【生三個冇偏心】直擊張栢芝陪兒子作親子考察

撰文：東方新地｜圖片：新傳媒圖片

張栢芝第三胎「小王子」 出世紙冇父親名

上年11月張栢芝秘密在養和產第三胎「小王子」，坐完月才透過社交網公佈喜訊，雖然兒子生父是誰傳出多個版本，有指是年長新加坡富商，又傳出是江湖猛人、內地富豪，不過張栢芝統統冇回應，只專心湊 仔，有關孻仔一切非常保密，不過1月底兒子出世紙被曝光，張栢芝被揭未有在出世紙親生父親一欄填上任何名字，「小王子」原來隨她姓張，改名張禮承。 雖然要湊多個，但張栢芝繼續做緊張媽媽，未有因為孻仔孻心肝而偏心，對同霆鋒所生的兩個仔Lucas及Quintus，依舊全天候貼身照顧，一 坐完月已經火速出關湊仔，就算未修身成功，已陪兩子參加寓所附近的寵物活動，又帶他們去主題公園、行山及參加運動會，親子活動多多，上年聖誕更陪Lucas及Quintus去新加坡旅行，湊仔生活未有因添多個寶貝而有改變！

一向緊張照顧兒子的張栢芝，陪同二仔 Quintus參加學校的親子 活動，到嘉道理農場做戶外考察，遺傳咗霆鋒優良基因的Quintus大受女同學歡迎，其中一名長髮女同學 更全程黐住Quintus玩得，非常投契。

當日早上約七時半，張栢芝親自駕車送兒子回學校準備參加親子考察，而家中外傭亦有同行。

享受做媽媽

雖然「小王子」個樣至今未曝光好神秘，不過產後不久張栢芝已再次開通個人社交網，即使小王子蹤影全無，卻繼續狂po同 Lucas及Quintus 的互動，據知情者透露：「栢芝多年湊細路都係親力親為，唔會假手工人，佢會自己煮飯同設計營養餐單，亦盡 量會親自接送兩個仔返學放學，母子感情超級好，可能咁多年都 係自己貼身湊仔，令佢好享受做媽咪嘅感覺，所以佢從來唔抗拒再生BB ，上年陀第三胎，都係佢預計之內，不過，佢陀B好保密，只有家人同密友先知道，加上兒子生父身份外界好多揣測，佢好緊張去保護個仔，到依家都冇乜朋友見過小王子！」

由於三個仔年齡有差距，張栢芝教仔方式亦各師各法，已經11歲的大仔Lucas，開始有自己的社交圈子，張栢芝都放寬態度，唔會下下做跟得媽咪，反而8歲Quintus年紀仲細，加上由細到大都好黐媽咪，所以照顧Quintus會比較緊張。日前，Quintus學校舉行戶外親子活動，張栢芝就晨咁早陪兒子返學校準備，再直踩做貼身媽咪陪仔到大埔嘉道理農場做考察，更做義工家長幫手照顧埋其他小朋友，全程顯得非常享受。

送咗兒子返入學 校後，張栢芝就逗留在車廂等候，到八時半才匆匆入學校會合，聯同兒子一同乘校車出發去嘉道理農場做考察。

愈大愈帥

當日早上七時許，張栢芝帶同外傭幫手，駕車載兒子Quintus返到學校，泊低車後先送兒子入學校內，自己就留在車廂等候，約一個小時後，她才入學校會合一班家長，原本著住紅色羽絨的她，再在外披多件藍色毛毛外套，加埋著住的黃色鞋，企在 一班家長身旁已經鶴立雞群，如同彩雀搶晒fo，她跟同大隊一同坐校車出發，大約坐了半小時車程，大隊抵達嘉道理農場，只見一班義工家長分隊起行，張栢芝就帶著八位學生入農場做考察。

愈大愈似爸爸霆鋒的Quintus，著住運動衫非常帥氣，還好受女同學歡迎，當中一名長髮小女孩更同他如糖黐豆，兩個不時孖住行一齊研究，張栢芝自己亦表現投入，帶隊去到邊她都會停下來自拍，影完自己亦會幫兒子及其他同學仔影相，由於沿途經過好多地方，學生們都要記下筆記，張栢芝亦有監督兒子寫筆記，戶外考察兩個幾小時，到中午時分才大功告成，張栢芝亦隨校車返回學校再取車離開。有仔萬事足，相信用嚟形容三子之母張栢芝，幾時都最貼切！

張栢芝不時停下來自拍，期間影到忘晒形，要行在前方的兒子Quintus及一名女同學回頭等她。

陪兒子參加親子活動，張栢芝同大班家長企埋一齊，披住彩藍毛毛外套的她，一眼就被認出。

除咗自拍，做義工家長的張栢芝，都有幫一班小朋友影相，愛心爆棚的她，對住一班同學仔表現好興奮。

張栢芝誕下孻仔後，向內地傳媒派喜餅，賀卡上更畫有張栢芝和兒子的卡通造型，不過呢個 「一家四口」，就未見畫有爸爸 個樣。

去年11月產第三胎的張栢芝，未有因掛住照顧孻仔而忽略大仔同二仔，教仔仲係親力親為。

張栢芝帶著Quintus及一班學生，沿著嘉道理農場考察參觀，期間在昆蟲館休息時，帥氣的Quintus被女同學圍住，年紀輕輕已經好有爸爸霆鋒嘅氣場。

張栢芝監督Quintus寫筆記，適當時候給予意見！

平日得媽咪照顧周到的Quintus似乎真係嬌生慣養，流鼻涕都要工人姐姐攞紙巾幫忙抹鼻。

張栢芝孻仔Marcus（張禮承）去年11月出世後，至今未曝過光，可見她非常保護兒子，不過今年農曆年有小女孩到她家拜年，張栢芝po出自己穿住睡袍向小女孩派利是相片，就清楚可見後面的BB床和BB凳。