李霖恩培育四驅女戰士
瞞李少光秘密玩車
「直路後彎轉急彎轉斜， 年齡無分參賽決勝者⋯⋯」吳婉芳主唱的《四驅小子》主題曲，相信勾起好多80後的回憶，《四驅小子》漫畫80年代推出，90年代初播映動畫版，熱潮席捲學界，Glen升讀拔萃男書院中一時，就迷上了玩四驅車。「中一開始有零
用錢，見個個同學都玩，咁我屬於窮困嗰班⋯⋯」筆者忍不住打斷他，你爸爸是前保安局局長李少光喎，「個個都以為我含住金鎖匙出世，其實我老竇都係由低慢慢讀上嚟，我老竇都唔係有錢屋企出身，我出世嗰陣老竇都係租人哋間房住。」當年的李少光在入境處任職，1995年才升上入境處助理處長，再一步步爬升至2003年接任保安局局長。李少光教仔嚴厲，沒給予零用錢給兒子，由細到大拒買玩具，但媽媽心軟私下俾少少錢，他就逐少儲錢買零件砌車，放學就秘密與同學玩車，隱瞞爸爸李少光。「中學有好多課外活動㗎嘛，成日走去牛津道坑渠度玩車，玩完就收埋喺書包，佢唔會摷書包㗎嘛，哈哈！當年幾十蚊有一架，儲兩三個禮拜就買到，但買完又恨囉，成日出好多零件，有啲好靚嘅殼，嘩見到同學仔個個都有，又繼續儲錢買。」
長大後有錢買到心頭好，卻沒時間玩，由中一至今砌過廿幾部戰車，現仍有十幾部未拆盒，「我鍾意以前四驅小子啲款，最鍾意一部叫『原始皇帝』，係壞人嚟㗎，同個主角係咁鬥，但我覺得部車好型。」他大嘆拍劇忙碌沒時間玩，現正拍攝《刀下留人》戲份較多，《愛．回家》五月拍完後亦有新工作安排，但最重要是怕自己太沉迷。「我一沉迷就要玩到最勁，我好驚會發生，我好易沉迷喺一樣嘢度，除咗女人之外。」
囡囡粉紅戰車出賽
玩四驅車都是80後一代最多，甚至已為人父，Glen希望四驅車能一直延續下去，教仔女玩四驅車好過行商場、玩電話，「玩四驅車喺親子相處好有幫助，因為四驅車好多零件，有摩打、齒輪、啤令、轆⋯⋯全部同真車一樣，點樣令架車運行呢啲原理，都可以透過四驅車教小朋友。」
Glen坐言起行，近來開始帶囡囡Gianna去自家四驅車場睇比賽，學玩四驅車，更砌了兩架粉紅戰車給她落場比賽。「佢好鍾意比賽，見到人哋比賽就好開心，所以第一部車係俾佢用來比賽，比完就想自己部車快啲去贏人，問人點樣改裝。」
Gianna有一顆頑強戰鬥心，但比賽總有輸贏，Glen覺得學識面對失敗最重要，「以前佢贏唔到會發爛渣，永遠都想第一，我同佢講爸爸同爺爺成日都輸，由細到大都會輸，有乜所謂啫，輸咗咪下次再勁啲囉，四驅車輸咗咪問人囉，爸爸唔夠叻就問場內哥哥，點樣將部車改得快啲，點樣唔飛出軌道，令佢更加勇於發問去改進。」
嚴控飲食減肥
5歲的Gianna仍在摸索嗜好的階段，玩車以外還有打跆拳道、騎馬、溜冰、游水、小提琴、英數及普通話等等，時間表排得滿滿，仲忙過大人，Glen安排如此多活動，主要想小學前找到嗜好專注發展。「佢唔覺得辛苦，小朋友精力好好，尤其係佢，俾佢做多啲活動減肥仲好。」
Gianna有keep住做運動，經常跳跳紮，但身形依然略胖，主要是飲食未控制得好，Glen無奈道：「佢唔單止食零食，最慘佢正餐都食好多，分量同大人一樣，一定要減少無無謂謂嘅食物，好似依家出街好多人認得佢，尋日同佢去街市，賣蛋哥哥都會俾糖佢食，一出街就好多人請佢食嘢。」不過Glen沒出面阻止，想測試她的定力，「我就睇吓佢點樣，我教過佢唔可以再食，我喺度佢都好乖冇攞嘅，但我唔喺度佢一定攞，即刻食㖭呀！」
(左圖) Gianna有兩架戰車，一架是這部白粉紅戰車，另一部是粉藍加粉紅。
(右圖) Gianna愛玩動態活動，爸爸不怕她變得男仔頭，因為她太貪靚，甚麼都要粉紅色。
升讀拔萃小學
Gianna參加過兩輯《爸B也Upgrade》後，第一輯被人批評她有公主病，Glen揚言一定會教好她，果然第二輯乖巧了不少，其進步亦得到學校肯定，上年獲頒「最佳進步獎」，Glen大讚學校對她的影響最大，着重訓練紀律，其次是做個好榜樣給弟弟看。「我成日話你係大家姐，成個李家家族你最大，我同我老婆嗰邊都係，你真係一個大家姐，兩個表妹一個表弟，同埋細佬，所以佢就識乖喇。」
「大家姐」即將升小一，幸運地因為爸爸校友加分，入到九龍塘熱門學校拔萃小學，「我讀嗰陣係男校，依家變咗男女校，教學仲好OK嘅，我做兒童節目嗰陣有拔小學生上來做話劇，啲英文幾好喎，又好有禮貌，俾我印象好好。」當年他拔小畢業後直升男拔（現已脫鈎），他最懷念兄弟同心的拔萃精神，「我79年出世嗰屆，我哋成班拔萃仔仲會出嚟食飯，有學界比賽仲會一齊出去睇，個個都三張幾四張嘢㗎喇！佢哋都有嚟呢度玩車！」去拔小交表時，Glen重返母校，覺得學校先進了許多，「校舍靚咗好多，仲有多咗個小食部，多咗好多嘢食。」
人緣比讀書重要
相對姐姐，兩歲多的弟弟浩宜性格專心好多，為人慢熱，將來讀書成績應該更佳，Glen因應浩宜的性格，安排了另一條國際化的讀書路，棄宣道轉讀樂基幼兒學校PN班，即將直升K1，他解釋：「佢性格適合國際學校長大，可以自由啲，同埋我想佢思想開放、social啲，相反Gianna就唔啱，讀埋國際學校，佢6歲就離家出走喇！哈哈！」他坦言女兒讀書不太叻，曾考過女拔失敗，但她人緣好喜歡social，相信小學生涯會過得快樂，「人緣好比讀書叻更加重要。」
