【白色強人】唐詩詠媽媽力撐入行 遺憾未曾向對方表達愛意
撰文：Kammy｜圖片來源：唐詩詠Instagram，Youtube截圖，新傳媒集團圖片庫
《白色強人》中唐詩詠與馬國明演離婚夫妻
唐詩詠在劇中飾演急症室副顧問醫生蘇怡，與馬國明飾演離婚夫妻。其中一幕講到，馬國明有次在結婚紀念日中遲到，令唐詩詠十分不滿，更指責對方只把病人放在第一位，沒有理她的感受。不過，當二人離婚後在同一所醫院工作時，二人依然十分有默契，更默默地支持對方。
媽媽力撐入行
現年38歲的唐詩詠中學時期開始當兼職模特兒，其後因拍攝香港電台製作的青春劇《青春@Y2K》而為人熟悉，繼而入行。唐詩詠曾接受電台訪問時表示，媽媽一直想她參選港姐，隨後即使入行做演員，媽媽都十分滿意，因為媽媽一直都覺得唐詩詠樣貌標緻，很適合在這行發展。
遺憾未曾向母親表達愛意
唐詩詠曾透露，她小時候爸爸長駐內地工作，而媽媽就在港為口奔馳，很小時間陪伴她。直到唐詩詠出來工作，媽媽想花點時間去陪她，與她一起出席各個活動，爭取時間與囡囡見面，可惜唐詩詠當時未懂珍惜，只「覺得佢好煩」。
2009年，唐媽媽因病逝世，唐詩詠就很後悔自己未曾向媽媽表達愛意，可惜沒有機會去彌補，唯有繼續努力工作去完成媽媽的心願：「我知道佢（媽媽）好想我喺呢一行發展，所以我同自己講，呢一行就算點辛苦，我都要繼續做落去。」
首封視后台上灑淚多謝亡母
2017年，唐詩詠憑《不懂撒嬌的女人》首度獲封視后，她當時在台上灑淚多謝已離世的媽媽：「佢上半生獻畀愛情，下半生獻咗畀我。好多謝佢教識我點樣去愛人，點樣去堅持，因為呢兩樣嘢我先可以行到今日。雖然佢（媽媽）已經唔喺度，但的知道佢會睇住，你教過我嘅嘢我會繼續努力做落去。」場面十分感人。
屋企負資產 唐詩詠代還債
唐詩詠的家庭環境不是很富裕，早年更是負資產，當時只靠唐媽媽一人支撐，但到唐詩詠20歲時情況都未有好轉。2009年，對唐詩詠來說可謂是成長的一年，先經歷媽媽離世，碰巧炒燶股票的哥哥被銀行裁員，大嫂生小朋友，加上爸爸退休及做手術，唐詩詠當時要獨力支撐成頭家，唯有硬著頭皮去工作。幸好，現在所有壞的事情已經過去。
被封為「最佳女朋友」、「不能錯過的女友」
唐詩詠被外界形容為「最佳女朋友」、「不能錯過的女友」，原因係佢入行以來戀聞不多，初出道拍港台劇集《Y2K》跟余文樂撻着，但呢段戀情很快結束。之後詩詠同崔建邦（Amigo）在2005年一同主持《K-100》時撻着，可惜男方不時背着女友夜蒲偷食， 以致兩人多次離離合合，分手復合又分手，拖拖拉拉近十年。其實Amigo偷食都唔係咩新鮮事，佢曾經多次食女被斷正，不過詩詠一樣係默默承受。
直至2009年，o靚模鄺敏慧(中巴)報警聲稱被Amigo虐打，惹來全城關注，男方形象跌至谷底。不過最終獲法庭撤銷控罪，只是守行為一年，不留案底。 Amigo負面新聞纏身，詩詠依然多次公開表示信任男友，再寫埋紙力撐！需知女孩子的青春係幾有限，但詩詠都不離不棄，對男方專一的程度已經近乎係麻木， 實在係聞者傷心。最後崔建邦承認有新歡，二人的關係才結束！
洪永城與唐詩詠13年拍劇集《載得有情人》戲假情真，起初大玩地下情，後期才公開戀情。唐詩詠與洪永城拍拖三年於17年分手，當時傳出洗米華愛將盧啟邦追求唐詩詠，令她感覺受委屈而哭了。由於唐分手後屢為前度講好說話，故被網友稱為「絕世好女友」。
體貼之達人
唐詩詠曾被拍到同馬國明、林子善等人一齊食飯，期間詩詠更加剝埋蝦俾馬明，詩詠剝幾多馬明就食幾多，之後仲遞上紙巾，真係好窩心！但原來剝蝦都未夠，詩詠為人為到底，飯後仲載埋馬明返去太古城的住所。難怪事後馬明都大讚︰「佢不嬲都賢淑！」
大家都知道現今「港女」盛行，好似詩詠呢啲咁識照顧人的女友真係好難得，對身邊人一視同仁，又樂於照顧朋友，絕對唔會有異性無人性！詩詠為人咁好， 所以佢在圈中人緣甚佳，唔少同佢合作過的藝人都會成為其好友，好友包括鄭嘉穎、黎耀祥、胡定欣、鍾嘉欣、田蕊妮……下刪N個人。
