李漫芬宣佈陀B女 老公陪開工超貼心
廣告
43歲TVB主持人李漫芬（Fanny）宣佈陀B女，恭喜恭喜！今年二月，Fanny同圈外男友Alvin結婚，九月再宣佈造人成功，將會喺出年三月做爸爸媽媽啦！Fanny接受訪問時仲話自己已經為B女改好名啦！
撰文：Sunday Kiss
圖片：fanny_man_fan_lee@Instagram
李漫芬宣佈陀B女
Fanny日前同老公談成坤（Alvin）夫妻檔出席銅鑼灣一間火鍋店嘅開幕禮。近日氣溫驟降，老公Alvin貼心為完成司儀工作嘅Fanny披上外套保暖，甜蜜爆燈呀！
Fanny喺社交網站話肚入面嘅小寶寶好乖，完全冇影響媽媽做司儀，好抵錫呀！
Fanny啱啱懷孕25周，但原來已經一早為BB改好名！佢話老公喺未識佢之前已經為將來嘅BB改好名，叫做「談凱嵐」，而佢自己亦諗咗叫做「談在心」，所以會喺兩個名之中揀一個。至於點解叫做「談在心」？原來喺Fanny覺得同人講嘢要用心，而且會好窩心。
Fanny話自己已經開始睇育嬰書，做定功課。佢話BB五個月嘅時候已經開始聽到聲，老公Alvin每日都會同BB講：「爸爸返工喇！」，然後BB又實係會郁，令佢十分感動！
Fanny希望可以順產，亦希望老公可以陪佢入產房，見證難得嘅一刻。老公Alvin仲話諗緊會唔會親手為B女剪臍帶添！
