前主播 柳俊江 窮養兒富養女？

撰文： Ling
攝影： Simpson Chiu（部分相片由受訪者提供）

自古有云：「女要貴養，仔要窮養。」非指金錢上的投資，而是內涵。男孩要磨練意志，教導他們承擔責任；女兒的貴養，是指要具備文化修養，增廣見聞，有獨立主見，免被物質誘騙。柳爺坦言不自覺有偏心囡囡，已盡力把此想法放下，「可能爸爸心目中會諗呢啲，我會盡量提自己放低呢啲諗法。」

男仔玩Elsa無錯

傳統思想要「男主外，女主內」，男人做男子漢擔起頭家，女人要溫柔嫻淑，專心相夫教子。不過時代轉變下，男女在家庭的角色會有轉變，丈夫做大廚，太太出外工作，愈來愈普遍。連小朋友的喜好也不一定男仔玩車也可玩Barbie、煮飯仔，將來或成就另一番天地。最近家長就一些性別問題鬧得熱烘烘，楊千嬅曾經拒讓囝囝玩《 Frozen 》的Elsa，被家長群插，千嬅其後已洞悉問題，讓他自由喜歡Elsa，更因而認識了所有公主系列，培養出閱讀興趣。

柳爺一對仔女的性格亦反傳統，Bella性格好動，喜歡蹦蹦跳跳，Winston則較文靜、專心，柳爺覺得性別喜好問題並非孩子的錯誤，不必糾正。「我以前都俾老竇話男仔唔好入廚房，唔好做家頭細務，老竇係傳統潮州人，但依家如果男仔係靚仔小鮮肉，仲入得廚房煮幾味，女仔當神咁拜㗎嘛，彭于晏出嚟煮兩味你就好開心！年代唔同咗，將來個年代都會唔同，所以我唔覺得係咩問題，就算Elsa嘅製作團隊入面都好多男人，你要明白件事係點行，而唔係單方面你鍾意，如果唔係目光會好狹窄。」

一對仔女的性格相反，Bella很活躍、外向，Winston則較文靜，柳爺不抗拒男仔 玩女生玩意，女仔卻變得男仔頭，因為這非孩子的錯誤，不必糾正，可能他們將來會行出另一片天。

珍藏粉紅色波鞋

柳爺笑自己都收藏好多粉紅色波鞋，好多球員都全身粉紅上陣。「冇需要將呢樣嘢模式化，亦都唔需變成一個話題，每個人都有自己管教方式。」柳爺除了多粉紅色波鞋，亦經常下廚煮幾味，無刻意劃分「男主外，女主內」，很多媽咪都有自己理想，好似柳太在音樂事業上有些新計劃，作為丈夫的柳爺會與太太互相補位。「以前情人節、聖誕節先係我煮氹吓老婆，近排佢忙湊細路，又多嘢諗，希望開啲有關豎琴嘅新project，所以我就分擔吓，煮到就煮。」

對女兒偏心一點

女兒是爸爸的前世情人，對女兒比較嬌縱，柳爺笑言也不自覺有偏心囡囡的情況。「我知道我係先入為主，唔應該咁做，但少不免會有啲自然反應，好似阿女一整親，我會即刻走埋去：『你有冇事呀？』如果阿仔整親，就話：『冇事，自己企起身。』」

即使囝囝哭鬧，柳爺都會比較狠心，希望囝囝堅強些，但太太會出聲提點，兒子只有幾個月大。「我對個女好錫好寬鬆：對住個仔不其然會有期望，想佢堅強啲，雖然太太會提番我佢得幾個月大，喊係好正常，但個心都會覺得佢唔喊好啲，哈哈！不過無辦法呀，可能爸爸心目中會諗呢啲，我會盡量提自己放低呢啲諗法。」

不單止爸爸，其實媽咪都有「女要貴養，仔要窮養」的想法，少不免對兒子硬淨一點，連柳太分別帶仔女出街食飯，都會到不同餐廳，她在社交網站分享道：「湊住個女，帶佢出街會搵啲坐得好啲嘅地方食嘢，湊住阿仔，就單拖帶住佢坐大牌檔茶餐廳食個佬飯都好okay。」

