劉家良逝世一年 翁靜晶揭夫最後抗癌路

劉師傅人已逝，但樂觀精神長存。他一直笑對癌病，不怕死，從不倒數生命，醫生估計他只有5年命，他撐足20年；醫生說最後24小時，他撐多5日。翁靜晶形容亡夫走得瀟灑，但起初仍接受不了，一度萌生自殺念頭，是女兒和信仰扶起她。隨着時間過去，她能從容談論往事，「點樣處理情緒係一個智慧同學問，我哋可以日日喊住講爹哋，亦可以笑住講爹哋，睇吓你選擇點面對。」

阿媽迫女讀Law
長女萬儀最近看演唱會期間，與場內一名女歌迷發生爭執， 涉嫌普通襲擊被捕，正在保釋候查。翁靜晶指有待警方調查，暫時對事件沒回應。

劉師傅自兩個女兒3歲起教功夫，以洪拳為主，但強調「雙手是習武之人的武器，不可隨意出手打人。」萬儀較早前接受本刊訪問時提到，學功夫只想承傳天賦，並非為做明星才學。在萬儀身上，爸爸的基因比媽媽強，她喜歡跟爸爸耍洪拳，更做過童星拍戲，如亞視劇集《殭屍道長II 》、電影《十萬火急》等等，現已完成學業的她，希望日後有更多演出機會。

婚後轉任律師的翁靜晶，深知要在娛樂圈生存，要靠運氣和觀眾緣，並非自己能所控制，她希望兩個女兒能繼承她，鋪路供書教學，但萬儀一取得律師牌後，即赴紐約讀演藝學校，「我對Law始終冇興趣，係阿媽迫我讀。」
翁靜晶覺得讀法律夠安全，加強在社會的競爭力，「如果麥當勞請經理，你有Law degree，隔籬嗰個冇，請人嗰個問，如果個客淥親手點賠，你識答隔籬唔識，咁梗係請你啦。你有Law degree唔一定做律師，但你競爭力大好多。」女兒沒興趣，不得不放手，她無奈道：「我由拍戲轉做律師，一講起拍戲就驚，我問佢做乜有律師唔做做明星？佢又反問番我！劉師傅就話由得佢揀啦，嘻嘻嘻！似我吖嘛！咁我可以點呢？生命係佢嘅，佢想點就點啦。」

至於幼女幸儀仍在英國讀法律，將來或在當地執業，但翁靜晶指外國人難搵工，估計她想長留當地，只是逃避回港被阿媽管，「佢讀完碩士應該讀埋博士，喺英國自由吖嘛。」幸儀課餘熱衷玩Crossfit高強度運動，最擅長舉重，揚言舉得起一個人，阿媽心痛個女舉到損手爛腳，「佢舉到成塊皮甩出嚟，呢個人太可怕，自殘呀！」

老頑童vs老積鬼
上世紀80年代，劉師傅已是鼎鼎大名的武術導演、武指兼演員；翁靜晶則是初出道的青春玉女，電視劇《荳芽夢》的女主角。兩人看來大纜扯不上，年紀更相差30年，做得兩父女，
1984年他們力排眾議走在一起，共諧連理，直至劉師傅去年過身，兩人結伴29載。

「其實喺呢段關係入面，我係阿媽，佢係仔。無論個女人有幾後生，經過一段時間後，喺婚姻上會變咗老公個阿媽，會囉囉唆唆管住佢，好多限制。」翁靜晶形容自己較老土，鍾意懷舊；劉師傅則是摩登之人，追求新玩意，正因性格相反，大大縮減年齡差距問題。「佢係老頑童，我係老積鬼！佢追求新手機，要走科技尖端，我部電話就用足六年，用到爛先換。佢會花好多時間shopping，病緊都去買衫買鞋，每日都扮到好靚出去，我就最唔鍾意shopping，着衫好求其，舒服就算。」

在翁靜晶心目中，劉師傅永遠是長不大的小孩， 甚至稱呼他做細B，「佢最可愛地方係長唔大，直到死嗰日佢都無長大過。」1994年，他證實患上淋巴癌，一直笑看病情，從不為生命倒數，翁靜晶最欣賞他的樂觀性格：「醫生成日同我哋講，你爸爸過唔到6個月㗎喇、仲有10日、3日就死喇，劉師傅就話佢死我都未死呀！佢唔覺得自己會死，仲話人哋斷錯症！」

