「女神」 孫慧雪 暑假誕大隻長腳B
有幸贏得女神的圈外老公Edwin Lo高大威猛，十分喜歡小朋友，與雪雪在籌備婚禮過程已開始造人，不久就一擊即中，結婚當日已懷孕一個月。雪雪笑指腹中BB似老公， 腳長長好大隻， 更瘋狂踢肚， 十分好動，預產期為炎夏8月。至於仔或女，雪雪叫醫生不要告訴她，想保持神秘感直至出世一刻。
撰文：Ling
攝影：Issac Poon（部分相片由受訪者提供）
化妝：King Yip@KINGS MAKEUP
髮型：Frankie@KINGS MAKEUP
場地：Lauren Lee Makeup Studio (Tel: 5662 6977)
單親家庭長大渴望婚姻
孕婦懷首胎大多憂心忡忡，既擔心BB的健康，又對將來不知所措，受荷爾蒙影響更易引起情緒波動。惟性格樂觀的雪雪完全沒有受影響，老公更笑她比懷孕前更開心，雪雪笑言：「可能我本身好鍾意BB，所以我好開心，老公話我溫柔咗，少咗發脾氣，哈哈！依家出街都會多咗望人哋個BB，覺得好得意呀！唔知我個BB出世咩樣呢？」
雪雪臉上常掛着甜美的笑容，樂天知命，縱使來自單親家庭，自小只與爸爸和嫲嫲同住，但她從沒有自怨自艾，反而令她渴望組織一個完整家庭，對婚姻更會直到永遠，絕不分離。「爸爸媽媽自我有記憶以嚟就分開咗，細個成日都想爸爸媽媽一齊拖住我，所以大個就希望快啲結婚，生兒育女。我無驚咗婚姻，反而更加渴望，當我決定咗結婚，我就唔會離婚㗎喇。」
爸嫲難照顧 請夠兩個陪月
雪雪與圈外老公拍拖六年，認定雙方就是Mr. Right，去年決定拉埋天窗，婚禮籌備了半年，並非外界所指的奉子成婚，因兩人早已計劃婚後盡快生小朋友，故婚前開始造人，好快一擊即中，結婚當日陀B一個月，雙喜臨門。「好多人都話生仔要試半年至一年，所以就提早試，估唔到咁快就中咗，我哋都好鍾意小朋友，冇二人世界唔緊要啦，之前都二人世界咗好耐。」
雪雪懷孕後最開心就是孫爸爸和90多歲的嫲嫲，爸爸經常摸雪雪的肚子笑說：「我個女畀人搞大咗呀！」
不過，孫爸爸和嫲嫲因不擅下廚和年事已高，難以照顧雪雪坐月期間的起居飲食及湊BB，所以雪雪已聘請兩個陪月貼身照顧。「幫我補身又好，教我湊BB又好，我一定要請，已經問咗好多人意見，因為陪月都係人，都會，所以第一個月請咗兩個，一個就日頭幫我煮餸，另一個就夜晚幫我睇住BB，咁我會放心啲，我驚自己技巧未得，但第二三個月夜晚我自己湊番。」懷孕期間除了老公幫手，雪雪都要照顧自己，學習煲湯補身，「但有時我都好懶好攰……我有出去買啲湯番嚟飲，依家有得網上訂湯好方便。」
長腳粗腰 遺傳老公
現陀B七個月的雪雪，肚子size比較巨，重了近30磅，照超聲波後發現BB腳長長、腰粗粗，相信遺傳了高大的老公，現在一出街常被人誤以為陀孖B。「醫生話我BB比正常BB嘅size大一周半，0%至100%中，佢個size係90幾個%！」雪雪擔心BB太大未能順產，留待九個月時再諮詢醫生意見。「順產對BB好啲，因為BB經產道出來受到壓迫，增加肺功能，有研究仲話EQ會高啲，而且媽咪身體復元快啲，我都好想一生人試一次產程！」
