中秋節團圓夜 星級家庭點過節？
撰文：Joanne 圖片：楊千嬅、張繼聰、林志穎、林嘉欣、梁詠琪、陳茵媺、宋熙年IG
楊千嬅切大月餅
中秋節食月餅是常識吧！楊千嬅尋晚（24/9）就同親友喺屋企過節，最震撼就係當場切咗12黃巨形月餅！呢個餅足足夠30人食！
千嬅仲話自己最愛傳統口味！不過12黃⋯⋯希望佢哋係一齊分享啦！蛋黃好高膽固醇㗎！
林志穎同女神過節？
最令人意外，就係童顏不老嘅林志穎，喺中秋節正日，竟然係同女神鍾麗緹一家一齊，喺泳池邊大搞燒烤派對！
48歲嘅鍾麗緹，大小志5年，佢哋係喺2002年，合作拍大陸劇《天龍八部》嗰陣識嘅。16年之後，「段譽」同「馬夫人」已經分別係3個小朋友嘅爸爸同媽媽啦！
呢個Party真係豪！淨係個泳池已經超大！相中Kimi喺池邊，睇住鍾麗緹兩個囡囡游水。
雖然小志冇PO Kimi嘅正面相，但係9歲嘅Kimi已經大個仔喇，識得自己燒嘢食！
又燒嘢食，又游水，又玩大富翁，大家玩得不知幾開心！
小志仲PO咗張扮吞月亮嘅鬼馬相！
張繼聰謝安琪開自家花燈會
係人都知，張繼聰同謝安琪住喺大埔豪宅，間屋對住個無敵海景，中秋節佢哋一家人就喺屋企食飯聚天倫！
晚飯期間，仲有妹妹表演魔術助興！
食完飯，就將自己個天台，變咗做花燈會喇！排滿風琴式紙燈籠，好靚呀！
尋晚天色都算唔錯，夜晚又有點涼意，最適合就係賞月啦！睇吓阿Kay同個女一齊賞月，幾enjoy！
玩完賞月又玩錫錫，好溫馨呀！
大時大節，11歲嘅哥哥張膽，就一個咁坐咗喺天台望月，型到呢！
型到媽咪都要學吓！
大時大節，「晒囡狂魔」又點會唔把握機會晒吓！
林嘉欣食囡囡手整月餅
林嘉欣係月餅代言人，代言月餅固然有棒場，但係中秋節正日，5歲細女就親日整咗個香橙朱古力皮月餅佢嘆，幸福的味道，真係聽到都知夠晒甜！
梁詠琪情迷燈籠
梁詠琪真係好鍾意玩燈籠，玩到同時攞住5個燈籠喺手，有品牌產品，亦有小朋友手繪作品，睇佢玩得幾開心！
陳茵媺整傳統湯圓
喺外國長大，十分洋化嘅陳茵媺，就趁中秋節同屋企人食團圓飯，佢仲親自準備甜品，睇材料似係想整紅棗桂花湯圓，口味真係夠晒傳統呀！
宋熙年獨自湊仔過中秋
因為老公Jason去咗德國，所以宋熙年同老公做咗爸爸媽媽後嘅第一個中秋節，就要分開過喇！亦因為咁Sarah更感受到呢一刻老公對佢嘅重要性！事關而家所有照顧BB、清潔換片，都要佢自己嚟喇！
