大肚漫畫家馬仔 半人獸家長

馬仔漫畫系列已面世七年，驚馬仔無新話題？粉絲唔使驚！馬仔宣布懷有第二胎B仔，湊成一個「好」字，預產期8月初。馬仔笑言美美子開始大個，會介意畫她的醜態，現在有新目標任畫，保證陸續放送超「好」笑的湊B之道。

想結識怪獸家長

出過三本《湊B之道》後，去年出版《低能旅行2》，講一家人旅行趣事，今年回歸講湊B，但書名改做《癲在低能起跑線》，皆因上年馬仔為美美子考小學、報興趣班費盡心力，「依家個個都講起跑線，每個家長都要經歷，所以就出本專講讀書考試嘅緊張心情。」

可能馬仔身邊的家長比較正常，對於未能認識「杜鵑」般的怪獸家長感到失望，「我成日想識啲怪獸家長但識唔到，身邊啲人唔夠怪獸。」她覺得自己未算怪獸，僅屬「半人半獸」，對個女好緊張但未算迫得太緊，「好似佢學業上，覺得學得唔夠快就好緊張，但其實老師話佢學得OK。」比起怪獸家長，安排興趣班上馬仔仍是「正常人」，只安排美美子上畫畫、游水、戲劇及中文班，「全部都係佢鍾意上，佢仲有時間去公園玩，有充足睡眠。」上興趣班也是馬仔最喜歡的情節，「其實上咁多興趣班有咩用途呢？我最想探究呢啲。」

經過一番奔波，面試過幾間學校後，美美子最終能原校升上小一， 九月正式成為小一生，馬仔終於鬆一口氣，「原校小一都要再面試，只有大約三分一學生升到，老師覺得佢整體表現OK，加上當日表現唔錯，就收番佢。」

阿女睇漫畫 鍾意睇朋友

得到媽媽的優良遺傳，美美子長得高高瘦瘦，亦特別喜歡畫畫，好鍾意打開媽媽的漫畫書畫自己，最近更開始反畫媽媽，要媽媽坐定定讓她畫人像，馬仔笑言不敢在女兒面前評論其畫技，只敢說： 「我覺得佢特別有興趣！」
因畫過好多女兒的扭計醜態，馬仔講過不讓女兒睇她的漫畫，不過想阻也阻不了，「佢開始識字喇，最近開始拎嚟睇，見到畫佢得意嘢會好開心！」問美美子最喜歡睇書中哪個，竟然不是家人，「我鍾意睇欣欣！睇我同欣欣鬧交！」欣欣是她的朋友仔，即書中角色卡樂B，馬仔疑惑：「我有畫過你哋鬧交咩？哈哈！你淨係睇欣欣咋？你唔睇其他嘢㗎？」美美子才笑說：「仲有你囉！你囉！」

唔俾媽媽畫自己扭計

美美子少看正經書，多看「低能」漫畫，但開始對媽媽畫自己的醜態有意見，「佢唔想我畫佢扭計，點解要畫我喊？點解又講俾人聽？」馬仔今次新作照畫個女扭計，但事前有徵求她的意見，「好似今次訪問都有問過佢，你肯影我先應承人。」
畫阿女要經審查，無得自由發揮，不過馬仔好快又有新題材，下月細佬將會出世，當然馬仔生多個並非為畫畫，「阿女3歲我已經想要第二個，我想佢有兄弟姊妹，大個咗就知個好處，第日父母老咗佢都唔會覺得寂寞。」
明顯肚凸凸後，馬仔正式告訴美美子將為人家姐！馬仔得悉是男仔既感興奮，又感心慌，「男仔比女仔難湊好多，冇咁聽話，預咗佢會周圍跑，愈話佢愈唔聽你講，我真係唔太識湊。」

患朱古力瘤難懷孕

等待六年才生第二個，比她原定計劃遲了三年，因她患有朱古力瘤，即經血積聚而成的血瘤，不易生育，經無數次嘗試才成功懷孕，吊詭的是，懷孕亦是紓緩朱古力瘤方法之一。「陀BB時會停經10個月，就有時間俾個瘤復元。」
馬仔謂今胎陀得好舒服，食得瞓得，食飽就瞓，「我食得仲多過上次陀女嗰陣，乜都想食，勁為食！不過可能年紀大咗，個人好易眼瞓，生活好似豬咁。」她的預產期為8月初，已懷孕九個月，剛剛才出版新書，頂着巨肚要缺席今年書展簽名會。今年是她第二次邊陀B邊趕書，生理上雖沒問題，但要照顧女兒，比上次疲累得多。「我企20分鐘就要坐，加上夏天生仔好熱呀，上次係冬天舒服啲。」

暑假生仔困獸鬥

今個暑假馬仔沒有活動，專心生仔，生完再坐月，剛好完成暑假，阿女的暑期活動靠晒家人和鄰居，「暑假我哋困獸鬥，佢每日有一個鐘暑期班，其他時間都唔知做咩好，我成個暑假冇得郁，老公又要返工，帶唔到佢出去玩喇，鄰居有小朋友同佢差唔多大，佢哋可以互相上大家屋企玩啦，或者鄰居媽咪帶佢哋去公園玩。」
今次的「暑假困獸鬥」陀B經歷，馬仔可以考慮做下年新書題材，講起細仔的角色名，大女叫美美子，寓意做美女，那細仔可叫型子？「可能叫型仔、小圓形，哈哈哈！其實第一胎時講笑話，男就叫圓形，女就叫圓美，咁就會係型仔老竇同美女阿媽！等個仔出咗嚟睇吓有咩靈感！」

女兒展畫功

眾所周知馬仔畫畫叻，女兒美美子都得到真傳愛上畫畫，最近更喜歡翻閱媽媽的漫畫跟風，片段中美美子將一展訓練成果，一家人互相畫對方，美美子畫馬仔，小圓山畫美美子，馬仔畫小圓山，究竟美美子畫中的媽媽有咩意思？即刻去片聽佢點講！

●撰文：Ling
●攝影：溫俊鏘
●化妝︰Kings@KINGS MAKEUP
●髮型︰Wilson Wong@KINGS MAKEUP
●場地︰愛畫室Aura Art（tel：2886 2359）
●鳴謝︰天地圖書

參考資料：衛生處網頁