過咗40周見紅BB未肯出世 張嘉兒回家淡定煲劇
廣告
現年35歲嘅香港小姐冠軍張嘉兒，第二胎預產期為5月初，不過BB非常百厭，過咗40周都依然未肯出嚟見爸爸媽媽。日前張嘉兒見紅，以為BB要出世，點知醫生話唔使催生，仲叫張嘉兒返屋企「等消息」添！
撰文：Kayla｜圖片來源：Instagram、Facebook
本身育有一女嘅張嘉兒，而對BB夠鐘都未出世，表現得非常淡定，皆因醫生話佢胎水仲夠，BB各樣嘢都好健康，仲話諗住返屋企煲劇添：「醫生話BB睇落仲未想出嚟，好似好舒服咁，子宮收縮亦都未夠頻密，可以繼續返屋企休息。雖然過咗40週（周），但係醫生話未需要催生，因為胎水仲夠，各樣嘢都好健康。咁我繼續等下（吓）啦，睇埋尋日嗰集權力遊戲先！」
張嘉兒赴馬爾代夫晒孕照
張嘉兒於2007年奪得香港小姐冠軍，並於2015年下嫁金融才俊男友，2016年誕下長女Leora。上年張嘉兒喺社交平台中宣佈再次懷孕，預產期將於今年5月，三年抱兩！
早前，懷孕6個月嘅張嘉兒同老公Nathan去馬爾代夫渡假，享受陽光與海灘。她喺社交平台上分享自己嘅相片，她更笑言：「有個六個月大嘅水泡幫我浮。成個海灘得我一個人，實在太美啦。」睇嚟張嘉兒十分享受今次旅程！
另外，她更分享自己喺海邊漫步嘅相片，相中她身穿泳衣更大晒肚皮。雖然張嘉兒挺着巨肚，但就肥肚不肥人，手腳依然纖幼，加上面尖尖，有種媽媽嘅美態，真係愈佗愈靚！
張嘉兒喺旅程中大讚海水清澈見底，更以英文留言：「感恩這幾天可以在這美麗小島上生活，我從未見過如此清澈的海洋，如此蔚藍的天空，馬爾代夫真是一個天堂。」
