林曉峰 康子妮 培育兩個超級丹

升呢做體院潛質精英

被林爸爸戲稱為「林丹」的阿Lo，在圈中出名打羽毛球叻，常孖老婆和圈中好友打波，「尋日先同李克勤打完波！」鄭伊健、陳奕迅、趙增熹、Eric Kwok都是兩人波友，阿Lo與趙增熹更參加過全港羽毛球錦標賽，又偕老婆拍住上出戰混雙，同阿仔又玩親子雙打賽，有大型比賽一家四口都去睇波，所以兩個仔自小跟隨父母愛打羽毛球。「我哋六年前開始打，愈打愈鍾意，初初兩個仔仲讀緊幼稚園，幫手執波、掉波，慢慢佢嘅想打，就俾個細拍佢哋，打打吓有教練覺得佢哋有潛質，開始安排上堂，兩三年就進步得好快，每個人都應該發展一技之長，既然佢哋呢方面有潛質，我哋就培養佢。」子妮說。

林寶和林熙加入體院精英培訓計劃分別三年及兩年，亦在體院潛質運動員獎學金計劃名單之中，每星期到體院訓練兩至三日，加上校隊練習，最少五日放在羽毛球上。密密的練習，子妮稱兒子曾出現抗拒練波的時候，「打波係好玩、有挑戰性，但成功背後要付出，好多體能訓練，例如打個超高波五分鐘，都好想死.，仲要係細路仔，佢都會好，有想放棄嘅時候，但羽毛球訓練可以磨練到佢鬥志，我.唔係要佢打到好出色，只係自細發展咗呢個skill，將來大個佢當玩又得，想當職業又得，呢個skill可以為佢哋帶來好多嘢。」

阿Lo和子妮早為他們鋪路，爬上階梯升級至今，有興趣小朋友可先參加羽毛球總會主辦的「青苗羽毛球培訓計劃」，課程為期一年，獲選者進入分區青年軍受訓，再上重點青年軍，之後拔尖加入體院，而林寶和林熙更早加入體院計劃，中間省卻了部分過程。

蔡繼有升中一學自立

林寶和林熙同為保良局蔡繼有學校的羽毛球校隊，蔡繼有初期沒發展羽毛球，直至林寶升讀三年級，學校發現有幾位學生同為體院小精英，亦是受歡迎運動，決定成立羽毛球校隊，邀請專業教練帶隊，學校亦正加建室內運動場，不必再出外租場地，讓學生專心在校內打波。
蔡繼有標榜愉快學習，每個學生應有一技之長，正與阿Lo和子妮的教仔理念不謀而合，「呢種材能唔一定係讀書，可以係其他，學校有好多配套培育學生，有室內泳池、露天球場、電腦係蘋果，設備好完善。但最主要係因為校長（劉筱玲），劉校長嘅教學理念好好，完全唔係填鴨式，希望小朋友開心得愈耐愈好，小學階段冇分數計，默書叫挑戰站，令到件事變得唔緊張，好似玩咁。」

兩子分別就讀Year 6及Year 5，Year 6已相等中一程度，學校對學生的要求高了，需要學生自立，雖然是同校直升，但林寶顯得不適應，常漏交功課、不懂take notes及分數退步等等，以前老師會追問，甚至致電家長查詢，升中後即使漏交三份功課，老師都不再追問亦沒寫手冊，好易有遺漏，但阿Lo和子妮不擔心，由得兒子學習自立，他謂以前就讀名校聖若瑟英文書院，一樣重視自立，靠自己發憤，相信兒子慢慢會有改善。

蔡繼有在圈中口碑甚佳，視帝郭晉安及歐倩怡（Cindy）的大仔郭令山正讀小一，選校時安仔和阿Lo拍劇有交流心得，子妮讚Cindy早已做足功課幫兒子入學，不過她們在學校沒有碰面，「我哋依家接放學唔使落車，阿仔會自己落嚟，佢個仔細啲要上學校接，所以好少見。」

被人鬧太早誕B

轉眼間兒子已11 歲，阿Lo和子妮開始多空間工作，子妮更希望重拾音樂夢想，從事有關親子音樂的工作，好友伊健早已賞識子妮的唱歌天分，邀請她擔任演唱會和音。廿多歲就結婚生仔，回想起來，子妮覺得有仔趁嫩生的決定非常正確，「咁早就要投放所有時間俾個仔，自己..要擱置，係咪啱呢？初初都有疑惑過，當時身邊好多人話我唔做嘢，成日要解釋，但依家望番轉頭，好彩我係咁做，如果唔係我同小朋友.關係，唔會好似依家咁friend，我仲後生可以陪打波，亦儲夠人生經驗，可以開始事業新一頁。」
阿Lo慨嘆娛樂圈好奇怪，興遲婚遲生B，甚至為事業唔生B，「開頭人啲覺得我30幾歲人，咁快結婚生仔，香港娛樂圈不嬲都係拍拖、結婚唔好俾人知，唔好咁快有細路仔，最好唔好有細路，個個都係處男處女，荒謬到不得了。」

伊健拒生 嘉樂悔遲生

婚後阿Lo明言想盡快組織家庭，順利兩年抱兩，頭幾年阿Lo為湊仔減產，被人指指點點，事隔多年大家轉晒軚，變成羨慕他的兒子大個仔，「好多人依家同我哋講：『你哋就好啦，啲細路咁大個，好開心呀！』佢哋冇諗過，當年有幾多人話我哋太早婚呀。」老友錢嘉樂、陳小春都是四十多歲才為人父，現在也大嘆後悔！「嘉樂成日話我醒，你咁早就生，佢個女先得一歲幾！我話一早同你哋講架啦，快啲結完婚快啲生，可以多啲時間同細路仔玩。」阿Lo笑言，一班古惑佬以前圍埋講事業，現在話題都轉向兒女，一見面就晒命，「你個仔就咁大，你睇我嗰日同佢去邊度玩呀，你個女又幾得意喎……」子妮笑他們已變成一班師奶。

連謝天華老婆都生咗，古惑佬中獨欠伊健無所出，他會否見大家晒命晒得咁開心，改變主意生番個呢？阿Lo斬釘截鐵指伊健毫不羨慕，「佢講咗好多年話唔會生，但好得意係，好多人都想佢生，幾監人乃後喎，我哋四個做兄弟，每次聽到啲人咁問佢覺得好笑囉，點解你哋覺得佢會生呢？佢都講.唔生咯，結婚唔一定要生仔，食飯都可以食意粉架嘛。」好啦，大家唔好再迫伊健喇。

●撰文： Ling

●攝影：黃大立（部分相片由受訪者提供）