唱紅〈功課無間做〉 劉小華：我不是童星！

表演令小華一夜爆紅，他擅長扮嘢、唱歌、跳舞，加上強烈表演慾，可以乘機躋身童星之列，將來大有條件入行。不過表演過後，返到學校也只是一個普通小二學生，校內家長都不知道他表演過。你以為他在網媒爆紅就是紅星，原來社會仍有大部分人不知道劉小華是誰！這樣也好，小華也不想被稱為童星，只想做回自己，希望大家能真正認識他，「其實我真名叫劉皓嵐。」

睇YouTube培養扮嘢天分

皓嵐一家人應邀扮《無間道》，chok樣扮型，一見到劉爸爸「朝偉上身」，筆者就知道皓嵐的扮嘢天分來自哪裏，攝影師都大讚劉爸爸「好正！」有其父必有其子，劉爸爸謙稱並非遺傳自他，可能因為兒子由細到大都喜歡睇YouTube，「我哋俾好多自由佢，總之夜晚佢自己鍾意做咩都得，咁佢就好鍾意開iPad睇YouTube，睇人哋啲嘢，我哋本身又做拍攝呢一行，所以佢接觸到好多關於拍攝方面嘅嘢。」
睇YouTube是後天培養，劉媽媽相信，兒子的先天扮嘢天分及表演慾應出自她，「我小四已經會搵成班同學去表演，『不如跟呢套音樂劇喺學校表演啦！』成班同學都覺得好好玩，我由小四到中學一直主動做呢樣嘢。」她指兒子與自己一樣，皆享受團體表演的樂趣，並非個人主義出風頭，「佢鍾意團隊精神，比較熱鬧，覺得成班人努力做好一件事，係好有power。」

歲半識唱〈Monica〉

一曲〈補充練習無間做〉，除了歌詞精警，皓嵐的演繹亦充滿感情，唱得有板有眼，高音到位，劉媽媽指早於皓嵐歲半時，已驚覺他有音樂底子，行街聽過一次張國榮的〈Monica〉，返屋企竟能哼出來！「我夜晚同佢沖涼，佢喺度哼歌，da da da da dadada……我同老公講隻歌個音咁熟嘅？我老公就估〈Monica〉！即刻開YouTube問佢，皓嵐話係呀係呀！」
喜歡聽rock band的劉媽媽，相信是胎教有功，「我陀住佢嗰陣成日聽live band，當時我細佬讀緊中七，亦有夾band彈結他，試過有次細佬彈bass，個肚跟住節奏踢，彈得愈快佢踢得愈勁，好辛苦呀！」皓嵐出世後大約兩歲多，媽媽開始帶他看band show，在YouTube看Beyond，之後又跟媽媽的朋友學打鼓，培養出音樂節奏感。

《狂舞派》啟發做dancer

經過幾個鐘的拍攝，皓嵐都顯得疲倦，但一講起跳舞，他又回過神來，「我最鍾意跳街舞！」即刻轉身在鏡頭前舞動一輪！劉媽媽笑他兩年多前看過電影《狂舞派》後，就像開竅一樣，「佢睇完對眼直情『叮』一聲！嗰時佢五歲咋，佢問：『媽咪，我想跳呢啲舞，唔係跳幼稚園嗰啲舞呀。』」
後來，皓嵐更拜《狂舞派》的「奶茶」Lydia（劉敬雯）為師學跳街舞，四出表演及比賽，奪過多個獎項。皓嵐現階段的「我的志願」是做一個出色的dancer，視Lydia為目標，「好似佢咁周圍跳舞演出，有戲拍、做舞台劇，做個出色排舞師，教小朋友跳舞，想過一個自由freelance嘅生活。」

80後父母：從挫敗中教導

皓嵐比好多小朋友幸福，活在家教自由的家庭之中，劉爸爸和劉媽媽都是80後父母，媽媽今年剛好30歲，非常年輕，她坦言當時是意外懷孕而組織家庭，二人共識天生天養，粗生粗養。「搵得唔多，咪趁後生捱咗先囉，都幾好吖，佢18歲我先40歲，大家易溝通啲、friend啲。」
這對年輕父母思想開明，深信行行出狀元，放手讓兒子發掘喜歡的事，兒子喜歡打機，就由他打個夠，試過打足一日一夜不理會他，卒之皓嵐先跪低，對媽媽說：「媽咪，我打到想嘔呀！」媽媽遂打開相關新聞，告訴他有人連續打機數天打到猝死，皓嵐親身經歷了過度打機的恐怖後，以後就懂得自我調校時間，這就是劉媽媽的一套育兒之道。

表演後學校沒「照肺」

同一套理念，劉媽媽照應用在學業之上，她並非不在乎學業，而是覺得兒子要經歷過失敗，才會自己行出一條康莊大道。 《毛記》表演過後，皓嵐隨即應付考試，最近成績表出爐，一落千丈。不過，劉媽媽解釋，成績大跌與表演無關，一切是兒子貪玩而起，「我主動搵班主任講，跌唔關表演事，係考試嗰幾日我叫佢溫書，佢話喺學校溫咗好多，佢需要打機放鬆，我就由佢打，俾佢跌一次。」
成績表一出知衰了，皓嵐主動向媽媽「耍冧」，「媽咪，之後考試我唔應該玩太多，我要努力溫一溫習，尤其係數學唔應該咁低分。」皓嵐一向最叻數學和英文科，前者因為計數有成就感；而英文他想將來去外國讀書，覺得西方教育比較適合自己，「佢睇YouTube見到外國學生放學後，可以玩水火箭。」劉媽媽笑道。

TSA少操學校沒「照肺」

正就讀屯門區一間津貼小學二年級的皓嵐，公開大唱「明明我已奮力無間補充喪做，我不玩也為活得好。」他一如其他小學生「補充練習無間做」，TSA都要操，其實皓嵐已經算幸運，做完功課仍有時間打機，TSA練習都是一份分幾次做，不是一日交幾份，劉媽媽覺得功課適量，冇乜投訴。她慶幸學校老師對兒子的表演低調處理，亦沒「照肺」查詢是否功課太多要唱出來；同學仔亦可能年紀尚小，生活基層較少上網，大部分也不知道皓嵐曾表演，即使有同學話見到他上電視，皓嵐亦一笑置之，劉媽媽說：「佢好少喺同學面前提自己嘢，最多講打機、跳舞，小息好有心機教人跳舞，鍾意分享，佢覺得自己同大家一樣係小朋友，自己仲係皓嵐仔啫。」

覺得劉華點？
劉小華對「真．劉華」認識不深，未睇過《無間道》，知道要表演後才多上YouTube學習，並找父母的朋友教路，才扮得似模似樣，問到小華覺得劉德華怎樣？他竟然答⋯⋯
不過，一講起功課和TSA，小華和爸爸都要借《無間道》去控訴一下香港教育制度，「三年又三年，三年又三年，究竟要操到幾時呀？」

●撰文：Ling
●攝影：Clay Lam （部分相片由受訪者提供

※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。