孕媽迷思 瑪麗醫院催生記
仲好記得當時生小JM係完全「零止痛」，
無用無痛妢勉、無聞笑氣、無止痛藥既情況下就催生。
催生，係因為我前一晚半夜已經穿水見紅，
而未有大陣痛，所以醫生提議催生，
但最後決定權當然係我手上啦。
孕媽迷思 瑪麗醫院催生記
因為當時係第一胎，完全對「催生」無認知，
所以就問左姑娘「催生」既好、壞之處。
經姑娘講解及自我掙扎一番後，我決定選擇催生。
咩係「催生」？
其實係指以藥物刺激子宮收縮，加快陣痛及子宮張開程度以便生產，
催生同樣亦屬於自然分娩。
但如果媽媽唔夠氣力生的話，
醫生或助產士有機會需要以真空吸引器協助媽媽生產並取出小B架啦。
其實孕媽媽有無需要催生，除左要睇媽媽本身之外仲好睇小B架。
如果小B「過期居留」既話，媽媽就必須見醫生以進行評估，
睇下要幾時催生及評估孕媽適唔適合催生。
咩情況下要「催生」？
普遍來講，如果孕媽媽遇到以下幾類情況既話就有機會需要「催生」架啦。
1.）小B「逾期居留」
即係話小B過左預產日期，但仍然未有動靜生產
呢個時候媽媽就要小心留意，並且要搵醫生做檢查，
睇下小B係肚入面既情況，並且安排催生日子，以準備入院待產。
2.）穿羊水或見紅
穿羊水後其實媽媽可以選擇自然分娩或以藥物幫助加快刺激子宮張開以準備生產。
媽媽若選擇以自行分娩方式生產的話，醫生或助產使幾不會使用催生藥物，
但假若於穿羊水後24小時內仍未有陣痛或子宮仍沒張開的話，就需要使用藥物幫助啦。
因為若時間過長的話就會有機會導致感染絨毛羊膜炎。
3.）小B情況有變，需要提早生產
如胎兒已超過38週卻不幸遇上突發問題的話，亦會使用藥物來幫助生產
小JM媽待產歷程：
因為小JM媽係半夜點零鐘去廁所既時候發現見紅，
而當時亦因為身體持續發燒所以直接去左醫院待產。
但因為半夜既關係，瑪麗醫院係無醫生係度，
所以檢查唔到係咪已經穿水定只係見紅。
但就會有姑娘來幫手檢查及用儀器去睇住小B心跳。
檢查左一切正常先會俾你落床架！
當時出到待產房門外已經見到有幾位爸爸好心急咁等緊，
小JM爸都係其中一位，
但因為我有排都未作動，
所以我見小JM爸攰都叫左佢返屋企休息先再返工。
我應承醫生檢查完就會話佢知，叫佢唔駛擔心。
幾經等待，終於到左天光，
姑娘都已經幫我量好血壓同探熱，
之後就係等醫生做「開拑」檢查！
＊ 姑娘口中既「開拑」檢查係指用鴨咀拑放入陰道檢查，以察看有無穿水或其他問題既。
檢查後發現原來真係穿左羊水啦，
所以醫生建議我催生，
但因為當時心情真係好緊張，
所以就同醫生講想同老公商量一下。
如是者，經過姑娘既解釋及同老公商量之後我就決定左催生。
決定左催生之後，姑娘就幫我係手度準備種痘，用來落催生藥。
打完催生落就可以直接入去產房，準備待產。
而老公亦都可以係產房陪伴。
（又到左為母則強既時間，要打針對我來講其實係難事，因為我真係好怕打針架！）
打完第一次藥之後就隔四個鐘左右會再檢查，
助產士會檢查子宮頸開到幾度而決定駛唔駛再加藥。
而好慶幸地，小JM媽我遇到個好好既助產士，
知道我前一晚入院訓得唔好，幫我打完第一劑藥後仲好細心咁幫我較暗燈光，
提示我爭取時間休息添！
係小JM爸陪伴下，聽住音樂同係柔和燈光加海景View之下，
結果我同爸爸都恰左一陣，直到下一轉檢查先醒。
而最後當然產程好順利，小JM亦好合作好快手又小心翼翼地出來，
所以小JM媽我真係好好彩，係唔駛用任何止痛之下生產，
我都不得不佩服自己既勇氣。
（但坦白講，我真係痛到連笑氣都懶得拎想快啲生完就真！）
因為助產士手勢好好，會陰只係輕微擦損而已 ，唔駛剪會陰已經係萬幸啦。
