未出世先呷醋 趙海珠平定爭寵危機
迫仔獨立瞓惹反彈
現陀B女近九個月的珠珠，覺得今次懷孕經歷辛苦得多，尤其頭三個月，「上次都陀得幾舒服，冇嘔冇乜大肚婆會遇到嘅徵狀，係後期個肚大先開始辛苦，中間我仲可以飛美國旅行。但今次嘔得好犀利，頭三個月食咩嘔咩，對味道又特別敏感，一聞到炸大腸呢啲重口味就嘔。」幸好踏入懷孕中期開始舒服，而且今次身形比之前輕盈，更沒有受上次男性賀爾蒙影響，令皮膚變黑及面上長毛髮，「覺得今次自己陀得靚啲。」
當身體穩定下來後，珠珠與丈夫Vincent覺得是時候要教育囝囝，將變身大哥哥迎接妹妹出世，立即開始訓練他獨立。「其實囝囝一直同我哋一齊瞓，同一間房，當我哋一知道有咗嘅時候，就開始要佢自己獨立瞓覺，即刻買咗張床俾佢，搬佢去隔籬房瞓。」
臭脾氣一發不可收拾
豈料此舉惹來Hayden強烈反彈，急速的轉變令他難以接受，脾氣變得暴躁，他覺得因為妹妹的出現，父母就不再伴他入睡。「嗰段時間佢嘅脾氣特別差，每一日長時間地、任何嘢都可以觸動佢，一發脾氣就一發不可收拾，喊呀、發癲呀、扭計去引你注意，無論點做都好難平息到佢。」Hayden當時的妒忌心延伸至其他BB身上，去年底聖誕新年期間，他們與其他家庭一齊搞聚會，當Vincent去抱其他BB的時候，Hayden即刻喊着叫No！珠珠說：「因為我大肚唔可以抱佢，佢一扭抱我先生就抱，可能抱得多，佢就覺得爹哋只會抱佢一個。」
肚內的妹妹日漸長大，兩夫婦嘗試勸Hayden與妹妹溝通，亦不得要領，問他想要妹妹嗎？劈頭一句「No！唔鍾意！」問他會否與妹妹一齊玩呀？亦狠心說：「唔玩！」珠珠無奈道：「總之乜都係No！」
下頁：學校老師幫手輔導
家校合作輔導
珠珠反思過後，也覺得自己處理失當，太心急想訓練囝囝獨立，令他誤會妹妹分薄了父母的愛，「我哋其實做得幾錯，冇一個過渡期俾佢，所以佢覺得點解多咗妹妹，佢就要即刻過隔籬房瞓呀？佢好唔鍾意，覺得多咗個人要share佢所有嘢。」
發現問題要立即補救，珠珠從書本着手，購入一些以兄弟姊妹為題材的書籍，每晚向Hayden講故事，另外必須家校合作，商量如何攜手輔導小朋友。「有次學校家長日，我哋要去見老師，佢見到我大肚，就問Hayden知唔知有妹妹，我就講咗個情況佢聽，老師就話試吓喺學校同佢講媽咪大肚會點呀，BB喺肚內會點呀，出世後又會同佢玩喎，灌輸佢多啲。我都覺得學校呢part好重要，因為小朋友喺學校係另一角色，佢哋都好聽老師話。」Hayden返到屋企後，珠珠就多叫他摸摸肚子，多聆聽妹妹的郁動，開始慢慢接受了，「依家問佢妹妹喺邊度呀？佢都會好sweet咁摸我個肚，瞓覺前又會聽吓妹妹郁，講早抖，真係改善咗好多！」
行國際學校路線
要教好一個小朋友，學校的配合好重要，Hayden現就讀Woodland Pre-Schools，珠珠讚揚學校有愛心，課程輕鬆令小朋友返學開心，所以更受教。今年9月他即將升K1，轉到另一間國際學校讀書，珠珠希望他會一路行國際學校的路線，「我係本地學校出身，我先生就外國讀書返來，比較之下都覺得西方教育比較好。」珠珠坦言，都有被現今填鴨式教育制度嚇怕，不想面對TSA等功課考試壓力，「我先生特別抗拒，佢覺得小朋友冇必要背默咁多，放學仲要補習上興趣班，承受咁大壓力。」
下頁：大仔食物敏感不再
食物敏感完全消失
三歲的Hayden自成長以來，一直都有不同問題要處理，去年珠珠接受專訪時，提到他七個月大開始，一直與食物敏感搏鬥，對豬肉、Gluten Gliadin這種麥麩及麥殼蛋白都會敏感，經常出現一撻撻紅腫。
一年過去，Hayden已經戰勝敏感，珠珠解釋是他成長後，消化系統及免疫力提升而自然消失，「當時醫生都話，一年後可以再俾佢試食，大約到佢兩歲半，我哋再俾佢試食豬肉，開始冇乜發作喇，但我哋對佢飲食都好小心，例如nuts，歲幾時有朋友俾塊杏仁餅佢，食完成隻手腫起。其他家長都應該留意，小朋友試完新嘅食物有冇反應，尤其是有敏感底嘅小朋友。」
懷孕太輕鬆愧對細女
Hayden之前患有食物敏感，某程度可能是珠珠懷孕時戒口太清，她不吃豬肉，囝囝就偏偏對豬肉敏感，今次珠珠陀這一胎，除了生冷食物外，沒有再戒其他食物，只怕今次她好酸辣，會令細女的皮膚差。「唔理喇，依家先諗已經太遲，哈哈！今胎我食嘢方面好relax，豬肉都有食，陀第一胎時成日睇乜嘢唔食得，蟹、芒果、檸檬茶等等都冇食冇飲，真係戒得好清，今次乜都唔理，蟹都照食，其實西醫都話冇所謂，唔食生嘢就得，依家我成日叫凍飲，最多嗌少冰。」雖然陀得無壓力，但珠珠心底裏對即將出世的細女有歉意，「好似對佢唔公平，對佢一啲都唔緊張，你問我陀到幾多周，我都唔能夠確實答到你，我冇再因應第幾周去搵相關資料，又冇胎教、冇做孕婦瑜伽，反而花咗好多時間照顧大仔，希望囡囡出世後慢慢補償啦。」
珠珠訴心聲
「半職媽媽」 趙海珠 自告別做「輪后」，現轉職到DBC數碼電台開咪主持財經節目，今次珠珠來到《Sunday Kiss》做客席電台主持，接受聽眾「烽煙」講心事，珠珠竟然接到兒子Hayden的電話，要投訴妹妹的出現，究竟珠珠如何拆解他的妒忌心呢？
撰文：Ling
攝影：溫俊鏘(部分相片由受訪者提供)
