截肢史泰龍 熱血回歸
撰文：Esther Ngan
攝影：黃大立（部分相片由受訪者提供）
仇健明（55歲）
經歷：人稱「史泰龍」，從事舞台幕後工作三十多年，於2013年傷口受食肉菌入侵，須截去雙腳保命，昏迷十九天，現時長期靠輪椅代步，積極從事義工，現時是香港復康力量董事及2014至2015年度十大再生勇士之一。
食肉菌感染
即是「壞死性筋膜炎」，由一種或幾種細菌混合病變引致，例如金黃葡萄球菌、鏈球菌、創傷弧菌等；病徵有皮膚劇痛及紅腫，出現高燒及休克。病患可源自細小的傷口，有些個案沒有明顯的感染源頭。此感染能快速破壞身體組織，需透過手術將壞死發炎組織全面切除，部分患者須截肢，嚴重可致命。
資料來源：衛生防護中心
惡菌入侵 切除左腳
「小傷口有幾惡？發燒？休息唔夠，飲多啲水、焗一身汗就無事？」從事粵劇舞台布景幕後組的史泰龍，牛高馬大，經常擔擔抬抬擒高爬低，工作常有擦傷，二零一三年三月底左腳出現小傷口及發燒，只覺小事。
「十年前太太因肺癌離世，我身兼父母兩職照顧阿女，有責任搵錢撐起頭家，日以繼夜工作，半夜一、兩點拎住宵夜返屋企，朝早七點起身返工，每日瞓幾個鐘，大廈看更笑我『早出早歸』。左腳受傷受感染無特別理佢，我記得痛到抽住大髀位，又發燒，加上我自己硬頸，唔想拖累工作，想跟埋日場，繼續開工。有下捱唔住暈暈哋，腳開始腫，叫拍檔送我去急症，諗住打支止痛針就得。點知醫生立即叫我入院做手術，話係食肉菌，我自己簽紙做手術，見到『最懷打算會切除左腳』，我從來都無聽過『食肉菌』呢三個字，仲懶輕鬆諗最多切忽肉補番傷口，仲叫醫生射住，輕手啲！」由於食肉菌擴散太快，醫生切除史泰龍左腳保命，還說如果遲一天入院會性命不保。
昏迷十九天 閻羅王拒收
「去到鬼門關，閻羅王都唔收我，無咗雙腳坐住輪椅，連牛頭馬面都嫌我阻碇，看唔到門口。」今天的史泰龍還懂得說笑，看來硬淨，不過勇士也有弱點，說起家人，說起那十九日的突變，眼淚如泉湧。
「我好記得四月一日做手術，醒番已經係十九日之後，昏迷期間做咗八次手術，好多事都係後來聽番。切除左腳後，發現食肉菌入侵至右腳，明明左右腳隔咗成個海，當時我家姐簽字同意為保我條命而做手術，點知再發現我對手紅腫，醫生提出要切埋手……當時家姐好難抉擇，怕我醒番唔知點面對，交咗俾阿爸決定。」人緣好的史泰龍，當時很多親友前來支持他，面對抉擇出現兩方不同聲音，一方支持世伯為保兒子性命而做決定，另一方反對，再切落去無陰功，木頭人般生存下去。「最後阿爸決定唔簽字，醫院人員打十幾支抗生素殺病菌，後遺症有機會令到心肝脾肺腎衰竭，成為植物人……」
歷盡生死 熱血重生
「一般人應該bye bye咗。四月十九日係我嘅重生日。」即使是戰士，也要時間破繭重生。昏迷後甦醒，史泰龍當刻沒有發現自己沒有雙腳，只感到沒體力。「我仲同人講我入院三日，仲未知自己昏迷十九日，初時無人敢講事實我知。由於我完全無力，連彎腰都唔得，下半身包住晒同用毛毯遮住，根本望唔到。醫護人員用吊機抬起我，大小二便靠人哋幫，就連抬手拎隻膠匙都無力，用五至十分鐘先可以拎起粒提子食到，我已經心諗：『我玩完！』有一日好奇心嚟啦，用力撥開被發現無左右腳，喊咗整晚，我姓仇啫，唔係同人有仇，點解個天咁對我……」
