杜雯惠陳錦鴻 助兒子衝破社交障礙
撰文:Ling
攝影:Sing Ho(部分相片由受訪者提供)
場地:ELEMENTS圓方
杜雯惠陳錦鴻 助兒子衝破社交障礙
講故事最有力量是爸爸
身為舞台劇演員和電台節目主持的Ada，與小朋友講故事有一手，更吸引到兒子愛上閱讀。近期Ada最愛講英國經典童話《雪人與雪狗》（The Snowman and The Snow dog），圖畫盡是雪景和可愛雪人，好有冬日氣氛，兒子也聽得投入。Ada指出其實故事書對小朋友並非靈丹妙藥，重點是講者與小朋友關係的化學作用。「其實小朋友聽到故事同童話，唔係一定會好開心、好有夢想，點解家長應該盡量抽時間同小朋友講Bedtime Story，係因為呢個係親近大家嘅好途徑。」好多家長與小朋友的所謂溝通，只流於關心學業方面，例如：「做晒功課未？聽日默書溫咗未？今日有冇曳？」這些不是真正的溝通，家長可以透過講故事與孩子進入另一空間開心談天，「故事嘅Magic就喺呢度！」Ada說。
她又發現有日本報告指出，講故事最有力量的人是爸爸，為甚麼呢？「唔係因為爸爸講得特別生動，或者把聲特別好聽，係因為爸爸工作忙，接觸小朋友比較少，當佢肯抽時間同小朋友講故事嘅時候，小朋友會好開心。」
講《新上海灘》故事教選好女仔
爸爸陳錦鴻深明自己的力量龐大，每日都抽時間與兒子講「故事」，由自己的童年講到工作經歷，Ada笑說：「佢會講細個點畀嫲嫲同媽媽話佢，喺學校自己同同學經歷過啲咩，到依家阿仔大個，佢就講工作上嘅嘢，好似今日爸爸去咗邊度見咗咩人，工作成點呀。其實小朋友好鍾意聽，原來爸爸以前係咁㗎？」
父母的一切經歷都可化成故事，陳錦鴻連拍過的劇集也變成故事，20集已經有排講，Ada覺得老公講《新上海灘》最好笑。「《新上海灘》有成40集，佢將許文強同丁力嘅經歷，每晚抽重點同個仔講少少，個仔一瞓低佢就話講故事喇，今日講到第15集，個仔就記得提佢上集講到馮程程點點點。」
Ada看到兩父子講故事會講到拖手仔和抱抱，不敢做「小三」，只會在門外偷看，見到兒子對《新上海灘》大感興趣。「透過許文強和馮程程的故事，老公又灌輸到拍拖嘅嘢，教佢點揀女仔，丁力嘅缺點原來佢身邊同學都有，都幾得意嘅。」
學業成績好社交能力較弱
喜歡寧靜的駕樺聽故事聽得多，自自然愛上閱讀，每朝一起身就看書，返到學校又在班房的藏書閣逐本翻閱，Ada提醒家長要培養小朋友閱讀習慣，絕不能強人所難，可以在家中營造閱讀氣氛，孩子一有空間就會拿起書本。「我老公好鍾意睇書，我都會買好多書擺喺屋企，畀阿仔隨時拎嚟睇。」
在主流學校讀小五的駕樺，小一曾考第一名，現時成績亦處於中上，以英文科最好，普通話和電腦科亦不俗，惟中文閱讀理解仍需努力，Ada對兒子的成績感到非常滿意。「其實就算考得尾都冇咩問題，我覺得讀書唔可以迫，應該喺開心、好想返學嘅情況下學習；即使讀書好叻，但覺得學習係一件苦差，我覺得唔係一件好事囉。」
駕樺覺得返學OK，肯主動學習，Ada已經心滿意足，在學業上放手讓兒子決定一切，自己學業自己負責，惟兒子在社交方面仍需輔導。「佢仲未好識表達自己，有時唔小心撞到同學，佢就即刻講『對唔住，我下次唔敢喇。』但有時唔係佢撞到人，唔係佢做錯事，佢都照講對唔住，佢唔識得變通。我哋依家教緊佢唔係自己做錯事，就唔好道歉先，應該話畀人聽唔係你做。」
