朱凱婷 ︰媽媽是最貼心老師

撰文: Ling
攝影: Paul Choi（部分相片由受訪者提供）
化妝: Henry Li
髮型: Jay Cheung@HAiR
指甲︰Nail Me
場地︰Mini Mandarins（tel: 2320 1128）

Heidi主力擔當財經、綜藝節目及活動司儀工作，工作時間彈性，其餘時間都全給女兒，Heidi認為媽媽是女兒最貼心的老師，是最貼心的home play玩伴，媽媽想做好身教並了解女兒，6歲前一定要給予孩子最多的時間，而且孩子在1至2歲、3至4歲及4至6歲都有不同教法，現在囡囡處於第三階段，需要多加培養其社交能力，希望囡囡能享受學校及群體生活。

Home Play好過上興趣班

媽媽要在工作及家庭上取得平衡絕不容易，Heidi慶幸能擔當時間彈性的工作，可以兩邊兼顧好，有自己事業之餘，囡囡亦好黐身，母女關係十分緊密。Heidi主張媽媽應多陪子女home play，好過安排上興趣班，「一日返學幾個鐘，屋企有十個鐘，上興趣班只有一至兩個鐘，點樣將返學同上興趣班學嘅嘢延續至屋企呢？媽咪可以多啲講故事，呢排有咩主題鍾意做嘅，我哋就focus呢類home play多啲。」

Heidi與囡囡每日進行各類home play，分不同時段，例如日間彈琴，夜晚臨瞓講故事，或者每日設不同主題，今日是Supermarket day，明天是Cooking day。而近來她發覺囡囡愛上畫畫及砌圖，每日加插了新時段。「佢係獨女，呢四年幾大部分時間係我陪佢玩，入廚房、去超級市場都係我帶佢玩，但近排我發覺佢有啲活動可以獨立做喇，好似砌圖佢可以坐定定砌半個鐘，唔使搵我陪，咁我一方面訓練佢玩嘅獨立性，我就從旁觀察，甚至盡量唔出現。」

Home play可培養孩子從生活中學習，好過紙上談兵，對發展親子關係更有幫助，Heidi說︰「親子關係應該係咁樣建立，因為媽咪嘅角色，由小朋友出世開始，媽咪就係最貼心嘅第一個老師，頭兩年小朋友未返學上playgroup，所以爹哋、媽咪以至成個家庭嘅身教係最重要，例如言談上嘅影響、性格同喜好嘅觀察，一發現佢對某啲活動有興趣，可以即刻從旁輔助，再按佢嘅興趣俾多啲需要佢，幫助佢發展。」

三階段湊女法

Sheryl現已四歲多，認識了不少同學仔、朋友仔，Heidi覺得現階段要多讓囡囡接觸群體生活，尤其她是獨女，更需要在外面學識與人相處，所以她每周安排一至兩日「朋友play days」給囡囡。「呢樣無論屋企俾幾多時間佢都培育唔到，除咗返學之外，應該要安排多啲群體活動，學習同輩相處。」

小朋友成長會經歷不同階段，各有不同需要，家長應作針對性教育，尤其6歲前最需要父母陪伴。Heidi認為一至兩歲主要照顧生活起居飲食；三至四歲可加入主題式教育，例如認數字、學英文字、睇書，作多方面教育及培養閱讀興趣；四至六歲就應該培育其社交能力。「我盡量陪佢身邊教導，我以前係一個工作狂，依家我都好鍾意做嘢，但我同先生都覺得6歲前一定要俾個女多啲時間，以前我哋話4歲，依家要extend到6歲，因為6歲讀小學會大個咗好多，突然大個到你唔信呀！」

母女關係建於媽咪付出

距離6歲尚有年多，Heidi已不捨得女兒長大，心情亦帶點矛盾，既享受母女黐身的時間，又需要訓練她獨立。「我係有啲自私好享受呢種特權，佢鍾意攬住我錫、擒住我抱，仲會同我一齊着母女裝，直到佢say no我就冇辦法喇。」

親密的母女關係建立於媽媽付出的時間與心機，「好似pillow talk，我哋每晚講完故事繼續傾偈，細個就講聽日嘅planning，我哋一齊做啲咩，依家我哋乜都傾，佢喺學校發生嘅點滴都會同我分享，Mami, I would share secret！好女仔咁乜都講。」Heidi最感動是囡囡仍對她很誠實，「Mami, I did some naughty thing today！其實佢只係唔記得執玩具，但佢咁坦白講出所有嘢，即使佢覺得自己曳曳，我都唔會鬧佢，因為我想佢相信我，無論佢做乜嘢媽咪都唔會審判佢，媽咪一定會接受，不過會加番啲教育俾佢，例如解釋做錯事嘅後果，下次應該要點做。其實教育都係其次，小朋友對你個trust係最重要，我會好好珍惜。」

讀書要有package

身為名女校德望舊校友的Heidi，暫未讓女兒跟隨步伐讀母校，改為安排她入讀St. Catherine’s PN班，幼稚園轉讀國際學校，但小學會升上國際學校或返回母校，則未有決定，仍在觀察女兒的性格喜好。Heidi覺得以前女仔多數入讀傳統女校，現在學校的選擇比以前多元化，但在現今教育制度下，沒有一個教育法是對所有人最好，只能選擇一個最適合自己孩子的方法。

她強調很喜歡St. Catherine’s的教法，但亦想把握讀國際學校的機會，希望擴闊日後的選擇。「佢好掛住PN班，但依家都讀得好開心，小朋友嘅適應能力好高，所以我哋係觀察佢邊方面吸收多啲去做決定。」

無論讀傳統學校或國際學校，都不一定讓學校的教育牽着走，最重要是看父母的引領。「讀傳統學校要裝備一啲嘢，讀國際學校亦唔代表要放棄中文或其他方面，父母應該執一套仔女需要嘅package。」

囡囡入德望要睇緣份

Heidi正為囡囡度身訂造package，暫時覺得她對傳統或國際學校都合適，「咁先煩，佢性格活潑，自學能力亦OK，呢樣國際學校好着重；但佢又可以坐定定做功課，好有心機坐到一段時間。依家做父母最大壓力係驚揀錯嘢俾仔女，所以我要俾佢多嘗試，多啲帶佢去school visit，入到間學校就feel到佢鍾唔鍾意。」

Heidi當然有帶她返母校德望參觀，甚至囡囡主動要求，Heidi最記得去年德望舉行周年concert暨annual dinner負責做司儀，囡囡在台下欣賞。「佢第一次睇我上台做司儀，平時佢只係睇電視，我見到佢睇得好開心，臨尾我仲拖埋佢上台一齊唱校歌，第二日佢已經識用cue card扮司儀，仲學埋我神緒講嘢。」

不過，最終讀邊間還看小朋友面試的情況，父母也控制不了，即使父母信心滿滿，孩子突然不在狀態，可能就是與該校沒有緣份，Heidi也認同道︰「我哋可以準備晒好多嘢，但最終佢喺邊間表現最好，都係小朋友自己同學校嘅緣份。」