預計5年命 撐到20年
劉師傅得悉癌病屬末期後，從沒抱怨一句，還與太太輕鬆討論生死問題，接受醫生安排做化療，由最初預計只有5年命，結果撐到20年，翁靜晶覺得亡夫非常英勇。「佢覺得兩個女仲細，一定要接受化療，而且一心一意用西藥。好多人聽到得番5年命會好驚，會搵晒氣功咩功，乜都試晒，但佢信任醫生。佢最英勇地方係，癌病每隔幾年翻發一次，每次都大大鑊，醫生次次都話佢就死，但劉師傅又話你死我都未死，呢鋪賭唔賭吖？」

公眾得知劉師傅病況時，紛紛為他擔憂，反而劉師傅逐一安慰，並把憂愁變成笑料，翁靜晶憶述期間一件趣事。「佢第一次化療後，啲頭髮一摸就甩出嚟，索性去洗頭舖剃光佢。幫佢洗頭嗰個人，見到啲頭髮一路洗一路甩，嚇到佢嗌『劉師傅，唔關我事㗎！』劉師傅話『唔緊要，我打咗化療針先甩。』佢返嚟同我講，話好似日本片《四谷怪談》，仲笑洗頭個人，笑到咭咭聲！」兩個女當時只有幾歲大，返家後不認得爸爸，「點解屋企多咗個和尚㗎？」

劉師傅抗癌20年，一家人嘻哈中度過，「我哋成日攞個死字嚟笑，反而就死唔到，你愈怕死愈會死。」翁靜晶談及他的病況時，非常從容，像講傷風咳般小事，但去到後期病情，難再輕鬆面對。「去到後期已經好差，其實佢死唔係淋巴癌，係死於血癌，淋巴癌已經控制咗，但呢十幾二十年，佢不停打化療針，影響到骨髓唔識造血，變成血癌，由每個月輸一次血，變成每星期一次、每日三次，最後輸都輸唔到，要長期瞓喺醫院。」

插喉吊命到最後
劉師傅一早託太太搞好身後事，在寶福山買位、火葬、揀好棺材，但死前一刻迴光反照，令一家人以為他再打勝仗。「我話睇嚟你又唔死喇喎，啲嘢買晒咁點呀？你唔死就老老實實，我賣番出去炒一轉呀！」翁靜晶對他老實不客氣，「佢話我點知啫，哈哈！」迴光反照第二日，劉師傅病情急轉直下，難以抖氣，但他一直清醒，而且力大如牛，但肺部失去擴張收縮功能，疑似肺炎，需要插喉吊命，試最後的新抗生素，翁靜晶促他三思，「我話插喉好辛苦，你係咪要插呀？佢話係！醫生都反對㗎，話不如你自然去啦，死得舒服啲，佢話點解要舒服啲？我梗係要博啦！」

醫生再看他的肺片，發現癌細胞已佔領肺部，並非炎症，新藥都沒用。其後心臟時跳時停，情況極壞，翁靜晶把拔喉的決定權，交予他與前妻所生的兒子，他不欲爸爸辛苦，決定拔喉。劉師傅挺到最後，聽齊所有親友遺言，翁靜晶憶述：「朋友逐個握手講再見，話今生好榮幸認識你。我知佢仲有啲嘢唔放心，一講到佢隻錶拎咗去整，個心臟儀一路跳，聽到冇乜興趣嘅話題，心臟儀就平嘅。」所有事情交代後，翁靜晶說：「家良，我哋個個都喺度，你可以安心走喇。」劉師傅終於安詳結束一生，全家小輩向他下跪。

火化後親自執骨
由病危、去世、喪禮、火化，翁靜晶陪伴到最後，還勇於觀察整個火化過程，「燒到最後，劉師傅個心臟一直燒唔到，法師話可能佢有message留喺入面，過咗一段時間，個心終於燒到一口舊炭，再成灰，啲灰冷卻三日後，我去執骨，喺啲灰入面搵番啲骨同牙。喺呢個過程，我以為會好震撼喊到死，原來好平靜。」

所有親友都不敢看火化執骨，火葬執骨團隊只有劉師傅的外籍徒弟，以及萬儀和幸儀的兩位外籍前度，「我同佢哋講，雖然你哋同我個女無緣，但你哋永遠係我哋劉家個仔，其中一個仲改中文名姓劉。我估劉師傅都冇諗過，死後嘅火葬執骨團隊，冇一個中國人，好玄妙。」整個火葬過程採用佛教儀式，亦因為佛學，令翁靜晶及女兒看化，不再沉痛於亡父之中，翁靜晶領略到，「人生有死亡先係完整，完美人生一定由生到死。」 有太太同行29年，劉師傅的生命已經無缺。

撰文：Ling
攝影：黃大立（部分相片由受訪者提供）
化妝：Wasabi@KINGS MAKE UP

髮型：Wilson Wong@KINGS MAKE UP
場地：都會海逸酒店 (tel: 3160 6888)
鳴謝：天地圖書