梁詠琪母女合體 母親節主題照作日後紀念
撰文：Sunday Kiss | 圖片：梁詠琪@微博
梁詠琪母女合體 母親節主題照留作日後紀念
梁詠琪Gigi日前攜囡囡Sofia一起拍攝雜誌封面照，她在社交網上載了數張靚相同大家分享，並留言：「這次的Elle封面拍攝與別不同，因為我也帶上了Sofia和我一齊拍照，她也不經意地做了我的小model，為母親節的來臨拍了一組甜甜蜜蜜的mother and daughter照片，留為日後紀念。謝謝Elle團隊們的專業，和一切的，美好時光。 」
照片中，Sofia清秀又深邃的五官再加上一雙與生俱來的小長腿，簡直遺傳了外籍爸爸和媽媽梁詠琪的所有優點，今次母女合體相當吸睛，引來網友們大讚。
梁詠琪同囡囡Sofia互動自然，囡囡望著鏡頭甜甜笑，又得意又上鏡。
香港站演唱會 會否再次帶囡囡登台？
母親節即將到來，梁詠琪接受訪問時透露，今年送給家人的最大禮物絕對是她的香港站演唱會，她表示，因為之前沒有想過能夠舉辦成功，這次剛巧碰上紅館有檔期，對我和粉絲來說都是好消息，始終我是在香港長大，而且能夠和演唱會原班人馬合作，令我感到很圓滿。
先前，梁詠琪在北京舉辦《好時辰世界巡迴演唱會》，曾帶著可愛囡囡Sofia登上舞台，母女一同手拉手唱《My Little Sofia》，Sofia全程不畏懼還觀眾揮手、說謝謝，頗有台風。
Gigi在社交網留言：「Sofia在家中都很喜歡唱歌跳舞，我忽發奇想，如果這個演唱會有她的參與，將來可以給她重溫這次跟媽媽一起上台的難忘時刻。10000人同時尖叫那一刻，我也很怕會嚇到她，還好她算蠻淡定的，還懂得和觀眾揮手和說謝謝，很乖乖，哈哈！」
梁詠琪親手炮製造型蛋糕
適逢經紀人的仔仔生日，全能媽媽Gigi親手整了一個造型蛋糕為他慶生。她留言：「今天與經理人的小孩一起慶祝生日，這次給小孩子做了一個比卡超蛋糕，很有滿足感！從來沒有玩過pokemon的我，第一次感覺自己和比卡超那麼近！」
蛋糕超逼真，外型完全不輸給在蛋糕店賣的。
其實，這次已經不是Gigi第一次整呢種蛋糕，早在囡囡Sofia生日時，她就超用心地為女兒親手整了一個公主蛋糕，當時就獲得網友激讚。
梁詠琪 多元催谷寶貝女
小朋友入學，有得揀梗係揀名校。除了歷史悠久、校風純樸、成績優越同埋講個名出嚟都威啲外，對不少原校畢業家長來說，子女可以入讀自己母校亦係一種情意結。眨下眼，梁詠琪女兒Sofia今個月底就滿三歲，亦係時候為入小學鋪定路，據知情人士透露，雖然丈夫Sergio是西班牙籍、Sofia從小就用英文與父母溝通，GiGi卻沒有打算讓Sofia入讀國際學校。反而因為自己從瑪利諾修院學校畢業，一心希望囡囡都做埋師妹，可以接受傳統本地名校教育。
全天候培育
Sofia係獨女，再加上媽媽曾經就讀係校友，分數夠廿分，想Sofia入瑪利諾可以說已經是十拿九穩，但係依家競爭大，校友都爭崩頭，所以Sofia開始認字、夠大入幼稚園，GiGi親力親為陪玩陪學並非谷識字計數，反而係多元發展，希望Sofia從玩樂中學會思考發揮創意。當其他星媽送仔女去playgroup、幼稚園，借別人之手教女時，一樣要開戲開演唱會的GiGi盡量陪在Sofia身邊，一收工一有時間即撲回家陪女。從其個人IG可見，GiGi會陪女整糕餅麵包、讀故事畫畫、廢物利用DIY勞作、還會經常母女陣去圖書館打躉，費盡心神揀有意義圖書同囡囡一齊閱讀。兩母女最新最愛書籍就相當有意義，是女性教育活動家兼諾貝爾和平獎得主馬拉拉的繪本。
教養女兒話晒事
至於如何培育女兒，西班牙老公有冇話事權，據知情人士透露，兩公婆雖然恩愛如昔，不過家中大小事一向都係GiGi話事，再加上自小父母離異由母親獨立撫養，自己入學受教育亦都一直係梁媽媽一個搞掂:「始終香港係GiGi地頭，Sergio好放心交畀老婆負責、囡囡暫時都係留喺香港長大接受教育，喺邊度讀書就應該畀老婆決定。GiGi由Day 1知道係陀女，就一直有個心願囡囡可以做埋自己師妹，所以咁多年母校有活動都好有心參與，瑪利諾依家邊個校長、邊個係修女佢全部都知，又同好多校友有聯絡，就係想一直掌握住母校收生情況。GiGi 性格係咁，決定咗就唔想有意外一定要達成，所以本來諗住快快生多個，但為咗搞Sofia升小一鋪路入學啲嘢，都係遲啲至算。」
全家合體接收工
生女之後萬大事大不過湊女，GiGi雖然繼續接job開騷，不過每年只接一套電影。去年全力拍完即將上畫的電影《西遊記之女兒國》，今年就宣布參演關錦鵬導演、拍住鄭秀文、趙雅芝開拍《八個女人一台戲》，力爭可以有更多時間陪女兒成長。日前 GiGi在中環為新戲開完工，難得收工天都未黑，即趕去金鐘會合老公同囡囡，齊齊去超市買餸返屋企玩煮飯仔。有媽咪全心全意培育，Sofia精靈又乖巧，在太古廣場停車場一見媽媽雀躍萬分、拖住父母手仔開心笑跳跳紮、去到超級市場有好奇心得嚟又好聽教聽話，全程跟住媽媽 乖乖行，臨走仲好有禮貌同父母一齊同記者道別。外形標緻可愛、性格又好、仲得媽媽真傳愛閱讀又愛自己動手做勞作，品德同學術同樣出色，咩學校都實搶住收！
