唔准救生員望住晒！Coffee林芊妤囝囝起晒摃啤住人

撰文：KM | 圖片：Coffee@Instagram

Coffee林芊妤囝囝起晒摃啤住救生員

早幾日天氣好，Coffee同伯伯去游水，中間就發生一單小插曲，伯伯被救生員望，結果即刻起晒摃啤住人地！Coffee就將呢一幕影低，留言「咁好天，諗住同大佬去曬下太陽游下水。點知個救生員望下佢姐，佢就即刻起晒摃，仲搵個肚腩啤住人地#唔駛咁激動既大佬」

Coffee經常將伯伯的相片上載到Instagram，只見伯伯年紀輕輕已經肥嘟嘟，超可愛！

林芊妤同囝囝鬥搶鏡

早前Coffee已經喺社交網透露，由於老公係馬來西亞人，所以一家三口出發到老公家鄉怡保補擺婚禮。今日，Coffee就喺個人社交網分享多張結婚相，相中見到Coffee著上一身白色貼身長裙，設計非常簡約，而兩公婆更不時展露出喜悅笑容，真係好Sweet呀！

不過，雖然新娘Coffee好搶鏡，但其實囝囝都唔輸蝕㗎！相中見到Coffee單手抱住伯伯，伯伯同Coffee一齊著上白色衫，真係襯到絕！雖然阿仔露出個「天然呆樣」，但都真係好可愛！

林芊妤更留言：「以前總覺得幸福離我很遠，也是個不容易滿足的人，但自從有了這個家，我明白到其實幸福很簡單，只要他們在我身邊，我就是超容易滿足的女人，無論甜酸苦辣也覺自己很幸福。#謝謝老爺奶奶安排的後補婚禮 #很地道很有特色 #這也是非一般婚禮 #因為我們倆也只是配角#主角是伯伯#完場後他的衣服都變黑色了#哈哈哈」

遇2米高表弟Coffee瞬變小矮人

婚禮當日，Coffee都有邀請親戚朋友去婚禮，Coffee仲喺網上留言話，當日識老公嘅時候已經覺得佢好高，點知「原來佢成個家族既人更加高」，仲話：「我成晚都好似係森林入面既小幼苗🌱表弟⋯你係巨人族我係小人國既🤝#第一次感受到2米係我身邊既威力#對小人國黎講好震撼#差d係森林蕩失路#🤣」有咁強嘅家族基因，睇嚟伯伯睇時都可以咁高！