何基佑︰想囝囝做個真男人！

離開商台轉戰拍劇

Kay十多年前從加拿大回流返港，先加入新城電台做DJ，之後做過roadshow主持及拍廣告，再加入TVB至今，因說得一口流利英語及西班牙語，獲派主持明珠台生活資訊節目《Dolce Vita明珠生活》至今，後來獲「恩師」陳志雲邀請加盟商台，第一日開咪志雲更走入直播室為他慶祝生日，可見其得寵程度。自離開商台另覓發展後，Kay已好少與志雲聯絡，「自己仍然鍾意做電台，但我又唔係離開呢行，總有機會再合作。」Kay快做人爸爸，但沒刻意通知志雲，「有同啲舊同事講嘅，佢上網都睇到我啲相，有俾吓 like，依家like係等於睇咗架喇，我都係咁，哈哈！」

(左) Kay 在《四個女仔三個BAR 》飾演陳凱琳（中）的師兄Brian。

(右) Kay 在《明珠生活》有很多外國回流的靚女拍檔， 例如華姐張曦雯，一齊品酒歎高檔美食。

之前商台TVB兩邊走，難以兩邊兼顧，Kay希望投放更多時間在TVB，早前小試牛刀拍劇，在《四個女仔三個BAR》飾演陳凱琳的師兄Brian。「喺電台每朝8、9點開工，做完節目仲要留低做訪問，好似返full time，我完全明白工作需要咁多時間，但好多
時因此要推掉TVB嘅工作。」

時間充裕了，Kay即展開造人大計，幾個月就bingo！與太太Charis結婚四年，準備迎接第一個小生命，Kay密密接job做司儀搵奶粉錢，並率先賣掉大埔村屋搬入市區租屋，將來可能為囝囝讀書揀校網再搬；之後賣掉兩座位跑車，改換一部家庭車；還有懷孕幾個月就改定名——「何清義」，希望他做個清心及追求公義的人。人仔未出世，Kay對一家人的將來已想得很長遠。

湯盈盈教湊仔時間表

準備BB的物資上，是Kay最放心一環，各方好友積極送出物品，真正要他自己買的只有BB車及BB櫃，盛惠4,000元！《明珠生活》好拍檔湯盈盈送出奶樽消毒器，教友高皓正送上夠穿一年的衣服，其他親戚朋友連BB床、嬰兒汽車座椅、餐椅、奶泵都一一奉上。「原來BB市場咁大，我好似拾荒咁。」
為了照顧太太和BB，Kay已聘請工人姐姐，湯盈盈卻建議他再請陪月，因具專業知識，但他婉拒好意，「我哋好怕太多人喺屋企，依家有工人都要適應。」盈盈好叻安排時間表湊女，餵奶、睡覺、起床全部有規律，盈盈也傳授了秘笈，Kay說︰「個列表好正呀，有日期、時間、左邊奶、右邊奶、大小便時間，左右邊奶係寫低食咗或泵咗幾多ml，咁你就知上次餵左邊定右邊、食咗幾多，唔會成日食死一邊，一日餵咁多次邊記得。所有嘢寫低晒，咁下一個接手照顧就知道BB進度，今日食咗幾多、有冇屙過，原來兩日冇大便，每日寫多少少詳細啲，掛喺牆上，方便大家睇住照顧。」

懷孕戒口易有食物敏感

太太 Charis稱陀B算舒服，好少嘔，食得瞓得，近來就瞓得差一點，因為B仔知道快出世，變得非常活躍！Charis好大膽沒戒口，海鮮照食，「開頭好緊張，乜都唔食得個人都好唔開心，醫生話凡係自然界嘅嘢都可以食，雞、鴨、海鮮都係自然一部份，加工食品就冇咁好，魚生肯定係乾淨都得，我都偷食咗一兩嚿，不過我都少食，好難確保魚生乾唔乾淨。」

原來懷孕戒口，有機會令BB將來易有食物敏感，Charis解釋道︰「有朋友生咗三個，陀第一胎有戒口，發覺易有食物敏感，第二胎開始冇戒，真係冇乜敏感，身體仲強壯啲，所以佢就估計，第一胎食物敏感嗰啲，就係肚內冇乜接觸過嘅食物。」

做男人四大條件

生仔沒有說明書，Kay和Charis密密睇書、睇片、聽講座取經，頭三個月就開始胎教，爸爸講英文故事，媽媽講中文，而他們身為基督徒，亦利用聖經故事與BB溝通，每日一篇。「同個肚傾偈就冇乜喇，好怪呀。」Kay識rap又出過hip hop碟，喜歡聽hip hop歌，他笑說都有播hip hop歌，「少少啦，都係播柔和音樂多啲，音樂盒叮叮叮，唔想咁嘈，會影響情緒。」

Kay已經想教囝囝好多東西，例如彈結他、打籃球，如果囝囝想學rap都可以教，希望兩父子將來一齊玩音樂、做運動。不過，他最想教好囝囝做人，做一個真正的男人。「其實我哋呢一代，好多父母會教個仔點做人，但好少教佢做一個男人，呢個世代係冇爸爸嘅世代，好多人未做到榜樣，可能有啲爸爸未做好爸爸角色，以至下一代未識做人哋個仔，甚至再一下代嘅爸爸，所以我好想訓練一個有爸爸嘅小朋友。」

Kay覺得做好男人有四大條件，需要有堅持的心、有承擔、負責任、有愛心，「一個人有愛先會孝順，會愛身邊嘅人，同埋一定要做個永不放棄嘅人，放棄實在太容易。男人係一個家庭嘅頭，唔係話晒事嗰啲，而係成個屋企嘅方向，好睇個男人係點，如果個男人唔負責任，女人就要做埋男人角色，所以男人要俾一個完整屋企太太同小朋友，等個仔睇清楚父母角色，如果個仔想似你，你就成功喇。」

(左)兩人笑言姓何改名難，何B仔、何里活、 何必、何苦……好多奇怪名！

(右)Charis以前從沒想過要生小朋友，覺得自己未ready，隨着Kay給予信心，決定生育下一代。

撰文: Ling

攝影: Paul Choi (部分相片由受訪者提供)

場地：Party Fever (tel:9674 4952)