快樂是家庭核心 劉美娟：要活在當下
過去外界對於張崇德和劉美娟的家庭，印象最深是他們為夭折長子天藍，盡心盡力討回公道。在漫長的追討過程當中，他們從沒有忽略日希和日晴，返到家中就會對他們一心一意，給他們一個快樂的家。隨著案件告一段落，日希和日晴亦已分別10歲和9歲，一家人的感情愈來愈深厚，美娟更形容他們已是四為一體，每天一齊祈禱。「生命唔係你講，今日唔知聽日事，過到今日已經要感恩，我哋要活在當下，開開心心過每一天。」
●撰文:Ling
●攝影:Clay Lam(部分相片由受訪者提供)
●鳴謝:香港電台
重看《壹號皇庭》 老公讚好戲
在《壹號皇庭》飾演江承宙（Helen）的劉美娟，至今相隔廿多年，竟然現在才第一次看到自己的演出，覺得自己演得不錯，外形又唔Out。「以前趕戲日忙夜忙，同一時間唔只拍一部戲，根本冇時間睇，我依家好似一個小粉絲，追番自己嚟睇，真係做得幾好喎！喺法庭呢個眼神，我自己都嚇一跳，點解我做到嘅？點解我背到咁長對白嘅？仲有服裝、打扮，都唔覺得復古喎！我見到有社交平台影番我戲中啲衫，嗰啲白色、淺藍色套裝，話係今年最流行，當年我個妝咪依家最興嘅韓妝囉！原來好多嘢會循環，依家播番個Timing係最好。」
在這個重播時段，美娟和崇德也能享受一下二人世界，崇德以前已經有追看，現在重溫可以當面讚老婆做得好，美娟笑稱自己外貌變化不大，證明沒有欺騙老公！「證明呢廿幾年我都冇呃佢啦，哈哈哈！親朋戚友都話我冇乜變過！老公話好好睇呀，佢話當年已經好欣賞我呢個角色，依家睇番我嘅演繹方法都唔舊，做得好似美劇，對我嚟講佢嘅意見最大影響，佢咁讚我好開心。」
仔大女大 復出拍新劇
藉著今次的重播，美娟也想試試觀眾對自己的反應，很開心評價都是正面，對自己復出的信心大增。「我趁今次可以睇吓啲人仲記唔記得我，鍾唔鍾意我做戲，以前細個唔想聽人講，我做一定好㗎啦！依家聽番大家對我做戲嘅評價，我覺得好真。既然開咗個頭，大家又接納我，又冇抗拒我，可能我應該要繼續拍，有Fans話餓咗我嘅戲好多年，所以有適合劇本的話，我唔會再堅持唔拍。」
美娟最近返TVB拍畢新劇《飛虎極戰》，飾演苗僑偉（三哥）的老婆，原來是美娟從影以來第一次做太太及媽咪的角色，但演來也得心應手。得到樂小姐邀請出山，美娟覺得有新鮮感，而且仔大女大想重拾興趣，便一口答應。她笑言以為自己不必開槍打打殺殺，應該演得幾舒服，原來做「飛虎」老婆都幾辛苦。「你以為你做主角太太唔使打，但你會畀人捉，去勒索個主角，畀恐怖分子捉嚟捉去，又爆炸又開槍，我以為可以避開呢啲場面，原來全部我都要參與，都幾得意幾新鮮。」
從無戲癮 到電台開咪
縱使喜愛演戲，但美娟自組織家庭以來，一直沒有戲癮發作。「開頭都有少少嘅，望到劇集角色就諗自己會點做，睇吓啲燈光，但我慢慢將個focus擺晒小朋友度，將睇戲變咗娛樂，我就冇再睇咁多嘢，唔會睇鏡頭、燈光，享受做觀眾，戲癮都冇埋。」不過一向好奇心重的她，早兩年復出到電台開咪，挑戰一下自己，因為開咪沒有劇本，要靠本身知識表達出來。
「我樣樣都想知，每件事我都問到篤，開咪我可以問好多嘢，好正！」最近美娟加入香港電台主持醫療健康節目《精靈一點》，每星期探討不同健康話題，她最開心是從中長知識，亦可回家教育孩子。「我坐喺度我好似上緊堂學嘢，我當進修，做咗媽媽對健康知識會想知更多，好多時你驚一啲疾病係因為無知，當你知多啲就唔會驚，依家世界醫療行得好快，你知多啲會開心啲，開心就會健康啲囉！」
開心是健康之道
美娟和崇德一家奉行健康天然的路線，盡量不吃藥，靠多休息及調整生活、飲食習慣去改善，最重要是保持心境開朗。「其實做人開心就自然會健康，有時你覺得好辛苦、好頭痛，未必係你真係唔舒服，可能係心病，覺得唔開心有壓力先會咁。」美娟笑言家中每天也充滿笑聲，一對仔女甚少病痛，相信家庭快樂與和諧，就是最主要的健康之道。
