化妝小姐變身巴士車長
Profile：麥健欣
經歷： 阿欣與丈夫育有兩子女，分別是四及八歲；任職九巴車長六年，入行前從事化妝小姐近十年，為生計、為興趣而轉行，望以車長為終身職業。
靚媽資深車長
看女車長的故事前，先問讀者一個問題，你對巴士女車長的印象是怎樣？根據非正式隨機抽問，提供一些參考答案，包括「上咗年紀，大媽師奶款」、「揸車唔夠辣，謹慎又慢」、「慌失失，唔知手掣喺邊」、「技術好似唔及男司機，好似易出意外」等等連串負評。在現時男女平等的香港社會，在職場上依舊多多少少存有「男女之別」歧視想法。車長麥健欣（阿欣），曾從事服裝店售貨員，之後任職化妝品小姐近十年，皆是從事標籤為「女性的工作」，六年前，她來個一百八十度轉變，打破傳統框框，一下子跳進「男性工作」巴士司機一行。看見阿欣的便服妝扮，略施脂粉，手挽名牌手袋，長身tee配legging，一身靚太look，難以想像她駕巴士的模樣。再看穿上九巴制服的她，一臉認真及熟練地檢查座駕及巴士，判若兩人，才醒覺她是車長。
化妝小姐競爭大
化妝小姐與巴士司機兩份職業比較，大部分女生會選前者，不過，阿欣卻摒棄之，選擇後者。阿欣說：「十幾歲入行做化妝小姐，工作主要同顧客介紹護膚品、化妝品，我自己鍾意扮靚，分享點樣改善膚質，做得好開心。又一大堆女仔，成日嘻嘻哈哈，工作唔錯，一做就做咗差唔多十年，做到三十歲。不過，日子耐咗，我開始擔心仲可以做幾耐？眼見四十幾歲同事確實好有經驗，有一批熟客，不過sell新客時會有阻滯，新客會偏向搵年紀細啲嘅同事，可能皮膚底子點都好，有優勢有說服力。」在計算佣金的制度下，化妝小姐薪酬浮動，再加上，好比空姐，退休年齡四十多、五十歲左右，阿欣深知那刻才轉行就難上加難！當時已是媽媽的阿欣，看着資深同事，預見了將來的自己，又踏入三十之年，開始有長遠想法，計劃轉行，分擔家庭開支，為孩子儲教育基金。
三十而立 毅然轉行
跳離職場「comfort zone」，轉至新領域，阿欣說：「足足諗咗成年，好掙扎！有跟同事、丈夫商量，佢哋同我分析，丈夫好支持我，話『如果搵唔到工，最多我哋一齊慳慳哋，我養你！』」丈夫一席話，給阿欣強大後盾，她目標清晰地只投寄一封求職信，應徵九巴車長。她直言當年開始出現女車長，但仍屬少數。「見到有位女車長可以在男人堆中工作，一啲都唔輸蝕，好型！加上，我一直鍾意揸車，好想似佢加入女車長行列。當然，薪酬穩定、福利唔錯，如無意外可以做到退休都係好吸引。」她回想等待面試通知時，好像等待孩子入學取錄信緊張，成功獲得面試機會，非常雀躍。
在沙田車廠接受連串訓練，她表示初期非常緊張，擔心難以控制雙層巴士。「同我揸開私家車好唔同，好在師傅教得好好，仔細教我留位轉彎、埋站等等技巧。我覺得女性唔會駕馭唔到，依家新車同舊時好耐嘅型號唔同，揸得順手好多，車長會負責唔同型號巴士，出車前會有時間準備，唔擔心。初期工作時，我要自己膽大心細，尤其車多上落客時，慢慢信心大增，眼見愈來愈多女車長，唔覺性別會影響表現。」
無懼男人堆中工作
