【婚姻合伙人】張嘉兒晒餵母乳相：好順利好開心

撰文：Kammy｜圖片來源：新傳媒圖片、張嘉兒Instagram，張嘉兒Facebook

張嘉兒演技大躍進

現年35歲嘅張嘉兒，於2007年勇奪香港小姐冠軍。雖然當年爆冷奪冠，但就因為其包包臉而屢受外界抨擊，更被外界封為「闊面港姐」，但同年佢參選「第57屆世界小姐」，順利晉身十六強，亦成為香港代表喺世姐競選中近廿年來最好成績嘅一位，對上獲名次嘅香港代表為1987年嘅楊寶玲。

張嘉兒至今入行12年，雖然發展麻麻，拍劇又冇代表作，但喺近日播出嘅《婚姻合伙人》，其演技就令人眼前一亮。張嘉兒喺戲中飾演李智琪，同楊明及古明華嘅互動每次都為觀眾帶嚟驚喜，一時溫柔一時惡到死，演得相當自然。

張嘉兒晒餵母乳相：好順利好開心

張嘉兒喺2015年下嫁金融才俊男友，2016年誕下長女Leora，剛剛上星期（5月7日）再誕下細女Hannah，真係三年抱兩呀！早前，張嘉兒就上載咗餵哺母乳嘅相，雖然唔少網民都擔心佢走光，但嘉兒就大派定心丸，表示已經Check咗好多次，唔會走光，佢仲話今次上奶快過上次好多添！

張嘉兒留言表示：「第二次做媽咪果然每樣野都容易得多。好快已經上咗奶然後BB已經曾磅。佢瞓又瞓得越嚟越好，食又食得越來越多，好順利好開心呀。最難得嘅就係大女同埋二女佢哋相處得越嚟越融洽，我都慢慢掌握左佢哋兩個嘅時間表。今晚9:30pm呢個時候佢哋已經瞓緊覺，我就睇婚姻合夥人。大家可以留意下，有我份㗎。拍嘅時候我記得啱啱生完大女四個月，成日要係公司pump奶。估唔到而家播出嚟嘅時候，我又係屋企餵完奶。」

《婚姻合伙人》其實係張嘉兒生第一胎後嘅復出作，拍攝時嘉兒只係生完四個月，仲曾喺社交平台上話好掛住囡囡。如今劇集播映，嘉兒亦已經生咗第二胎，時間真係過得好快呀！

張嘉兒驚險誕第二胎

張嘉兒佗第二胎時，BB已經過咗40週但都仲未生得：「醫生話BB睇落仲未想出嚟，好似好舒服咁，子宮收縮亦都未夠頻密，可以繼續返屋企休息。雖然過咗40週（周），但係醫生話未需要催生，因為胎水仲夠，各樣嘢都好健康。咁我繼續等下（吓）啦，睇埋尋日嗰集權力遊戲先！」

點知過咗幾日，BB就出世喇，仲宣佈係女嚟，叫做Hannah！張嘉兒仲喺網上分享幾張BB相，見到張嘉兒攬住B女甜笑，而Hannah仲好可愛添，場面溫馨！

不過，張嘉兒就大爆生產過程十分驚險，事關原來BB女被臍帶纏住，仲要纏3個圈添！但好彩醫生都解決咗個問題，最終BB都平安出世，重3.25kg，母女平安。

張嘉兒發文如下：

大家好，同大家介紹我個細女，Hannah Lau. 佢早兩日終於出世啦 。今次好開心都係順產。生第二胎真係快過第一胎好多。入醫院開咗三度然後三個鐘頭後就生得啦。不過唔知點解今次真係痛好多，可能因為醫生話原來個臍帶圍住左係BB女個頸到三個圈，好似帶咗三條頸巾咁。聽落真係有驚無險，好彩我個醫生超級專業，好快就解決咗個問題，完全冇令到我有恐慌嘅感覺。

多謝仁安醫院嘅護士同埋醫生悉心嘅照顧！我康復得好快BB亦都好健康。
當然亦都要多謝我老公同埋我家姐一路陪伴着我，係我住院期間照顧我個大女。