吳雨霏半億愛巢入伙 新居迎金叵羅
日前，Kary陀住8個月巨肚出巡，雖然仲有個多月就生得，但Kary長胎唔肥人，手腳依然纖幼，面部亦冇水腫，認真得天獨厚。
撰文：東方新地｜圖片：新傳媒圖片庫、吳雨霏IG
吳雨霏老公 唔畀老婆操勞
31歲的吳雨霏，兩年前經歷小產傷痛，幸得老公洪立熙扶持走出陰霾，2月Kary宣布造人成功，BB預產期在六月。據好友透露：「Kary近年刻意減少工作，將更多時間留畀家人，Brian做金融雖然好忙，但佢就抽好多時間陪老婆去旅行享受二人世界，上年9月，Kary同老公去完加拿大旅行，返嚟就發現有咗，兩家人都好開心，本來有幾場內地巡迴演唱會要做，但為咗安胎都被迫取消，奶奶雀躍得嚟都好緊張，成日提住個仔要睇住老婆，唔好畀新抱操勞，依家Kary應該要等BB一歲之後先再諗產後復出。」
同奶奶感情好
據知Kary為老公一索得男，洪家上下對迎接金叵羅都非常緊張，奶奶更加搵定頂級產房及陪月，又經常煲靚湯畀新抱仔進補，事事照顧周到。據知情者透露：「Kary同老公兩家人係世交，奶奶可以話係睇住Kary長大，Kary同奶奶感情一向都好好，之前照超聲波，知道係陀男仔之後，老爺奶奶都好開心，始終Brian係長子，屋企第一個孫仔喎！成家人都好興奮，講真Brian不嬲都對Kary好好，知道老婆有咗之後，佢仲爭晒屋企啲家務嚟做，又請假貼身陪實老婆安胎先放心，佢仲睇定育嬰書，學定點湊B，佢真係廿四孝老公！」
半億愛巢送妻
出名是愛妻號的Brian早前更斥資近半億買下渣甸山獨立屋送給愛妻，新居豪裝一年多已經入伙，兩公婆更花盡心思設計BB房。據知情者透露：「Brian好錫Kary，成日都會諗驚喜氹老婆，之前Kary睇到架波子話好鍾意，Brian就偷偷地訂車仲係Kary最鍾意嘅黑色送畀佢，渣甸山呢間愛巢，佢同Kary第一次睇已經好鍾意，Brian即刻扑槌買，間屋裝修咗年幾，佢哋將BB房布置到成個遊樂園咁，話等BB大啲可以多啲地方走動同多啲嘢玩，設計得好有心思！」
仔女一大籮
近年經常做義工同人分享愛的Kary，四月初更加挺住巨肚，陪一班蒙古來港的小朋友去迪士尼玩，原來這次蒙古小朋友遊港之旅，是Kary出錢出力悉心安排。據知情者透露：「Kary之前去咗三次蒙古探訪，佢助養咗當地十幾個小朋友，佢當佢哋好似自己仔女咁，自己有咗之後，佢成日都好掛住班內地小朋友，今次佢出錢請佢哋嚟香港玩幾日，陪班小朋友去咗 好多地方，又帶佢哋去食香港美食，就算大住肚周圍去，佢一啲都唔覺辛苦，反而玩得好開心，其實今次陀B佢陀得算幾舒服同瀟灑，係頭兩個月有少少孕吐，就算就嚟生都冇乜水腫！」
挺巨肚買家品
日前，Kary 就陀住金叵羅出巡，雖然老公唔喺身邊，都派咗朋友陪住Kary出入，唔畀Kary獨自行事。當日Kary去中環睇家品，已經陀B 8個月的她，個肚好有份量，不過本身身形纖瘦，亦得天獨厚長胎唔肥人，手腳仍然纖幼，快做媽咪的她，揀床單質料睇得好仔細，更不停攞起食具研究，明顯為做新手媽咪做足準備。睇了一小時有唔少收穫，友人就幫Kary攞住戰利品送佢去搭的士回家。
另一日，兩公婆恩愛出動，陪Kary安胎的Brian揸車載Kary去香港仔，不過為免老婆操勞，Brian要Kary留在車廂等他，見他從車尾箱攞出一個鞋盒，行上了一座大廈，之後急急落樓再會合老婆，由他負責揸車載老婆一齊返渣甸山寓所。送完老婆返屋企，Brian再一個人行落山徑放狗，搶晒屋企家頭細務做，Brian絕對係超級體貼好老公。
吳雨霏心情大靚 大展零孕味衣著
今日早上，正專心養胎嘅吳雨霏喺IG分享一張近照，並透露而家懷孕心情「心情好 甚麼都好 #星期一不blue #goodvibesonly」相中吳雨霏戴上黑超，仲着上黑色短袖卡通Tee大擺甫士，睇得出作為大肚婆嘅佢除咗型到爆之餘，心情真係相當靚啵！唔知係咪着呢件黑衫遮得好，就算個foucs 容易會放左肚個位置嘅公仔到都好，個肚都唔算話好現形，難怪粉絲見到都要讚吳雨霏索咗兼有型！
吳雨霏大肚身形依然纖瘦
計番依家吳雨霏佗B接近六個月，但睇落佢雙手仲係好幼，口腫面腫現象冇出現之外，面形依然keep得好靚。無論係著住白色定黑色t-shirt嘅吳雨霏，個肚睇落都只係微微隆起，佗B可以佗到咁fit認真羨慕死人～
16年曾經小產
吳雨霏（Kary）在2016年被傳小產，惟新聞爆出後Kary一路冇承認及否認，直至同年11月3日Kary終於在社交網站首度為事件開腔，與老公洪立熙（Brian）發表一篇長文章講述小產經過、發生不幸的事後兩夫婦如何一起走過黑暗的日子，及再期待小生命的降臨！
休養半年 度假散心
其實Kary和Brian兩公婆都好鍾意小朋友，兩人2015年1月在美國註冊，7月意大利行禮，2016年2月成功陀B，但懷胎個多月不幸流產，令一直恨做媽媽的Kary大受打擊，一直停工休息，而Brian亦放下工作陪Kary度假散心。經過大半年休養，Kary終於收拾心情，身體已回復最佳狀態，兩公婆早前趁住假期飛到有蜜月聖地之稱的北海道二世古，再度開行turbo造人！
去完二世古再度蜜月，Kary繼續同老公朝夕相對，又跟老公到跑馬地一間日本餐廳撐枱腳，Kary要調理身體，食清淡的日本菜就最啱。而為生B Kary亦開始谷肥自己，叫到成枱食物，食到唔停口，身型亦唔再得棚骨，有番肉地，做足準備催孕！
食完晚飯離開餐廳去取車，雖然只是一條街之隔，但兩公婆在街頭纏綿，時而十指緊扣，時而攬到實如連體嬰，煙韌到爆！上車前Kary更忽然舞癮起，站在車邊手舞足蹈，氹到Brian即場哈哈大笑，超sweet！祝福Kary生個肥肥白白嘅BB，展開人生新一頁！
