【陀B八個月】Coffee粗身大細身手靈活做瑜伽 網友大讚：「最強孕婦」
撰文：Sunday Kiss| 圖片：coffee89921
懷孕八個月與老公遊世界 晒「老公視覺」Fit爆靚相
最近同老公四圍玩，歎世界嘅Coffee，不時都係社交網大晒旅行靚相。早前，更分享咗數張身穿比堅尼的相片晒孕肚，陀B8個月嘅Coffee留言話：「肥仔（老公）話我而家似企鵝..」
其實相中Coffee四肢依然十分纖瘦，網民紛紛佢身材Fit爆呀！仲好好奇究竟佢係點做到！
Coffee粗身大細 身手靈活做瑜伽 網友大讚：「最強孕婦」
原來佢去旅行都唔會偷懶，堅持每日做拉筋運動同孕婦瑜伽。近日，佢就分享咗一段短片，片中Coffee喺酒店床上做各種高難度的瑜伽動作。
接下來嘅高難道動作，真係睇到網民嘖嘖稱奇，有網民大讚Coffee「動作靈活嘅大肚婆」、「簡直係最強孕婦」！另有網民笑言：「BB喺肚裡面會唔會以為坐緊雲霄飛車」、「BB會唔會頭暈呀！？」
放長假心情大靚嘅Coffee亦好有耐心咁回覆網友，亦提醒其他準媽媽：「建議可做一些簡單的床上伸展操，但不是每種瑜伽都適合孕婦做。」
準媽媽Coffee教路 5招去水腫 有效去肚紋
現時懷孕31周的準媽媽林芊妤（Coffee）身材Fit爆相信大家都有目共睹，雖然眼見Coffee終於變「大肚婆」，不過陀B八個月亦只得33吋腰，實在令一眾準媽咪羨慕不已呀。
Coffee早前就拍片親身示範，教大家簡單的初級瑜珈，20分鐘可以減肥、排毒、拉筋及改善痛症，最重要就是孕媽媽都做得，有效減少肚紋、去水腫，各位孕婦都不妨一試。
首先預備一個枕頭或block放喺墊子上，然後可以坐喺block上面。然後，雙腳翹起，盆骨高過膝蓋。
坐低時記得把臀部肌肉推出去，這樣人可以坐直一點，然後將人放鬆。
動作一
將雙手從身體兩側慢慢升起。
控制呼吸，然後將個人扭到右邊，頭轉向後，並將右手放到身後。
再慢慢吸氣將手拉向上，呼氣拉長腰側，然後將個人扭到左邊，重複上述動作。
動作二
升起雙手，左手捉住右手，將人拉向右側。同時記得要打開心口，眼望向天花，拉動腰側，直至感到腰側有種拉著的感覺，然後返回中間，左右重複。
動作三
然後將雙手放在大腿上，上身向前扭一圈。每次身體向前時呼氣，身體往後時吸氣，每邊各做5下。
動作四
保持上身拉直身子，然後慢慢將雙手沿腳拉到腳踝的位置，此刻小腿後方會有拉伸的感覺。背部不用彎曲，頭望向前方，吸氣身體落下，呼氣身體拉回向上，重複動作5次。
動作五
手同膊頭成直線，臀部同膝蓋都成一直線。如果是孕婦的話，就將腿打開少少，然後將臀部升起。這個時候會覺得肚臍有股力量拉住，慢慢呼氣，將肚往內收。
把雙手慢慢趴向前，臀部向上挺，然後把心口貼向地面，下巴同樣貼在地上，維持十個呼吸。
完整版本：
貪玩媽媽Coffee：「去旅行能醫百病」
懷孕後期都要去玩嘅Coffee，早前上載了一張疑似坐在輪椅上的照片，引起關注。身在沖繩的Coffee就親自回應表示，當時佢與老公要行上一個叫首里城的地方，路程要十多分鐘，行行吓自己覺得辛苦，所以老公叫她坐在輪椅上。其實喺嗰度嘅設施，俾有需要嘅人用，叫大家毋須擔心呀。
被問到點解懷孕八個月仲膽粗粗四圍走？Coffee就大派定心丸並表示，全部都有問准醫生先做，醫生只吩咐唔好坐長途飛機，短程可以，而且34周先唔好飛，仲有成個月，同埋旅途會租車。
來到最後一天，只能夠說去旅行的確能醫百病。
做孕婦瑜珈安胎 準媽媽Coffee自爆胎盤低盼順產
不經不覺已經陀B7個月嘅Coffee，今日係社交網有感而發，大嘆「不是所有懷孕過程都是順利的，孕婦經常會遇上不同問題，例如妊娠糖尿或胎盤前置等等…難免不習慣有挫敗感和心情失落…」
Coffee又話自己仲可以自由活動，唔需要好似其他有相同狀況嘅媽媽一樣「臥床安胎」，已經屬於係比較幸運嘅「胎盤低媽媽」。
佢又透露自己希望可以順產，但因為胎盤位置低，要視乎之後「B仔」的狀況及胎盤位置，才能決定是否需要開刀，因而感到挫敗、心情失落。
不過，一向樂觀嘅Coffee坦言：「明白到不是所有事情也能控制的，現在的生活節奏也要慢下來了！做做簡單的孕婦瑜珈乖乖安胎，再等三個月就跟BB見面啦！」為自己以及一眾準媽媽加油打氣。
「不是所有懷孕過程都是順利的，孕婦經常會遇上不同問題。例如妊娠糖尿或胎盤前置等等，原因不一定是因爲媽媽問題，很多先天和後天的因素影響著。但因不是一般正常的孕婦，而要改變正常的生活和工作，難免不習慣有挫敗感和心情失落。而其實我也是胎盤低的媽媽，有很多媽媽告訴我她們要一直睡床，而我屬於較幸運還可以自由活動。但為免出血還是要比正常孕婦小心，如果到32週後胎盤還未上升，就是胎盤前置很大可能要剖腹生產。對於我一向打算自然生育，也同時活躍於自己的工作和生活，當然一樣感到某程度的失落。但明白到不是所有事情也能控制的，現在的生活節奏也要慢下來了，做做簡單的孕婦瑜珈乖乖安胎。再等三個月就跟BB見面啦！跟自己說聲加油！」
醫生早預告係大碼B
Coffee有咗7個月，但係一直都未現「巨肚」，網民都話佢就算生完應該都唔似生過！
其實Coffee之前去產檢，醫生已經話咗佢長胎唔長肉，陀咗一個大碼BB。
日前Coffee再去產檢，醫生就話BB頭大肚大腳短，不過愛美嘅Coffee一於少理，仲話只要BB健康就足夠！
為咗保持健康，Coffee除咗Keep住做瑜珈之外，日前仲陀住「肚腩仔」去游夜水！
今次着起三點式，終於覺得Coffee似係「大肚」喇！連佢自己都笑，「肚腩仔」而家變咗「大肚腩」喇！
