嚴父張兆輝 不捨女兒長大

承傳上一代家教

養育仔女十多年，輝哥謙稱自己育兒心得不多，不過一講又滔滔不絕，「全靠我爸爸媽媽以前教落，我哋六七十年代，小朋友都係百厭唔聽話，個個屋企都比較嚴厲，會灌輸一啲基本規矩俾我哋，到我長大出來社會捱世界，就覺得好彩細個學咗應該要學嘅規矩，如果唔係就會俾人話冇家教。」 到輝哥做人爸爸，也決心做好家教，承傳父母的一套價值觀，灌輸給仔女，「如果唔灌輸俾佢哋就冇嘢學，我將細個學過嘅嘢，或者經歷過嘅嘢，講番俾佢哋聽。當然唔可以好似以前咁嚴厲，但都算嚴㗎喇，小朋友6歲前都要命令式，大個咗就要有商有量。」有些基本規矩，他覺得仔女一定要遵守，不得異議，「例如出去同家人食飯、去飲茶，佢哋可能會覺得悶，但我一定要佢哋跟我去，以前我哋覺得好正啦，唔係成日有茶飲㗎嘛。」

爹哋鬧人好暴躁

輝哥想做一個嚴父，但囡囡卓姿未驚過，還可理性分析父母鬧人之別，「爹哋其實唔係太嚴厲，有朋友個爹哋仲嚴厲。」爹哋還是媽咪嚴些？「我講事實呀，唔好鬧我！爹哋第一次會話『嗱，你下次唔好咁做喇。』第二次就會鬧！媽咪第一次就唔算鬧，但就話你『做乜做唔好呀？下次唔好呀！』講嘢暴躁啲，爹哋就第二次先暴躁。」

被囡囡指暴躁，輝哥立即解畫，「第一次係俾機會你，話俾你聽提醒你，已經比以前唔同㗎喇，以前你爺爺係冇第一二次，一嚟就鬧㗎喇！」多唔多懲罰仔女呀？父女異口同聲：「有罰！佢已經被罰得最少㗎喇，最多打屁股！」卓姿補多句氹番爸爸，「其實爹哋好溫柔嘅，媽咪都係。」

主力拍電影 全為家庭

輝哥眼中永遠的小女孩，已經11歲大，明白爸爸因工作需要少陪伴自己，亦十分理解，「佢做呢份工作，我就知佢會成日遲返，以前細個唔明佢份工作，有次佢出去做咗成日嘢，夜晚我就攬住媽咪，『爹哋幾時返呀？』但佢一走三個月呢，我反而唔會喊喎。」

為了陪伴仔女成長，輝哥在仔女頭十年也堅持留港工作，主力拍電影，拒拍劇集。「太太一個好難照顧晒佢哋，多個人多雙手，拍劇會冇晒私人時間，電影就有，同埋我有自己生意。依家諗番係啱㗎，美好回憶，就係呢十年。」張太感激丈夫的付出，能攜手見證仔女成長片段，「小朋友跟你只係頭12年，12、13歲你想黐都開始冇得黐，所以佢頭十年都冇離開過屋企超過一星期。」

大仔轉校 找到學習目標

父母多數寵愛小女兒，又驚囡囡學壞、蝕底，當正受保護動物，但輝哥對大仔着緊一點，「內心對兩個係一樣，雖然以前我都有幫手湊外甥，但大仔係我第一個小朋友，樣樣嘢都會緊張啲， 照顧多啲。反而到個女，可能我熟手咗，已經跟得冇咁足。好多人話我實錫個女多啲，我成日都同佢哋講，大仔細個時我哋當佢小寶貝，依家大個咗先唔使照顧咁多，就去照顧細女，唔係照顧邊個多啲，我只係覺得對個仔要嚴啲，始終男仔會出來闖世界，將來要養家庭，照顧唔到老婆，邊個肯同你過世。」

大仔Edison已經15歲大，除了昂藏六尺的身形，思想亦早熟，早於高小階段發覺自己不適合主流學校，主動提出轉校至啟思中學，校風自由國際化，成績大躍進，更及早為自己將來打算，自己搜集所有英國留學資訊，更成功考入當地中學，成績斐然。「佢中二已經想去英國，我話你攞唔到好成績，冇學校會收你，咁佢自己要求轉校，即刻攞到好成績話要去英國，我話成績表先啱啱出，你都要俾啲時間我，後來我搵咗三間排名幾好嘅學校，我話你考到就俾你去，又俾佢考到。」張太說。

赴英求學 立志做機師

Edison立志做一名飛機師，正朝着目標努力進發，大部分科目奪A，尤其對數學、地理及歷史有興趣，輝哥會盡力幫他完成夢想。「佢有抱負，而我又有能力，一定會盡力幫佢完成，我哋以前就冇辦法啫，佢有呢個諗法我都估唔到。」

正值少年1516時，在英國又無王管，好易行差踏錯，輝哥不反對兒子拍拖，早已開放溝通，「我哋都成日問佢有冇女朋友，有就帶番嚟俾我哋睇吓，媽咪最叻㗎啦，成日都話幫佢了解吓邊啲女仔好，邊啲唔好。」張太即笑說：「最緊要唔好上床，唔好錫嘴，唔好拖手。」阿女驚訝道：「唔係呀話？」張太強調男孩子最重要負責任，以免影響女孩一生，害己害人，「未ready就唔好做，每樣嘢都要有計劃。」

怕父母發癲 囡囡留港讀書

卓姿未打算太快步哥哥後塵，仍然享受在港讀書生活，現就讀培僑書院小六的她，最開心在校內認識到知心好友，「有次我拗親隻腳，影咗相上Instagram，有個朋友留言問候我，返到學校又陪我行，我哋三年班識，佢一直都好關心我，成日WhatsApp我傾偈，最近我生日佢嚟唔到，寫咗封信俾我，祝我有個美好嘅11歲經歷，仲送咗隻最新Maroon 5唱片俾我，佢都好鍾意㗎！」

除了不捨得好同學，卓姿更不忍心留低父母掛念自己，決定直到大學才考慮外國讀書，「有次媽咪問我想唔想過去讀書呀，我話怕爹哋唔捨得我，媽咪話咁又係呀，阿哥都走咗，如果你都走埋，我哋兩個咪發癲？咁咪唔好太早去囉，依家先六年班，唔使諗得咁長遠嘅。」
輝哥已經做定心理準備，隨時護送女兒離開，不捨之情，單是想一想已經眼濕濕，「個女前半生幸福係爹哋，下半生就靠佢自己搵喇。」

細數父女情
兩父女鮮有一齊公開露面，今次面對鏡頭來個真情對話，輝哥平日做戲有型有款，返到家中對着女兒卓姿就一副冧樣，片段中卓姿大爆爹哋鮮為人知的趣事，並分享父母的愛情故事，見到輝哥望着囡囡個樣，簡直sweet到眼濕濕。

●撰文：Ling
●攝影：黃大立（部分相片由受訪者提供）
●化妝：Alfred Tsang@Amen production
●髮型：Vani Cheung@Amen production
●服裝：Say Cheese Kidswear
●場地：HOWE Furniture & Cafe（tel: 3689 0085）
※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。