大肚蔣祖曼 做個好繼母

蔣祖曼15歲憑港台劇集《Y2K+01》入行， 拍過逾20部獨立電影，包括《蝴蝶》、《酒徒》，作品曾參與威尼斯、東京及釜山等國際電影節，贏得「獨立電影女皇」稱號。喜歡作新嘗試的她轉戰舞台劇，再加盟港視拍劇，一齣《警界線》開始廣為人知。

為繼子追個妹妹

《警界線》一人分飾Madam Fong及殺手Pandora，另一劇集《大眾情性》的谷采怡，患上性障礙卻開設性玩具店，兩劇都成功引起網民話題。拍畢兩劇後，Joman與電影幕後老公陳卓麒（Keith ）展開造人大計，試了兩個月就bingo！「一直想要個女，因為先生本身有個仔，一仔一女就啱啱好，可以收工！」Joman想為陳家添個小朋友，最大原因是繼子Day想有細佬妹，「計劃生育前我第一個問佢想唔想要細佬妹先，佢話想呀，我問如果我真係唔生小朋友，你會點呀？佢話『我會嬲你囉，依家就嬲！』」Day自
細就恨有細佬妹，最好是妹妹，前年爸爸與Joman結婚，他更以為一結婚就自動大肚，令她哭笑不得，「佢以為會單性繁殖！」

三人行睇超聲波

得知繼母懷孕後，Day非常興奮，經常摸摸肚子，連睇超聲波都是三人行，希望第一個得知BB性別，「照超聲波我同先生帶埋佢去，佢仲緊張過爸爸，係咁捽手問醫生仔定女，醫生話係女，但佢都質疑：『依家話係女啫，出咗世可能變咗仔㗎！』」
好多父母都驚哥哥會呷細佬妹醋，現階段要做好輔導，這方面Joman好放心，因為Day太喜歡妹妹，但出現了另一煩惱，「我問佢想做一個點樣嘅哥哥，佢話一定會縱壞妹妹，叫我千祈唔好俾佢湊㖭呀！講嘢幾老積呀！」Joman相信他只是隨口說說，他應該是一個嚴厲的哥哥，「佢應該管教得嚴過我哋，因為佢幾鍾意管人，我驚佢嚴得滯㖭！佢獨子咗好多年，都有獨子嘅通病，比較自我中心，成日認為自己諗法先係真理。」

21歲做繼母

Joman首次懷孕，以為她是新手媽媽，對餵奶換片一竅不通，原來她自Day一歲多就當上繼母，視如己出，但相隔多年，所有育兒知識要重新學起。「佢出世幾個月我就識佢，真正湊佢係一歲幾開始到依家，我初初以為自己好有經驗，但依家深入研究番，當時好多嘢做錯咗，好似尿片掉轉着，好多家長又話歲幾應該要識啲咩，要俾佢做啲咩，我都冇做到，但阿仔依家都冇乜嘢。我算係比較舊式父母，小朋友開心，天生天養都OK。反而係阿仔拎住本育兒書，同我講『媽咪，你依家要游水，你冇游水！』佢仲自己學埋做大肚婆運動，叫我跟住做！」

21歲開始與老公拍拖結婚至今，一直都是三人行，早已習慣沒有二人世界，「細個嗰陣發脾氣會咁諗，你話從來冇介意過，當然冇可能！尤其是教仔教到好勞氣，但我咁諗，小朋友何嘗唔係咁諗呢，你又唔係我阿媽，你管我做乜啫？但阿仔冇，我哋好夾佢仲好錫我，所以我同先生啱啱拍拖都冇考慮咁多，我一早知佢有小朋友，可能當時冇諗咁長遠，咁多年一路走過來都習慣咗，我愛佢，我愛埋佢小朋友都好正常。」

罵仔唔認阿媽

最令她難受是小朋友剛懂事的年齡，回想起都有點眼濕濕，「我一向冇縱佢，曳我會罰，乖就會獎。幼稚園有段時間幾反叛，佢話：『你鬧我嗰時，我覺得你唔係我阿媽，你錫我先覺。』我即刻入廚房狂喊！」

親生媽媽早已過身，Day不了解母親的角色是怎樣，Joman感慨道：「其實我都明嘅，佢唔係好知道究竟一個媽咪係點，佢只係睇電視認識，卡通片啲媽咪唔鬧人架嘛。有次佢問我朋友，如果你媽咪叫你做功課，你會唔會覺得佢好煩？我朋友話梗係會啦。嗰一刻我就知道，原來佢以為我鬧佢係唔錫佢，唔知道我係出於關心，依家大個咗佢就明白喇。我份人好直，有咩都講晒出.，佢都好明白我諗乜，所以相處得好好。」

教院小學重閱讀

轉眼間Day已八歲大個仔，就讀香港教育學院賽馬會小學二年級，雖然該校是津貼小學，但有別於與傳統填鴨式，Joman喜歡其綠色校舍，舒服開揚，更重要是活動教學，令兒子返學好開心。「阿仔本身比較好動、坐唔定，幼稚園揀咗國際學校，但太free，小學唔想再揀國際學校，就物色咗呢間功課較少，活動夠多嘅學校，最認同學校以閱讀為先，培養所有同學都鍾意睇書，佢細個我已經有講故事佢聽，佢都好鍾意，所以佢依家都鍾意揀故事書同小說睇，咩書我都俾佢睇，漫畫、老夫子都得，我覺得咩都應該吸收吓。」
Joman希望妹妹將來能就讀同一辦學團體的香港教育學院滙豐幼兒發展中心（幼稚園部），不過Joman覺得湊小朋友並非你想點就點，一切仍要看其意願，自己選擇道路，「以前我覺得小朋友開心就得，其他嘢唔緊要嘅，但上到小學，原來唔係開心就得，佢依家有個口頭禪，每晚都講我今日乜乜乜好開心，乜乜乜唔開心，我就話你唔諗就最開心，太計較係唔會開心，我就知道原來佢想點樣，唔輪到我話事，條路要佢自己行，我只有盡力支持佢。」

十貓兩狗兩小孩

Joman屋企好快變成四口之家，不是……應是十六口！她總共養了十隻貓、兩隻狗，還有烏龜和魚，就像一個動物園。「其實屋企有寵物，對小朋友抵抗力會高啲，同埋俾佢哋熟習動物脾性，相處會好啲。」好多人都話懷孕不應養貓狗，Joman媽媽也不例外，懷孕前已屢勸她放棄，Joman說：「佢成日叫我送啲俾人，我做唔出，我當正佢哋係自己仔女，一隻都不能少。我寧願自己抽血驗弓形蟲，驗咗冇事，只要做好清潔就冇大問題。」
Day與貓狗也身處一屋多年，至今相安無事，抵抗力強病痛少，Joman更堅信小朋友與寵物能相親相愛。「阿仔細個會扯啲狗尾巴，又用公仔掟佢哋，佢冇心傷害，只係出於好奇心睇貓狗反應，嗰時開始我就教佢唔可以咁做，依家佢哋相處得好好，阿仔好錫佢哋，坐喺度都攬住隻貓講嘢。」Joman教路最重要做好清潔及教育，養多幾隻貓狗都不成問題，更可分配少許工作給仔女，例如幫手餵食，培養其責任感，這樣小孩與毛孩都能融洽相處。

撰文：Ling
攝影：黃大立（ 部分相片由受訪者提供）
場地： Cozy Photo Hub(tel: 2336 3619)