六個小孩兩對孖 湯鎮業︰可能我好命

3個媽媽6個孩子

六個孩子當中，頭三個由姜坤所生，並已長大成人，21歲大女湯愛嘉樣子標緻，遺傳了父母的靚人基因，被封最靚星二代之一；之後一對20歲孖仔湯君慈及湯君耀亦高大俊朗，有爸爸當年的帥氣。三人現留學美國，一同就讀美國著名大學加州大學洛杉磯分校（University of California, Los Angeles, UCLA），愛嘉讀到三年級，明年畢業，主修傳媒，將來或從事公關工作；而孖仔一齊主修社會經濟學二年級。
湯鎮業對三人能考上名校感到驕傲，「我好注重佢哋學業，你知啦，花咁多錢捱到佢哋咁大，都係希望佢哋讀到好學校，我成日問大女，兩個細佬考成點？但個女覺得我好煩，做老竇就係咁喇，好緊張學業。」

第四個由紅顏知己所出兒子，亦已屆青春期，就讀內地學校中三；而由現任妻子文靜所生的孖女甜甜圓圓最細，6歲就讀小一。六個孩子三個媽咪，生活分隔異地，從未試過聚首一堂，他希望有朝一日一家人能齊齊整整，「最大三個同最細孖女相處冇困難，孖女仲細好好玩，但中間嗰個唔同媽咪，係有啲隔膜，隨緣啦，都係我啲仔女，就算唔同媽咪，大家都係兄弟、兄妹、姊弟，就算唔可以一齊生活，都希望做到一家人感覺。人總會成熟，時代都一直改變，希望佢哋大個之後會體諒，話晒大家都有姓湯嘅血統。」

孖仔要不同 孖女愛一樣

生一對孖胎已經難，湯鎮業更生夠兩對孖，「可能上天對我唔錯，好好命有兩胎係孖，我本身都鍾意細路仔，當多個人多雙筷子啦。」太太文靜即笑他：「多個人多好多問題，好辛苦的！」他指兩對孖性格大不同，君慈和君耀不喜歡別人覺得他們似樣，刻意作出不同打扮，「佢哋唔想俾人覺得係twins，一定要唔同style，細個時都唔計較，好少爭嘢。」

甜甜圓圓則喜歡孖女姊妹裝，好難分辨她們，他笑言是被迫塑造成孖公仔，「一加一唔係等於二，係等於五！兩個細嘅一齊產生好多矛盾，成日嗌交爭嘢，好似買飲品唔可以一杯橙汁，一杯士多啤梨，一杯多一杯少又唔得，兩個會爭嘢飲，又問點解佢多我一點？一定要兩杯一模一樣！買衫又係，一件紅色一件綠色，點知兩個都話要紅色，又問點解要我着綠色？唉算喇，以後索性乜都買同一樣。」

下頁：孖女留青島不在港就學

留青島培養中華氣質

為方便照顧及學好中國文化，甜甜圓圓留在山東省青島市就學，湯鎮業指山東是傳統文化大省，希望培養女兒高貴氣質，「孔子都喺山東，好多傳統文化例如知書識禮、弟子規、四書五經等等都係從小培養，佢哋依家都識背，加上習主席都要弘揚呢樣嘢，女仔更加需要學習茶道、孝道，提升個人氣質，依家屋企整咗間禪房，佢哋可以坐半粒鐘唔郁，好難得㗎。」

他不打算送兩個女返香港讀書，直言香港缺少國民教育，新一代年輕人亦普遍反共，「國民教育好重要，我啲細路依家都知毛主席係邊個，呢啲觀念咪好囉，但部分香港人搞到中港矛盾，係非常唔健康，會影響到啲細路仔。我有啲朋友同我細妹嘅仔女，佢哋唔支持亦唔敢反對，驚唔去佔中會俾人話，會排斥你咁，人都有自由㗎嘛，所以成個香港唔係咁健康。」他覺得兩地年輕人應多溝通，港生少返國內，只從媒體得知國內負面消息，「我喺國內生活見到好多好地方，尤其係廣東省好發達，衣食住行、交通網絡都好好，大家應該和諧啲。」

下頁：大談五虎將仔女

三哥仔女唔識中文

細的三個在國內讀書，但大的三個在外國留學，看似與湯鎮業的「學好中華文化」思想有矛盾，其實大女大仔一直在港接受本地學校教育，到大學時期才出國，湯鎮業首要他們學好中文、普通話及國術文化，才讓他們放眼世界。「去美國讀書有樣好，國家自由，鼓勵學生讀完書返去自己國家創業，我希望小朋友將來返香港又好，去國內又好，能夠創一番事業。」 他指好兄弟苗僑偉自小送仔女去加拿大讀書，失去了香港的根，「佢哋從小喺嗰邊，長大後唔願意返嚟，可能嚮往咗嗰邊生活，佢個女唔返嚟㗎喇，好西化㗎，中文都唔識。」昔日五虎將之中，湯鎮業與苗僑偉聯絡較多，其大女愛嘉與三哥的大女苗彤亦年紀相近好friend，時常有WhatsApp聯絡，湯鎮業說：「上次阿苗搞咗個結婚周年party，我同個女都有去，佢個女又喺度，兩個不知幾好傾。」

下頁：續談劉德華女兒

華仔個女似媽咪

五虎之中，除了梁朝偉無所出，三哥、黃日華都仔大女大，但劉德華女兒才三歲大，行蹤神秘，連湯鎮業都未見過，「我淨係睇過相，OK幾得意呀，似媽咪多啲，佢都搞緊喺香港讀書呀，應該都喺九龍塘附近讀，揀咗幾間學校，應該冇問題嘅。」有沒有提點他要學好中文？「佢應該會學好嘅。」

他坦言感受到華仔在全城目光下湊女壓力大，要盡力保護女兒，「唔通搵私人老師咩，點都要受公眾目光，好似我喺青島都好受注目啦，何況佢？咁多傳媒睇實佢，搞到佢好似俾學校列做不受歡迎人物咁，驚佢影響其他學生、影響學校，但佢唔想㗎嘛，佢都要讀書㗎！」他希望傳媒高抬貴手放過華仔，讓他的女兒能正常上學，「真係未必間間學校都會收佢，有啲貴學校本身都出名，唔需要多個名人讀令間學校出名啲，希望傳媒唔好將佢放到咁大啦，影一兩次咪算數，唔好一路跟住影，真係會有影響。」

●撰文：Ling
●攝影：Simpson Chi（部分相片由受訪者提供）
●場地：Grand Central Bar & Grill（tel: 2736 4888）