留BB在家。

做媽媽後放膽做戲
女人最緊要嫁得好，上天亦很公平，GoGo的星途暗淡，但得到一個幸福家庭，兩年前下嫁富商老公潘先生，與老公的家族十多人齊齊住大屋，GoGo大可以安心做少奶奶，她坦言生活沒有壓力，但她對演戲仍有濃厚興趣，希望有機會演出一個代表作。「未有小朋友之前，我都有種事業壓迫感，一返到公司就有呢種壓力，為咗份工會有好多顧慮；但我依家豁咗出去，唔使顧慮將來、諗人哋點睇我，我可以真係為興趣演戲，對每個角色都好認真，演出上我有咩諗法會夠膽同導演講，以前我唔會，你叫我點就點。」

讀時裝設計的GoGo，曾參加2007年港姐競選（同屆冠軍張嘉兒），其後讀訓練班出身，多年來的角色都是行行企企，GoGo愈做愈頹，一度萌生放棄念頭。「想點呀？我話晒都有讀書，又有時裝設計師牌，真係覺得好頹，一路推job，個角色冇嘢講我就話唔舒服推咗。直到2012年戚其義搵我做一個角色，喺《4 in Love》同金剛發生一夜情，有床戲、有早餐場面講對白，佢俾個headphone我一路教我做，我睇番playback自己有大頭、有表情變化，令我鍾意番做戲。之後嘅角色開始好啲喇，《宮心計》、《公主嫁到》、《愛‧回家》有啲發揮，其他我都算數喇。拍《愛‧回家》嘅過程我由失戀到認識依家老公。」

放產假湊仔一年半後，直到《幕後玩家》復出做劉佩玥的好友，幾場對白都認真對待，珍惜有戲做的機會。「每個人抖一輪再番嚟做，都會發現自己有進步。人大咗，又做咗媽媽，對好多事情嘅領會都唔同咗。」
GoGo坦言，娛樂圈是她唯一的事業，讀書開始做model，畢業後做過一陣時裝設計就入TVB，中間曾有人提議她轉去兒童組，她也明言：「我淨係想做戲，由低做起都冇所謂。」她覺得人生要過得有意義，能做自己喜歡的事已感到滿足，湊仔以外做做戲，心靈上也得到平衡，更希望做個好榜樣給囝囝，現實中無論做甚麼角色，都要認真對待。