小二才學識猜情尋
駕樺至今朋友不多，因為他連一些簡單的玩意如猜情尋也不懂，沒有同學願意和他一起玩耍，Ada說：「佢到小二三先識猜情尋，佢識出包剪揼，但我出揼佢先慢慢出剪，我出包佢慢慢出揼，佢覺得贏咗人哋會唔開心，佢唔識同時間出，所以好難同人玩。咁簡單嘅遊戲我都用咗好多方法教佢，同佢講一個遊戲要有贏有輸先好玩，要同一時間猜先好玩。當然我都想佢同其他小朋友玩，但我唔會迫佢，佢覺得小息買啲飲品小食同人分享已經好開心自在，咁就繼續喺嗰個corner自己享受，等佢慢慢融入人群。」
由於社會文化有變，Ada認為現在校園欺凌的情況比以前嚴重，令她近年積極推廣相關教育，她認為社會大眾不應只關心受害者，欺凌的一方背後亦可能有家庭問題。「本身個小朋友開心，點會透過蝦人去得到快樂？一定係佢屋企有問題，或者有啲事影響到佢。」
訓練孩子面對言語欺凌
Ada坦言兒子在學校「有畀人蝦」，主要是言語上，有時是兒子出問題在先，令同學有說話。但她不能事事出面擺平，要教導兒子如何面對和解決輕微的欺凌。「我問佢你想唔想畀人蝦？唔想就下次咁做就得㗎喇，你試吓吖！如果佢面對嚴重欺凌，令佢身體同心靈上受到好大打擊，咁我當然要處理，但暫時都冇，學校嘅小朋友都好乖，即使有啲同學會蝦佢，但好多同學都對佢好好。返到屋企佢會同我講學校嘅事，今日同學點樣，講完佢就去玩，第二日又開心返學，證明呢啲事對佢影響唔大啦。」
她建議同路家長，當知道小朋友遇到校園欺凌時，要想清楚三件事：對小朋友的影響、小朋友是否有責任、能否自己解決。「如果影響好大，當然要介入處理。校園係社會縮影，我哋始終要畀小朋友及早面對，我哋唔會永遠喺小朋友身邊，將來大個佢面對呢啲事，唔會係你幫佢投訴同鬧番人，佢都要自己處理。」
揀學校最重要老師有愛心
小朋友的反應好直接，未必懂得接納有特殊需要的小朋友，需靠老師從中調解，Ada特別感謝學校老師的幫助。「好多老師都好錫佢，知道佢有好多問題，包括情緒、社交、論盡，老師會特別關注佢，例如佢好怕聽到鬧人聲，當老師想鬧人嘅時候，就會先同佢講：『老師唔係鬧你，我依家要鬧佢哋。』我覺得大部分老師都好照顧到學生。」看到老師有愛心，兒子多方面的進步，證明Ada和錦鴻當初選擇主流學校是正確的。「揀一間學校唔好成日諗名校，或者幫到將來升中學，其實一間學校最緊要老師有愛心，即使學校唔出名，小朋友都會鍾意返學。」
Ada和錦鴻已開始為兒子計劃升中事宜，至於繼續留在主流學校還是國際學校，他們仍未有定案，心儀國際學校的原因是校風比較接納特殊學生，老師的反應正面，著重特殊學生的優點，而且兒子熱愛英文；但主流學校是香港社會的縮影，讓兒子提早接觸是一件好事。
Ada曾參觀過一間國際學校，當老師聽到駕樺的情況後，即指出自閉症的他一定有其他優點，令Ada十分感動。她笑稱兒子除了英文好、愛閱讀之外，最近發掘到多種新興趣，主動提出學打乒乓球，更愛上拍片剪片和STEM教育（即科學、科技、工程和數學），駕樺將來隨時成為一個出色的IT人！