阿欣任車長達六年，感謝師兄姐教路。採訪當天，她遇上任職車長八年、曾指導她的慶哥，跟他閒話家常。慶哥力讚阿欣：「佢本身好叻，本來可以過少奶奶生活，（做車長）為理想咋，好嘢！我哋（男車長）都無話特別看待女車長，正常人相處，最緊要傾偈啱嘴型。」昔日的阿欣在女生堆中工作，一下子變成男人堆，她說：「無咩特別，做番自己，之前工作都習慣對人，真係有啲人嫌女司機麻煩，可能去個洗手間耐少少，覺得姐手姐腳，唔夠快手快腳，我覺得做好本份就無嘢。」查看報道，有指九巴司機平均四十七歲， 與一眾「麻甩佬」工作， 阿欣表示可暢所欲言，少了是非小圈子，勝在簡單直接，像個大家庭。
乘客力撐 滿足感高
阿欣工作上遇過不少突發事，見招拆招。「車長背負着使命，最緊要顧及乘客及路面安全，一眼關七，留意乘客動態，例如提醒小朋友、老人家坐咩位，要扣安全帶。我曾經聽過乘客之間對話，話女車長特別細心。又記得有一次有驚無險，有位約七、八歲男生衝燈，我立即煞停架車，小朋友呆咗，好彩無事，有巴士乘客好好，話如果有咩事可以幫手做證，得到乘客信任，好感動。我依家負責揸由元朗去荃灣路線，好多乘客見慣見熟，有次仲請我食老婆餅，由於工作在身，我婉拒，但好warm。」阿欣也遇過「另類」乘客，運用累積的工作經驗拆招，例如疑似不啪卡者，她不會直斥對方或花時間理論，而是客氣地要求該乘客拍多次卡，因八達通五分鐘內不會扣兩次錢；又曾遇上遊客問路，阿欣盡力解答，而在旁等車的乘客「口花花」笑他撩女仔，她當作聽不見。阿欣享受車長工作，為市民服務，很有滿足感。
車長媽媽很叻
車長編更表不時調動，阿欣入職初期，須清晨四點多，到車廠準備駕駛頭班車，問她會吃不消？她說不辛苦，育有一對孩子的她，更說放工回家可以照顧孩子。她現時工作時間由早上九時半至五時，以及七時至十時半，雖然跟子女見面時間不多， 但中段時間會買餸回家煮飯，放工盡量與子女講故事，而車程間的小休，亦會經常致電子女。「小朋友好體諒我，佢哋覺得媽咪做車長好厲害，丈夫仲試過幾次特登帶佢哋坐我班車，睇住我開車，好開心。星期六日好多時要返工，不過每月都會有一、兩個星期六日休假，我會安排家庭日，例如一家人去迪士尼。」阿欣靠巴士司機這門專業，為了子女儲教育基金，讓他們過舒適生活。阿欣希望更多女士打破傳統，為前途，又或追夢追理想都好，能闖出一片天。「以我所見，現時男女車長比例大約是七比三，揸巴士沒有男女之分，女士可以做到！」
後記：女車長何時抬頭？
是次訪問撞正「慌失失女車長」事件，訪問早已約好，照原定進行，當然，公關及受訪者不評論事件。其實，又何懼怕？就此事，筆者覺得大眾焦點落在性別上，標籤了女司機就是「騰雞」，阿欣正好出來反駁及引證，女車長也有實力，也有熱誠。在現時男女皆可當家的年頭，說不定再過三五七年，女車長數量可以媲美男車長，而屆時大眾對於女車長的印象，亦會由負面轉為正評。
投考車長
投考九巴車長人士要擁有私家車駕駛執照三年或以上，駕駛紀錄良好，並且須通過面試、駕駛測試和體格檢驗，再到九巴車長訓練學校受訓。訓練期是十八天，內容包括學習操作巴士、安全駕駛、泊位、夜間行車及顧客服務技巧等等，亦會報考公共巴士駕駛執照。
資料來源：九龍巴士（一九三三）有限公司
撰文：Esther Ngan
攝影：Clay Lam（部分相片由受訪者提供）
