「女拔媽媽」潘芳芳 港同小學面試要訣

資深演員潘芳芳2005年與電台DJ陳冠豪結婚，當時43歲的她，礙於年紀問題沒計劃生小孩，翌年竟幸運一索得男，改名陳健御Queston。兩夫婦高齡中寶，卻未有當囝囝是金籮，一直訓練囝囝獨立、自學。神級名校拔萃女書院畢業的芳芳，教仔充滿智慧，深明萬卷書海有利孩子成長，自大肚起便拿起故事書胎教，未出世已培養囝囝閱讀習慣，之後一家三口每日說說故事，增進溝通，囝囝也從中練得一口流利英語及說話技巧。
多講故事都有利考入好學校，Queston現就讀誕生兩名DSE狀元的港大同學會書院，其龍校港大同學會小學四年級，面試時需帶同中英文書作介紹，有助考入該校。Queston現時是校內活躍分子，又演話劇、唱choir，充滿藝術細胞！

女拔同學每月gathering

舉止優雅、談吐得體的潘芳芳，小學至中學皆讀女拔萃，畢業後曾到夏威夷留學，因熱愛演藝工作，之後加入無綫藝員訓練班，1987年畢業，現主要擔任主持及配音工作，偶有演出劇集。電視以外，她更致力投身兒童語文教育及戲劇教育，2012年完成愛爾蘭Trinity College教育碩士學位，主修戲劇教育。
女拔學生除了學術成就，更難得是培養出強烈的歸屬感，芳芳與一班同學離校30多年，感情依舊，「可能以前係傳統學校，學生由小學讀到中學好close，所以對學校歸屬感好強，學校150周年大家都有返去。我哋同學仲有個group chat，每個幾月就約食飯，嚟緊11月都會搞同級大型re-u，移咗民嘅大部分都會飛返嚟gathering，一齊去玩呀、行山呢啲健康活動，我哋年紀唔細㗎喇，要好好珍惜呢份友誼。」

港同小學三次面試

媽媽讀女校，爸爸在外國長大，囝囝Queston不能受惠世襲，要重新找間好學校。芳芳沒有選擇傳統名校，改讀2002年創校的新派直資港大同學會小學（下稱港同），因為芳芳有朋友的女兒在該校讀得好開心，正正是她選校的最重要指標。
港同面試分三階段面試，準備面試前芳芳沒做太多資料搜集，只作初步理解，「我對Queston都好有信心，佢仲成日問我有冇得去interview，哈哈。」芳芳透露，第一次面試是小朋友group in，第二次就帶一中一英圖書，第三次就家長與小朋友一齊in，「家長面試嗰陣，校長都係同我打招呼，問我少少關於囝囝嘅嘢，之後當住我面問佢嘢，睇吓佢同我之間嘅對答。呢間學校比其他學校早面試，都好㗎，12月就知道收唔收，唔收就早啲準備大抽獎。」

新狀元學校少功課

一條龍中學部港大同學會書院校齡更淺，至今創校短短9年，即成DSE狀元學校，一出兩個，芳芳說中小學部所有師生、家長，無不感到欣喜，消息早已傳遍校內家長圈。「一班家長好開心呀，呢間學校有個好好特色，就係家長們好團結，我哋除咗每日喺WhatsApp group講小朋友功課、邊個拎咗邊個本書、聽日默書默咩之外，當搵到有咩好嘅教養方法、關於小朋友嘅消息，我哋都會分享。」芳芳指原則上所有小學部畢業生都能直升中學部，只要成績達標便可，Queston聞言搶答：「要有B+！」你做唔做得到？「唔知呢！」
Queston讀書成績中上，最重要讀得開心，「一、二年級唔使考試，功課比其他學校少，媽咪啲朋友話佢哋學校每日有成10樣功課，我哋只係得5至6樣。最開心係有朋友，小息可以一齊玩！」

加入戲劇校隊

Queston是學校戲劇及choir成員，不過今年活動多及兼顧學業，又想每日保留一小時玩樂，被迫放棄choir，專心做話劇。芳芳欣賞學校大力推動戲劇教育，除了校隊之外，一年級起便設有戲劇課程，「學校依家有兩個戲劇老師，各自負責初小、高小，另有一個英文戲劇老師，俾學生多啲演出機會，喺觀眾面前表演亦可以練大膽。」
芳芳本身都是戲劇導師，自小帶囝囝四出開工，令他受到薰陶，「2013年我製作咗一套戲，囝囝都有個角色，2012年我哋參與咗另一套史詩式戲劇《歌聲無淚》，佢就飾演其中一個走難學生。」
實戰戲劇教育之前，芳芳一直透過講故事去培養囝囝的戲劇細胞，並練得良好的語文及表達能力，「喺講故事當中我會模擬唔同角色，我會解釋故事劇情，佢就知道每個故事嘅結構同發展係點，到學校有機會做戲劇，佢就好易接收，對文字、情感表達亦冇難處。」

故事教育終生受用

親子講故事聽落老生常談，但確是最有效、最方便的親子教育之一，既可增進溝通與感情，亦可從中學習語文，好過叫孩子抄寫習作。自胎教起與囝囝講故事的芳芳，加上資深戲劇經驗，對講故事有相當經驗，她提到好多父母知道講故事的好處，但不知從何說起，欠缺技巧，五、六年前就萌起出書教學。
芳芳早年認識了英國兒童故事作家Neil Griffiths，被他的講故事魅力所影響，今年她的起心肝出書，一半內容翻譯自Neil的講故事技巧著作，另一半是分享她與囝囝的講故事經驗。「Neil有好多精要技巧，例如點樣利用聲線、表情去講；而我主要分享家長可以點誘導小朋友提高閱讀興趣，唔好覺得自己唔識就唔講，其實只要你愛護小朋友就會做到，唔係要講到表演級，重點係父母同小朋友嘅互動分享。」

講故事都好環保，一本書可以重複講，每次加入少許新元素，小朋友就百聽不厭，「我哋又鼓勵囝囝將學習到嘅嘢recap番，學習有好多層次，唔係聽一次就算，好似佢鍾意忍者、Lightning McQueen（動畫《反斗車王》主角），睇完本書就畫出來，依家大個咗仲會留意角色造型、畫風係點。」
芳芳強調，要小朋友愛上閱讀，父母必先愛閱讀，讓小朋友感受得到，「好多家長覺得要先講童話，但要爸爸講《白雪公主》好困難，因為佢都唔鍾意，其實書有好多種，隨着小朋友長大睇吓佢興趣係咩，再揀相關書籍，甚至講家族故事都得㗎，以前爺爺一個人落嚟香港打拚點點點，呢啲都係一個好故事。」

講故事秘笈
•放低父母身段，投入角色扮演。
•幼兒期可選有聲、有觸感的故事書吸引他們。
•多選自己熟悉的故事，如《三隻小豬》、《西遊記》等，
家長較易掌握。
•如家長不擅處理文字，宜選多圖畫的書，再請孩子一齊看圖講故事。
•時間長短沒規定，重點是享受，5分鐘、10分鐘也好。
•避免用同一聲線，適當地變聲、改變說話速度。
•講完後可問孩子感受、喜歡哪一個角色及情節等。

睇完以上分享未夠喉？可click入短片睇睇潘芳芳親身示範，並大派更多講故事貼士，父母必定獲益良多。

●撰文：Ling

●攝影：Clay Lam（部分相片由受訪者提供）

●場地: Book Talk English Learning Center@TKO (tel: 3105 0336)

●鳴謝: 天地圖書