「小朋友其實好簡單，有父母陪伴就得。」陪伴的意思，並非坐在身旁玩電話，而是用心了解孩子。美娟的仔女已分別10歲和9歲，她的陪伴更需聆聽孩子。「要認真聽，唔好hea，依家啲小朋友好聰明，科技又發達，佢哋得到嘅資訊分分鐘仲快過你，佢同你講你話唔識，佢之後唔再搵你傾啦，所以你要認真同佢溝通，佢開唔開心你都要知，佢如果因為一件事唔開心，你唔好以為好小事，呢件小事可能影響佢好大。」
風雨不改 湊返學放學
不要小看接送返學放學的時間，短短的光陰已足夠了解孩子今天的狀況，美娟和崇德至今風雨不改接送，大部分時間更是一齊去，美娟讚老公即使工作繁忙，寧願犧牲休息時間仍要去接送。「就算演唱會完咗，或者啱啱去完大陸登台，佢唔會住喺嗰度，凌晨四五點都趕返嚟，堅持七點鐘車仔女返學。」因為兩夫婦每日親力親為接送，令長輩們覺得無癮，最開心就是他們因工作要尋求協助，美娟笑說:「我奶奶最開心我哋唔得閒，等咗呢個機會好耐，哈哈！」
Good Morning 和 Good Night 的意義
一日之始在於早餐，美娟和崇德在送仔女返學之前，亦相當重視早餐時間，Good Morning的意義就是開心迎接新的一天。「一日嘅開始就係朝早，一定要Good，你唔會同人講Bad Morning，所以每日要有好開始，大家都要開心講Good Morning。下午Good Afternoon提一提你繼續開心，夜晚瞓覺Good Night就要好好瞓覺，唔係人人都有舒服嘅床。」一家四口每晚都會一起祈禱，感恩度過了今天，如果爸爸不在家，亦會開視像電話祈禱講Good Night，一家人的連繫十分強。仔女也感受到滿滿的愛，寧願做「宅男宅女」也不願出街玩，因為在家太開心，小玩意太多，美娟說:「我話放假帶佢哋出去玩都唔制，佢哋話最鍾意返屋企。有時放學車佢哋去食嘢，成日問幾時返屋企？喺車又問仲有幾耐先返到？一踏入屋企佢哋就開心。」
仔女出卷 叫父母做「功課」
日希和日晴在家有很多玩意，每晚與父母有親子時間，又有兄妹玩樂時間。美娟和崇德自小灌輸他們玩樂是尋開心，不必在乎輸贏的價值觀，至今兩兄妹絕少爭執，相親相愛。他們又會合力自創玩具，例如為洋娃娃製作家居、把舊衫造成公仔衫等。而最有創意的玩意要數到「功課」，日希和日晴最鍾意老師上身，出卷給父母和親朋戚友，大家都很配合「交功課」。
日希和日晴不單止喜歡返屋企，還鍾意返學、做功課，他們入讀了一間提倡愉快學習的學校，吸引了他們愛上讀書，放學一回家就想做功課，美娟笑說:「我話請一日假唔得，遲到又唔得，佢哋好緊張㗎！放學我想一齊食下午茶，佢哋都話想快啲返去做功課。我叫佢哋休息一陣食啲嘢先，佢哋都話要做完先食，佢哋好enjoy做功課！」他們在家中如此享受，難怪不願出街了！
細女懂事：大哥上了天堂
隨著日希和日晴愈來愈懂事，他們知道對上還有一個哥哥天藍，美娟和崇德對他們從沒有隱瞞，早於幾年前已一一告之，起初美娟以為仔女還小，未懂得事實的全部，原來他們早已記在心坎中。「呢件事好難掩飾，幾年前新聞日日都講，我哋又成日一早出去醫委會同上庭，所以我一定要畀仔女知。初初我都以為佢哋細個唔識，點知有次我同個女講要錫哥哥，因為你得一個哥哥要珍惜，佢竟然話:『媽咪，我有兩個哥哥，一個去咗天堂嘛。』」
自此美娟和崇德不再掩飾，向仔女坦白心情，最傷感的二月也會一同笑著哭著度過。「每逢二月，日希生日之後幾日就到天藍生忌、死忌，佢哋知道媽咪嘅情緒會有高低起跌，我會同佢哋講，媽咪有啲唔開心，仔女就會拍拍我、攬住我，我會好快冇事。」每個人都有情緒，日希和日晴也明白，一家人最重要能互相尊重、互相扶持，要感恩度過每一天，齊齊說聲Good Night。
