應采兒大談情史及湊仔經：「對的時間遇到陳小春」
撰文：Sunday Kiss
圖片：新傳媒圖片庫、應采兒微博
夫妻性格大不同 與小春互補
被問到與老公的關係如何，丁丁便揚言與小春性格大不同：「 我哋互補，佢唔係好講嘢、唔係咁多意見發表，同我係相反，佢靜啲、我嘈啲，佢雖然玩得，但平時係比較boring啲嘅人，我就比較hyper啲，夫妻兩個人過一世，其實係需要互補，我多嘢諗，佢唔鍾意諗嘢，我鍾意fine dining，佢鍾意食魚蛋粉，慢慢，其實日子都係咁過，有時咪fine dining，有時咪食下車仔麵囉，其實冇問題㗎！好唔同反而結婚，呢啲先係真愛。」丁丁形容在她「癲」的時候，總會有在旁的小春叫她冷靜下來。
對的時間遇上陳小春
丁丁選擇在當時結婚，原因是她厭倦了不穩定的感情。她稱：「我諗我覺得攰嘞！係時候搵一個穩定性高同唔自私嘅人。男人自私好恐怖，好簡單，孝順父母真係好緊要！你連你阿媽都唔錫，我唔覺得你會錫得我去邊囉！唔鍾意小朋友或者動物都好恐怖㗎嘛，起碼要鍾意其中一樣。」應采兒喜歡孝順仔，難怪揀曾獲得中國十大孝順獎（中國演藝界十大孝子）的小春做老公。
丁丁以往的感情皆不牽涉圈內人，她直言，喜歡有很多人幫手睇住老公，但從不擔心他的去向，就算遇上小春的前度都不會尷尬，因為沒有事比她的家人重要。對於小春結婚前的爛玩形象，她回應道：「佢自己stop嘅，佢自己唔想蒲、唔想拍散拖，唔想識啲新女仔，佢嗰個階段咁啱係咁，我咁啱嗰個timing撞到嗰時嘅陳小春，我哋識咗咁耐，講真係冇任何嘢㗎，就係因為timing。」
為陪愛子犧牲工作 「錢係賺唔晒」
陳小春是個盡責好爸爸，為了養家頻頻接job，丁丁表示：「佢比較辛苦啲，始終要賺錢，所以佢好想廿四小時陪住個仔係冇可能，我老公keep住飛，犧牲咗陪Jasper嘅時間，不過我哋都有商量，錢其實係賺唔晒，有時係要放慢腳步去enjoy Jasper好美妙嘅頭幾歲。」丁丁自稱為喜歡工作的人，但現時她選擇「揀嘢嚟做」，為的只是留更多時間給兒子。
有看《爸爸去哪兒5》的都會知道Jasper性格十分惹人喜歡，丁丁稱：「佢外表係小小春，性格就比較似我，outgoing啲、多嘢講，活潑嘅，見到人有少少想表演，但又似返佢爹哋始終慢熱少少，但過咗十五分鐘，又似番我。怕醜、細膽應該係似佢老竇，佢好多嘢係望好耐，見到人玩一陣，佢先去掂，唔係我一嚟就掂嗰啲。」無論似爸爸或媽媽，Jasper早已俘虜了觀眾的心。
應采兒嚴勵管教小小春
《爸爸去哪兒5》一開播，小春呼喝兒子一事已被瘋傳，但原來在他與太太之間，丁丁才是嚴格管教兒子的那位。她坦言：「我係嚴嗰個，有啲小朋友我係唔鍾意、想打，譬如Toys”R”Us見到小朋友唔買嘢俾佢佢癲咗，我盡量避免佢係嗰啲小朋友。小春唔會惡，但我講咗，如果我鬧緊一樣嘢，你唔可以話『冇事，冇事，過嚟爹哋度！』唔可以一個黑一個白，就算呢一刻覺得唔同意，但要等唔喺Jasper面前先講囉！」
明白父母真係好偉大
丁丁透露，小春其實一直很想縱容兒子，因為他出身於草根家庭，為人父親後很希望滿足兒子的物質需求。應采兒表示，生咗小朋友之後，就明白父母真係好偉大。「為人父母係好偉大，生咗小朋友你會明白自己爹哋媽咪係咁偉大，有時湊仔湊到唔記得食飯，突然好肚餓，原來全日未食過嘢，依家都話有工人，以前我阿媽一個人湊我，唔怪得我阿媽生完我仲瘦過之前，媽咪為咗小朋友乜嘢都可以唔記得，我依家最重要都係小朋友、佢嘅education、人生，人哋點寫我嗰啲無聊是非八卦，I don’t care！」
身為老婆的丁丁認為有需要出手制止他，避免成為溺愛囝囝的怪獸家長，她表示：「佢想個仔咩都有，我會話唔可以，譬如買玩具，見到佢好鍾意，我唔會今日買，我唔會俾佢知道佢要就會有，我可能過幾日或者買完收埋，等佢好得意或者我想嗰時先會show出嚟。」
從小培養自理能力
作為父母就算多愛錫子女，都需要放手讓他們闖出自己的一片天。丁丁和小春深明這個道理，讓Jasper從小習慣獨立。應采兒揚言：「睇書教小朋友要識得自己同自己玩，唔可以永遠娛樂佢，如果唔係無人娛樂佢嗰時就會發癲。」小春兩公婆如此重視兒子獨處，是因為丁丁相信外國的教育模式。
她像法國人一樣覺得夫妻之間要浪漫，不能經常有孩子在旁，甚至三人同房，她稱：「大人唔應該同小朋友一間房，大人都仲要have sex，小朋友喺度唔好嘛！」她參考法國人的湊仔之道：「法國人湊小朋友係大人同小朋友分開，細路自己玩，唔流血，大人係唔會理。」二人給自己和愛子留有私人空間，難怪結婚多年都咁恩愛！
入行多年 新聞不斷
應采兒18歲入行，至今已十六年，她稱在結婚之前一直很多新聞，不過入行多年，丁丁早已不介意新聞纏身。樂天的她表示：「No news is bad news！我呢個年紀都唔會care寫我咩，結婚之後確實冇咩寫，老公、仔、同啲女朋友食飯，正常生活，我都覺得我冇乜嘢寫啦，有嘢寫即係寫衰嘢，你鍾意寫咩就寫咩啦！大家都要搵食，我都明嘅。」這種開懷的態度，是丁丁在圈中打滾多年修煉而成的，就連老公小春的新聞，她亦一笑置之。
