垃圾堆中轉 舊物載新事

Profile
馮永權（Wing）
經歷：曾任職廣告公司、電影製片、家具設計公司、裙褂店等各行業，其後搜羅古物並變賣，開設二手古物生意，漸漸對收藏古物着迷，更因而成為保育義工，現時開設古物店「垃圾場」，笑稱自己是「垃圾佬」。

隱世博物館藏工廈

嘩一聲，瞪大雙眼！這是許多人走入古物店「垃圾場」的反應。觀塘某工廈一整層五千多平方呎，全堆滿了林林總總古物，映入眼簾有七十年代香港製造時鐘、日本古董風扇、木箱唱機、舊式鐵鑄收銀機、美國製機關煙灰缸、口紅紙等等，亦有見牛奶妹、小飛俠、日本藥商吉祥物橙色象模型等玩意，再看，更會發現連電影院櫈、教堂長椅、鯉魚石雕等龐然大物也有，而有許多物品更是猜不出它是甚麼玩意與來頭。種類多元，電器、燈飾、時鐘、玩具、木製品、紙本類、玻璃製品甚麼都有，亂中有序放在倉內，目測有上萬件「垃圾」，叫人大開眼界。物主馮永權（Wing）收藏珍品不為炒賣賺錢，為的是滿足欲望，追求新鮮感。

充滿個性垃圾佬

「我要做人哋唔做嘅事！」束着長髮的Wing自小有一股牛勁，有少爺仔不做，十幾歲時寧願做洋服學徒，也不願繼承家族裙褂生意。「我好細個已經離開屋企，幾反叛，洋服學徒可以留宿就走去做，又做過餐廳，街坊見到話俾阿爸知，佢捉我返去。我有五兄弟，家族有四間舖，阿哥阿媽問我要唔要一間？我即刻答唔要，我都無見過外面世界。可能同我個性有關，要時刻追求刺激，有挑戰。」自此，他開始把握機會，不讓自己停滯下來，涉獵各行各業，追求新事。說到這裏，讀者或會問，「追新事」跟「儲舊物」好矛盾。Wing隨手拿起旁邊一個圓球物體，一按機關就打開，如花朵散開多片花瓣。「你唔知咩嚟？呢個係美國製煙灰缸，可以插一支支煙仔上去。呢啲舊嘢成日有驚喜。」明白，罕有舊物有很多新奇之處，研究它的用法、歷史、故事與價值，足以填補Wing的求知慾。

不為糊口工作

未成為收藏家前，Wing從事各式風馬牛不相及的行業。芸芸行業中，他待得最久是電影製片。初時在廣告公司膽粗粗跟着難頂阿頭，其後上司邀請阿Wing拍住上，幫忙創立公司，由二人一腳踢，發展至Wing變成管理層，管理十個八個下屬，然而，去到某一刻，他有感：「人工少、無假放、無得返屋企都唔緊要，係無嘢俾我學，無嘢可以再滿足到我，我就離開公司，俾啲細嘅上位。之後做過好多工種，收音、燈光、攝影、負責安排特技等等，去到電影最蓬勃最高位，即係仲有幾千萬票房時候，我選擇退落嚟，因為眼見電影不求進步，見到同行態度，覺得係呢行嘅恥，我已經無咗投入感，開工等收工。」Wing決定殺身成仁而轉行，不知不覺踏上「收賣佬」之路。

