撰文：Sunday Kiss、Ling Lam

鄭麗莎：囝囝開始跟我做運動

有「包山皇后」之稱的「蜘蛛女」鄭麗莎（Lisa）帶同兒子Tommy出席活動，她說：「兒子知道我要來出席活動，便嚷著要跟來，因為他是品牌的用家！最近他開始跟我做運動，發覺他的運動天賦也不俗呢！」

鄭麗莎夢想生六個

Lisa一直夢想生六個，自2014年誕下大仔Tommy後，前年再誕下三胞胎，Lisa接受訪問時表示，雖然懷孕過程有風險，但她不欲扼殺小生命，亦相信自己有運動員的體魄及歷練支撐，決定冒險保胎，最終三胞胎「蛛BBB」汪晉孝（Jeremy，乳名Mimi）、汪尤霏（Euphy ）和汪尤嘉（Yuka ）順利出世，分別重2.08磅、1.688磅及1.74磅。上年有三胞胎一齊過雞年，今年三胞胎滿一歲半，相信今個新年一定會更加熱鬧！

三胞胎外形不同

多胞胎外形大多很相似，但「蛛BBB」好易分辨，Lisa話佢哋啱啱出世嗰陣已經好唔同。大孖仔Mimi身形大一個碼，但頭髮最少；細孖女Yuka就最多頭髮，而比較平均的就是二孖女Euphy。三胞胎外形有點不一樣，連性格都不同，先他們出世不久，Lisa已察覺大孖Mimi比較愛笑，見到陌生人都識笑；Yuka則是辣椒仔，飲完奶會高八度尖叫；Euphy就較文靜，愛眼仔碌碌。

收四封利是 回贈親朋要大封

上個新年，Lisa話唔會主動帶三胞胎四出拜年，最多只去長輩屋企探望，但Lisa會準備多些大利是作補償。「因為人哋探我要俾四封利是，唔係幾好意思，所以我會封番大封啲俾人，同埋準備多啲賀年食品同糖果招呼人。」Lisa重視拜年禮儀，平時入屋叫人，拜年就恭喜人，Lisa笑說小朋友要人見人愛，已四出搜羅應節靚衫，並教定晉晉講：「恭喜發財！」

產後急不及待復出

Lisa是前攀石及健美運動員，性格周身郁無時停，懷孕時為安全起見減低運動量，產後她急不及待復出，盡快操fit自己去應付有關運動的工作，包括跑步、打跆拳、健身和在家中進行簡單運動。「我時刻提醒自己要有良好體態，我有呢個意識就算喺屋企都做到運動。有時我會揹住晉晉出去行一兩個鐘，已經出到一身汗，佢又可以放電周圍睇嘢。如果BB瞓晒覺，見情況OK我會出去跑幾個圈。」

Lisa與丈夫皆熱衷運動，晉晉都有遺傳好動因子，兩母子一齊做運動放電最啱，「湊放學我同佢成日拖住手大叫：1、2、3，Run！一齊跑跑跑！或者帶佢去公園爬來爬去捉衣因，乜都玩一餐！」Lisa話每逢年初二習慣與家人一齊行山，上年她就帶晉晉初試行山滋味。「行山係一個好好嘅gathering，我屋企都好鍾意呢種運動，我會準備定孭帶帶晉晉行山。」有小朋友1歲半征服龍脊，晉晉是行山初哥，Lisa考慮先帶晉晉征服大澳，行完有美食歎，是親子行山好去處。

產前運動比產後重要

Lisa在產前產後均保持身形纖瘦，產後看落更實淨了，慢慢回復運動員的體格，她指產前運動比產後更重要。「因為產前打好個底子，令身體有啲肌肉，可以加快新陳代謝同血液循環，避免懷孕期間出現腰骨痛及水腫，產後亦唔會暴肥。」只要落手落腳湊孩子，媽咪肥極有限，「BB都開始坐唔定，鍾意扭抱，我喺屋企都要東奔西走。」

目標生夠六個

Lisa首次懷孕曾揚言，要生夠半打！已適應忙湊四個小孩的生活，生六個的目標有機會達成，「我見依家都開始搞得掂，可能生多兩個都得。」生仔容易教仔難，但Lisa覺得做人不應有太多顧慮，而作為一個運動員，每次接觸新的運動也充滿挑戰和困難，只要正面面對事情，最後成功又有一番景象。「只要保持正面心態，總有辦法解決。諗得太複雜就一定唔會再生，生又好教又好，諗得100%負面就唔會行動。我以前生活環境唔係富裕，我父母都係天生天養、窮有窮養。不過就算再生，我都會等三胞胎兩至三歲，行得走得、自己食到飯我先再諗。」

不過有媽咪質疑，有錢可以請工人姐姐湊，生幾多個都得，Lisa不諱言為了三胞胎新請兩個姐姐，現家中有三個姐姐幫手，主要家務和分擔湊B壓力，自己都有落手落腳湊。即使有能力請，都不一定請得好，Lisa也遇過表現不理想的姐姐，最後請她離開。「姐姐主要幫手照顧日間嘅事，夜晚就係我做，BB未戒夜奶，我要校定鬧鐘半夜起身餵三個。其實每人有自己生活方式，請到信得過嘅姐姐係好事，請得唔好要監佢做嘢都麻煩，自己要睇緊啲。工人姐姐可以分擔壓力，自己亦可以抽身做吓工作，有番少少私人時間都係一件好事，睇吓自己有冇能力負擔到。」

無能力做怪獸家長

能夠照顧好四個小朋友，已經是Lisa目前最大的心願，她笑言自己沒有條件做「四個小孩的怪獸家長」，根本無時間督促四個學習十八般武藝，所以她會讓孩子走開心學習的路線，培養做運動興趣，期待一家人集體強身健體！