幫Trouble 2女兒了解內心

兩歲的Bella踏入Trouble 2的年齡，開始有主見，懂得say no，易發脾氣，柳爺和柳太現花很多時間與囡囡溝通。「尋晚阿女有少少脾氣，我見到太太同佢溝通嘅過程，見到兩歲嘅佢開始有自己諗法，我相信呢個係長期溝通，我好怕劃條線話幾多歲做乜嘢，幾多歲又做啲乜嘢，我唔相信依家嘅小朋友係要用咁保守嘅方法去幫佢做判斷。」

Bella比較早熟，思考及說話能力比同齡小孩快，更懂得表達不滿情緒。「依家佢會成日講『唔要呢個』、『唔要嗰個』、『唔好呀！』甚至會有突如其來嘅脾氣，對我嚟講都係學習過程，我唔會話好叻同佢溝通或者開導佢，我都學習緊去了解佢內心世界，同時間幫佢了解自己嘅內心世界。」太太最近透過書本去引導Bella了解自己，已初見成效，「套書講情緒，一套有幾本，分別講angry、jealous、sad、being loved，太太一路同佢講去幫佢了解發生咩事，因為咩事唔開心？嬲唔係問題但要理解同點去解決？」

父母面對子女Trouble 2、Terrible 2聽落恐怖，柳爺將之比喻作男女關係，「正如男人都話女人恐怖一樣，係你唔理解女人，你冇去溝通啫，適當嘅溝通、適當去放下你嘅睇法係好重要。」

太太是豎琴高手

柳爺和柳太的IG頻頻上載她與女兒玩豎琴的片段，獲得一致讚好，柳太在聖誕節時用手搖鈴奏出聖誕歌，在網上更勁吸likes！柳太 的音樂底子厚，大學讀音樂系出身，識玩大量樂器，家有鋼琴、大豎琴、中豎琴、兩個BB豎琴、長笛、牧童笛、手搖鈴……柳爺都有彈結他及小結他Ukulele。「柳太仲有啲擺喺床下底，鋼片琴、木片琴等等，好多樂器。」

出世在音樂家庭，仔女有很多機會接觸樂器，在剛過去的農曆年，Bella便主動要求學鋼琴，Winston亦喜歡聽音樂，媽媽玩音樂會 望到眼擎擎。「太太以前有教琴，阿女見到本書仔好得意，就攞出嚟叫媽媽教佢彈。」

柳爺和柳太沒有刻意要栽培仔女在音樂上有成就，暫時當興趣玩玩就好，多試其他興趣後讓他們自由發展，柳爺說：「依家一路教一路睇先，都有信心嘅，太太可以教音樂，學術、語文上我都可以教到。」

發展興趣能調劑身心，做人不易行差踏錯，音樂更可治療情緒，柳爺指太太不開心時會收埋自己彈琴，懷孕時亦多彈琴作胎教，現在仔女的情緒的確較其他小朋友冷靜。「我唔夠膽講係咪真係有幫助，我都係觀察，但多個興趣去分散注意力都係好事。」

性格決定命運

柳爺和柳太主張孩子開心學習，不太着重學術方面，故不會選擇傳統名校，反而着重孩子的人際關係、情緒管理、建立性格及價值觀方面，直到中學孩子摸清了方向才落工夫，他表示自己也是過來人。「我唔相信贏在起跑線，三歲定八十，我只相信性格決定命 運。我都係遲起步嘅人，中六七先開竅，上埋大學讀新聞系，有種鼓勵令我要做好自己，以前一直靠小聰明過骨，會考都係得15 分。」畢業後到TVB任職新聞部記者及主播，2010年辭任，輾轉做過NGO，至今創辦了廣告製作公司，由傳媒人變成廣告導演，他慶幸自己未遇上 太多波折，做每件事也盡了全力，對得起自己。

柳爺可以為孩子做的，是為他們累積資源讓他們選擇，而選擇權在他們手中。除了培養興趣，柳爺更為他們在財政上打好基礎，以應付將來的教育開支。身為今年「香港理財月」香港金融理財知識和能力策略大使的柳爺，打算將兩年的利是錢為Bella和Winston各自開戶，亦有買些基金幫助儲蓄，他認為儲蓄一定要有目標，否則中途會因其他枝節而提走款項，影響仔女將來的發展。

爸爸影相叻

女士們都想另一半影相叻，幫自己和仔女影多啲靚相，柳爺就做得到，經常為妻兒拍下多幀唯美寫真，其他爸爸們可以參詳吓，氹吓家人開心！