孩子之間爭執 是令社交能力增快的燃料

撰文：Slow walk ｜圖片：Slow walk、新傳媒資料庫

幾個家庭去旅行 5天教會我的事

今個星期，我同其他兩個家庭、5個小朋友一齊去咗日本玩！我完完全全明白咩係終極大佬，「沒有最攰，只有更攰」返咗香港幾日仲未回魂，不過唸返成個旅程，我覺得幾個家庭去旅行令我眼界大開，不但只啲細路一夜長大，大人如是！

孩子之間爭執 令社交能力增快嘅燃料

成日聽到啲人教要equip細路嘅「social skills」（社交能力），我認同有啲野我地必須刻意去教，但教幾多都唔及你同佢去實戰！平時返學應該係小朋友同人有最多互動嘅時候，奈何你只能靠仔女口述或者老師偶然匯報，睇到幾多？

今次我地去咗5日，我對仔女同表哥表姐表妹大部分都年齡相若，而且平時都多見，唸住今次係歡樂友愛團，其實情況就無咁差嘅，不過每日有幾十個小爭執傾到你頭都暈

延伸閱讀：媽媽減壓的3個小錦囊

延伸閱讀：唔好以為媽媽好揮霍

• 有㗎BB車，呢個坐低第二個又唔開心
• 兩個小朋友成日同盟，咁另一個就唔開心被排斥
• 去扭蛋有人扭得多，扭得少嘅又唔開心
• 見咩都要爭第一個做/玩
• 小朋友最興講：「我唔同你做朋友！」之後其他小朋友嬲
• 有小朋友曳比人訓話，其他小朋友做「㗎兩」
• 下刪N件小事⋯⋯

望住佢地透過呢啲小爭執，不斷去認知自己同身邊人，佢未必講到比你知佢明白咗嘅野，但你見到佢地嘅相處一日比一日好，又或者佢地會講返大人教佢地嘅說話出黎，呢個就係成長！

無論幾多嗌交，佢地都會同對方講對唔住，仍然想同對方拖手，咩都要一齊！將佢地放埋一齊，煩惱多多，但亦令佢地不再自我中心。

延伸閱讀：話放就放？對於孩子的成長，我們瀟灑不了

孩子與其他人互動 反映我平日點對佢

我個仔比較斯文，扭計/出手打人/大哭大鬧都未試過，但係旅行度，我發現當表哥表姐有野令佢唔開心，佢就會講：「你再係咁我就唔同你做朋友」或者「你再係咁我就話比你媽媽知」等等。

雖然佢無做啲咩，但說話入面都帶有要脅同攻擊，身邊人聽完更加反感。除咗幫手調停之外，我係度唸究竟阿囝點解要成日講啲咁討厭嘅說話呢？係旅程差唔多完結時，我終於唸到！

其實，佢講野嘅模式、語氣，咪就係平時我好嬲佢嘅時候講嘅野囉！我都係會同佢講：「如果你再係咁，我就xxxxxxxxxxxxx!」大多數時候阿囝都會驚而就範，我一直無為意我嘅反應對佢帶來嘅影響。

感恩今次從佢同其他小朋友嘅衝突，明白身為父母慎言立品嘅重要性，心入面都幾內疚，於是我即刻分享比先生聽，由返香港到而家，我再無用呢個「tone」同威脅性嘅說話剌激佢，希望持之以恆，做個身教好榜樣。

看到其他家庭 你明白人人都辛苦

我覺得幾個家庭去旅行，最令我感恩係大家會明白大家嘅辛苦。

你成日見人地啲細路呢樣好個樣好，當一齊去旅行，你就明白就算個細路有幾好，人地父母都總有佢困難嘅地方，「家家有本難唸的經」：有人辛苦係管教、有人婚姻係個壓力位、有家庭係財政負擔大；

況且，幾日相處， 你就會知幾乖巧嘅細路始終都係細路，都係要教要學好多野，大家其實係坐埋一條船，齊齊學做父母。

除咗感恩，我覺得大家一齊輪流頂住啲金霸王細路（即係放極電都未放完），夜晚等d細路瞓曬就食宵夜，仲有最重要：當你唔開心緊去日本竟然無時間去「shopping」嘅時候，你發現其他媽媽都同你一樣，你就覺得無咁慘，舒服好多，哈哈！

話就話辛苦團，但我地已經約咗下次去澳洲玩！父母們應該明白：辛苦，不過值得！

大家，快組織幾個家庭一齊打大大佬！不過，要搵一啲神隊友，即係佢地唔會對你教仔評頭品足，家庭與家庭之間可以互相尊重同包客，咁就perfecto！