其後，截肢戰士感受到家人、朋友、同僚和醫護人員支持，包括粵劇界在他昏迷期間發起義演籌款，籌得一百三十四萬供他康復路用及支付女兒教育費，史泰龍注滿入間有情的力量，贈自己五個字：我要活下去！
為祭愛妻 學行樓梯
從零開始，逐漸適應自己並接受現實，每天做運動、每天吃蒸水蛋吸收蛋白質，忍痛拉筋、坐輪椅練習再到學用義肢走路，在醫院八個月零七日是苦練期。「星期六、日物理治療師放假，我都堅持練習，姑娘叮囑我要小心，難得執番條命，再跌一跌好大鑊，傷口難復元之外，意志會消沉，有機會唔想練落去，所以我非常小心。」進度良好，醫護人員更說史泰龍是萬中無一，到他可以用義肢站立及走路時，進一步想學習行樓梯。
「為應付生活，我唔想去到商場有幾級樓梯時O咗嘴，想學行樓梯。醫護人員唔俾我學，覺得我過火，我再講多個理由，佢哋立即應承。我太太胡林萍係四川人，十年前走前遺願係返回家鄉，山上有三十幾級樓梯，我跟醫生講我希望拜太太。」去年，史泰龍跟女兒一起回鄉祭太太/媽媽。
全職義工 反饋社會
傷殘人士的世界並不如史泰龍原定所想般悽慘，反而發現另有天地，他施展冒險精神認識同路人。「去到呢刻，我咩都接受，病房床尾有聖經、佛學書、轉經幢，護士都講笑話唔搞我個『陣』，醫生有時叫我同某某病人傾吓偈開解吓佢哋，我都好樂意。有次朋友介紹我認識殘疾人士，原來佢哋係大公司工作、職位好勁，我嚟啲中途出家嘅人有眼不識泰山，之前只知奧運後梗會有個殘奧咁。」抱有開放樂觀心態，加上史泰龍是因為得到他人支持才站起來，決定「人人為我，我為人人」，參與義工服務，到不同機構分享，更「出賣」自己經歷結集成書，將收益捐予香港復康力量，推廣傷健共融。
延續 舞台夢
史泰龍現時的生活多姿多采，最富挑戰是由幕後走到幕前演話劇。他講述《輪上．心更清》的演出情況眉飛色舞。「導演無要求我除去義肢，我在總綵排時決定除去義肢，重演我當時發現自己無雙腳的震撼，加入粵劇常出現的手勢表達，出嚟效果好有共鳴感同有效果，有時考爆肚臨場反應都應付到，準備出年繼續演。」兩年多時間不長，眼前的史泰龍接納了自己，不怕路人眼光，笑說自己好貪靚，想得出用紋身圖案襪套在義肢上，連真正的公仔佬見到他都讚厲害。筆者想協助他開門，他直說不用，又不用電動輪椅，怕自己養懶了，他果然是戰無不勝的史泰龍。「做到殘而不廢，是種福氣！」
後記：苦着拼人生路
Survivor樂團所演唱的電影《洛奇》第三集（Rocky III）主題曲〈Eye of the Tiger〉是仇健明的主題曲，他一邊聽着此歌，一邊接受物理治療。歌詞中「虎之眼，挺身而起重回戰場，付出光陰去賭上機會，曾經遠走，如今我重新振作， 一身孑然，唯求生意志與我同在。」正反映他的經歷，更告訴各個殘疾者、遇到失敗者，跌倒、苦楚何需懼怕？人人都可以變成「史泰龍」，重新爬起來，拼出前路。
