最怕帶囡囡出街食飯 陸永老婆：食得一啲都唔安樂
廣告
相信唔少媽媽都會為帶小朋友出街食飯而煩惱，永遠都要餵飽小朋友自己先食得，又怕小朋友扭計坐唔定。育有兩女嘅陸永老婆Reina亦身受同感，雖然囡囡而家已經會坐定定自己食，但噚日Reina都喺社交網站分享佢遇過嘅煩惱，仲話：全部都係過去式喇！
撰文：Sunday Kiss
圖片：missussix@instagram
陸永老婆：食得一啲都唔安樂
陸永老婆Reina噚日喺Instagram分享自己以前好怕帶小朋友出街食飯，因為往往要餵飽小朋友自己先可以開始食，到自己食嘅時候啲食物已經凍晒。而且小朋友會突然扭計，坐唔定想落地玩，陸永兩公婆就要輪流帶小朋友出街行。如果帶住小朋友同朋友食飯，就算想傾多陣偈都唔得，寧願快啲食完唔好嘈住其他食客。陸太話因為帶住小朋友食飯會食得一啲都唔安樂，所以佢都好少帶小朋友出街食飯。
不過以上嘅煩惱已經係過去式啦！陸太話囡囡已經大個女，可以自己坐定定食飯，唔洗爸爸媽媽餵啦！好叻女！
陸太分享兩個囡囡喺街食飯嘅相，見到大女Hannah等妹妹食完等到發呆，好可愛呀！
唔少媽媽級網民留言話身受同感，大呼：「完全係我現在嘅心聲！」。有媽媽留言分享自己會帶埋畫紙同顏色筆俾小朋友消磨時間，亦有媽媽試過因為小朋友嘈而被人以嚴厲眼神投訴。
