張達倫囝囝8個月大 沙灘玩水零懼色！
撰文：東方新地｜圖片：張達倫Instagram、Facebook、新傳媒圖片庫（原文刊於：東方新地）
張達倫囝囝8個月大 沙灘玩水零懼色！
張達倫囝囝沙灘玩水
日前，張達倫帶住8個月大的囝囝張凱碩（勁秋雞）去了沙灘玩水，8個月大的勁秋雞一啲都唔驚水，當老竇抱住佢慢慢放佢落水，浸到水嗰下，勁秋雞手仔郁郁，腳仔踼踼水，好似急不及特要落水游水咁，非常可愛！
後來，勁秋雞就坐喺水泡中，不停繼續踼水，玩得十分高興，就連老竇張達倫都留言大讚囝囝：「碩碩下水禮＠chszachary！叻仔乜都唔驚#勁秋雞#8個月大去沙灘#食沙#唔怕水」
其後，張達倫更與老婆及勁秋雞一同坐艇出海，感受海風，仲吹到呀仔眼都矇起，認真搞笑。
之前父親節，張達倫揹住囝囝去街，有網友留言話勁秋雞係個大眼b，靚仔之餘仲好可愛！
勁秋雞對眼真係好大，只要用少少力，對眼就可以瞪到又圓又大！
無名無姓到《愛·回家》的「嚴謹」
張達倫 於2004年畢業於無線電視藝員訓練班，一直都只飾演一些沒名沒姓沒對白的路人，直到2008年，他才真正在處境劇《畢打自己人》為自己爭取到一個名字，就是「會計部職員Herman」，但依舊寂寂無名。
努力多年，終於在2012年有機會參演《愛·回家》，並且成為劇中主要角色之一，是為其加入TVB後戲份最多的劇集。觀眾未必知道 張達倫 是誰，但誰會忘記「嚴謹」和「霞姐」這一對。
人氣急升 舊聞重現
自 張達倫 演「嚴謹」人氣急升後，其後多部電視劇集都能看到他的身影，包括潮流教主、律政強人、全職沒女以及熱播的《不懂撒嬌的女人》。
張達倫的演技愈來愈好，觀眾緣又不錯，因此大量舊聞傳出，例如張達倫跟「最佳主持人」黎芷珊的舊戀情。兩人拍拖9年，於2012年和平分手，再見亦是朋友之餘，黎芷珊更公開指兩人的關係已昇華至家人。
跟胞兄中學同學重遇 相戀結婚
分手後， 張達倫 遇到他的真愛Kimmy。 雖然有報導指 張達倫 與Kimmy是中學同學，但他其後澄清：「都唔知點解成日話我哋係中學同學，其實Kimmy係我阿哥嘅同學，有時食吓飯，一直有聯絡。」認識多年，雖然一直有聯繫，但各自有生活，Kimmy就同咗一個外國人結婚10年，仲有一個囡囡，依家已經13歲。
兩人後來重遇，拍拖2年多就決定要結婚，皆因他認為自己年紀已經不小，眼見身邊的朋友大多已經成家立室，他盼望自己婚後能夠馬上能夠生bb，最好就係一個仔。佢同繼女關係都好好，所以影婚紗照都有一齊去，雖然佢唔係同繼女一齊住，但佢好關心囡囡。
生日派對 驚喜求婚
據悉當時女友Kimmy打算為他舉辦一個驚喜生日party，但是卻被聰明的張達倫發現了蛛絲馬跡，因此他便偷偷聯同《愛.回家》的同事們「反客為主」轉搞求婚party。毫不知情的Kimmy到達場地時，張達倫為她送上玫瑰花和蛋糕，最後更拿出戒指求婚，兩人都感動到哭了。
張達倫和Kimmy到法國拍攝婚紗照，繼女也有同行，三人還順道拍攝全家福，張達倫表示自己很喜歡小朋友，大家感覺似朋友就可以了。
張達倫著起傳統禮服，靚靚仔仔去接新娘！
結婚後一索得男
張達倫 和Kimmy於2016年11月完成結婚儀式並舉行婚禮，當晚多位藝員同事包括前度黎芷珊都有到場祝賀。婚後兩人努力「造人」，並於4月底宣佈一索得男。
張達倫 對老婆Kimmy無微不至，頻頻陪老婆去產檢，認真愛妻如命，幸福滿瀉。
上年10月，張達倫的太太Kimmy順產誕下囝囝勁秋雞，重七磅多，佢仲話有親手剪臍帶啊！
張達倫攜老婆到影樓拍攝大肚寫真，雖然頂著大肚子，但二人依然模特兒上身，Chok足全程！