長腳B還充滿運動細胞，無時無刻踢媽咪個肚，三個月大照超聲波已經狂踢。「醫生都笑點解我個BB郁得咁犀利！佢喺入面打拳、踢腳乜都齊，嗰陣細啲我都唔覺，依家長時間都feel到佢踢，有時我隻手貼近個肚，佢會踢到我手震，我睇戲佢一聽到音樂踢得仲犀利呀！」雪雪指兩夫婦皆是性格好動、坐不定之人，相信BB有遺傳，將來一家三口一定要經常出去放電！
長胎不長肉秘訣︰午睡
懷孕頭三個月，雪雪間中有孕吐，鼻子變得靈敏，最難頂肉味撲鼻。「好遠人哋聞唔到嘅我都聞到，尤其聞到肉味就想嘔，之前鍾意食嘅都食唔到，食蘋果都嘔，我試過出門口前食蘋果，一上的士就係咁嘔，嘔到落車，連司機都話：做媽咪真係偉大！」
孕吐情況一踏入四個月就停止，雪雪笑自己變得大食，「依家一肚餓直情覺得個胃有旋渦，餓到最高點，一定要即刻食嘢！以前肚餓都唔係咁，不過我只能少食多餐，食得多就好似壓住BB咁。」除了生冷海鮮、飲品走冰之外，沒有特別戒口，希望多從不同食物吸收營養。「唔可以畀BB染到李斯特菌，有BB就要負責任。」
不斷進食好易肥，生B後想修身就好難，雪雪靠少食多餐控制之外，更獲一位飽閱資訊的孕婦朋友教路，長胎不長肉的秘訣有賴午睡。「佢話最少都要半個鐘至一個鐘，個胎就會大得快，我每日都有瞓晏覺，真係大得好快！有時我會食飯前瞓，今日做完訪問都會番去恰一恰。」
吳若希教路︰每日行樓梯
雪雪懷孕後得到很多新手星媽過招，三月誕下B仔的張名雅提點要多做運動，有助順產過程，一向運動底的名雅順產過程好順利。「佢話佢一路踩單車踩到差唔多就生，生嗰陣push咗三下就push到喇，佢好勁，陀得好fit，生完之後好快瘦。」她亦有請教剛誕一女的吳若希，同樣建議她多做運動，行樓梯是一個好方法。「佢話每日都行，臨生前一兩個月行多啲。」最近雪雪報讀了一些孕婦瑜伽班，希望保持一定運動量，令生產過程順利。
隨着肚子愈來愈大，雪雪最近開始有少許腰痛，睡得不好。「之前有幾日試過瞓瞓吓痺到醒咗，依家日頭做少少運動，行多啲路，夜晚就唔會抽筋喇。」
絕不棄養四小狗
近日雪雪開始停工待產，每日食、瞓、睇懷孕經和準備BB物品，還有四隻狗仔陪伴，生活不至於太苦悶。雪雪是愛狗之人，家有兩隻松鼠狗、一隻芝娃娃和一隻貴婦狗，年齡由4至12歲不等，她揚言絕不棄養四小狗，因為全是她的寶貝。「佢哋都係我BB，係我屋企人，由細到大我都有養狗。」她記得小時候狗仔好黐堂弟，晚晚一齊睡，她希望狗狗將來一樣愛錫她的BB。「堂弟出世時，我隻狗成日同佢一齊瞓，當有親友想抱BB，狗狗即刻狂吠保護小主人，我覺得好sweet好溫馨。」家有寵物可以培養小朋友的愛心與責任心，雪雪見過很多養寵物的家庭，小動物都成為小朋友的童年玩伴，令她十分期待BB出世後與狗狗玩耍的日子。
距離預產期愈來愈接近，雪雪現時陀B心情不算太緊張，反而老公才是緊張大師，驚老婆個肚咁大會爆！「佢問點解你個肚仲有兩個幾月都咁大嘅？會唔會爆㗎？梗係唔會啦！我見過有朋友仲大啦！」每隔一兩個鐘又問BB有冇踢肚，老婆講少句又問：「點解你今日冇話佢踢你？」他連為老婆按摩都不敢，怕按得不好弄傷老婆，「我已經預計到生嗰日佢會緊張到流晒汗，揸相機都跌呀！」
雪雪懷孕寫真
雪雪早前拍攝了一輯以花為主題的孕照留念，本身鍾意花的她十分滿意，即使孕照要性感露肚，老公都沒有詐型。
