【好孝順！】張衛健陪媽媽捉棋鋪鋪輸 背後原因被網民大讚！
廣告
早前憑劇集《大帥哥》而人氣再度急升嘅張衛健，其精湛演技深受觀眾喜愛。現實中，「大帥哥」張衛健係公認嘅「愛妻號」，非常愛錫太太張茜，但除此之外，其實佢都係一個圈中出名嘅孝順仔。呢日，佢就上載咗兩張同媽媽捉棋嘅相到社交平台，相中佢好有耐性咁等媽媽捉棋，唔少網民都大讚佢好孝順好乖仔！
撰文：Kammy | 圖片來源：微博
珍惜與家人時間
「大帥哥」張衛健係一個重情義嘅人，佢一向都非常愛護家人。眾所周知，張衞健十分疼錫老婆張茜，但其實佢都好愛錫八旬母親。呢日，張衛健就上載兩張同媽媽玩波子棋嘅相片，相中媽媽好專注咁捉棋，而佢就耐心地等媽咪慢慢諗，佢仲話同媽媽捉棋次次都輸！
不過，其實張衛健一啲都唔介意輸贏，因為捉棋可以鍛鍊媽媽腦筋，亦都可以多陪老人家，佢喺社文網站留言指，「陪我媽下棋，十局有十局都是我輸的，因為她老人家的步法是亂走的，不過重點是想她多動動腦筋。這就是大帥哥背後的簡單生活。」唔少網民見到呢個情境，都大讚張衛健十分孝順同好乖仔，仲展現出鐵漢柔情嘅一面！
陪伴是最重要
除此之外，孝順仔張衛健早前帶媽媽到花卉巿場買花，返到家仲陪她插花，更留言指：「我認為對於老人，我們的陪伴是最重要的。」自13年媽媽游水遇溺危殆，身體機能一直下滑，張衛健比已前更珍惜同媽媽相處嘅時光，平日佢一有時間，都會陪媽媽做佢喜歡嘅事，如游泳、食飯等。