無所事事搜羅舊物

一下子停下來，Wing當然不習慣，他自找一些「搞作」，周圍行鴨寮街、摩羅街。「買吓幾蚊相機，執執吓一大堆，當時無點諗過，買嚟儲，等之後值錢賣出去。」以小博大的算盤暫時未打得響，Wing就先「執條褲頭帶累身家」，為了知道幾蚊貨仔是何方神聖，走去花百幾元購買專書研究，也不是全然沒收穫，他慢慢自學變成古物專家。儲稀奇古物變成興趣，珍品多得放在屋企人店舖。當刻，Wing沒有全心投入買賣古物事業，先後幫忙家族裙褂生意，又從事廚具設計公司推銷，以及閒時到泰國入貨，於周末在南丫島擺賣。「我唔怕無咗份工，我好有伎倆去生活，見我從事唔同行業就知，加上我從來唔擔心錢，只要用心工作，機會好多。我住喺南丫島，每日搵到四、五千，但我發覺我無講嘢好耐，仲開始怕走入城市、怕人群……」Wing自覺又是轉變找新鮮感的時候，其後，將一直以來儲古物的興趣，落力化之為全職事業，將三個倉的古物，搬到五千平方呎的觀塘工廈內，並由自己打理。

揀客做生意

由於職場上儲備的歷練與眼界，令Wing有看破舊物價值的本事，到海外旅行逛跳蚤市場、古物店已經是必定行程，在香港，他說處處是寶。「我無咩定義咩叫『寶』，只要滿足我好奇心，最好量少罕有、完美上品，人哋無我有就好，中國五千幾年歷史，大把筍嘢舊物。我有次同朋友食飯，行行吓就見到成箱燭台，嗰啲天光墟賣嘅嘢就真係『垃圾』，反而好似觀塘垃圾站或密斗經常有寶執，舊式寫字樓翻新裝修好多嘢掉。」

近年興懷舊，不少餐廳及小店負責人找懷舊物裝飾店舖及櫥窗，Wing充當顧問給意見。另有一些疑似炒賣者上門，他則不歡迎。「有期流行Made in Hong Kong『港彩』手繪瓷器，有人話嚟搵嘢收藏，我叫佢唔好買：『你都唔識，賣返去得個擺字。』佢唔死心再問，我就話：『送俾你，你唔好再睇其他嘢，你唔係我個客，送俾你即係送走你。』玩呢啲返唔到轉頭，儲多又俾屋企人話，甚至掉走。」Wing不想將寶物交予不當人手中，化之為垃圾。

使命在身 發掘歷史

Wing樂意與志同道合分享，早年，他誤打誤撞成為保育義工，借出舊物及聯絡舊師傅，推廣灣仔藍屋的保育，好玩之餘，又可以令更多人認識式微的本港手工業。此外，曾從事電影行業的他歡迎拍片年輕人、電影系學生來借道具，望這班年青人得到更多機會與提攜，為電影界注入新動力，不要像昔日的他失望地退下來。
Wing另謀計劃，望揭示歷史真相。「我啲嘢九成九都賣，係唯獨我儲緊有關中日戰爭物品屬非賣品，希望可以展覽用。有次去日本逛買四仔鹹帶書四層樓舖頭，有層賣古靈精怪嘢，我發現好多有關第二次世界大戰洗腦式宣傳刊物，入晒膠袋無得睇內頁，先買十本睇，發現正呀！好多罪證，之後揀咗大半日，買咗七、八十本返嚟。我又有一大卷軸印有『支那半島』地圖……」Wing分享着他的大計。可見「垃圾場」絕非堆滿廢物，反之是「百寶盒」，滿載了夢想與寶藏。

後記：垃圾佬的簡約生活
倉舖可叫「垃圾 場」，又或「簡約生活」，筆者問Wing寫哪一個較合適，他表示沒所謂。我覺得前者較合適，因為他自嘲是垃圾佬，垃圾 佬當然配垃圾場，夠搞鬼，反諷味道十足。加上，看過他一堆千奇百趣的藏品，又怎能配「簡約」呢？不過，原來簡約生活是反映其生活態度：做人隨心、樂得自在。好吧！綜合在一起，叫「垃圾 佬的簡約生活」。

●撰文：Esther Ngan
●攝影：溫俊鏘（部分相片由受訪者提供）
※如欲率先接收資訊，請讚好我們的FB專頁並於「已讚好/Liked」選單設定「搶先看/See First」，多謝支持。