棟篤笑表演者Matina：「成為全職媽媽後，我知道咩叫坐監！」
撰文：Joanne 圖片：Simpson（部份相片由受訪者提供）
生BB好大衝擊
在成為媽媽之前，Matina 是在美國生活的「Slash 斜槓族」，生活自由度大。但在39歲那年，經歷過兩次流產後，原本以為應該與孩子無緣的她，竟然意外懷孕，突然成了高齡產婦，對她而言，絕對是一個很大的「驚喜」！「因為係第一次，所有嘢都未經歷過，好新鮮！例如你聽過生仔會好痛，但係你唔知實際係有幾痛，所以所有嘢都係挑戰同驚喜！」
全職媽媽＝坐監？
大女出生後，Matina決定放下工作，擔起全職媽媽的角色，「我唔似有啲媽咪咁，未有小朋友之前有高薪厚職，有份專業。我之前喺美國生活，喺醫院做過翻譯，做過平面設計，做過教會秘書，喺有BB 之後，就諗要做個專業嘅媽咪同湊仔婆。」
本身是個自由身的人妻，人生突然被一個人仔縛住，對Matina來說，絕對是個很大的衝擊！「第一次做媽咪，對BB 每個階段都會好緊張，BB一個月會係點，一個月零一個禮拜個發展又係點，經常都會上網search，唔知自己有咩做錯。」
一步一驚心的照顧了大女兩三年，Matina又意外懷孕，到細女出世，已經有了經驗，沒有那麼手足無措，不過生活就更加忙碌！「有時連坐低食半碗飯嘅時間都冇！冇小朋友嘅人係唔會明架！」
感恩有丈夫支持追夢
9年前，Matina回港渡假時，參加了一個棟篤笑工作坊，自此就愛上了這項表演，「我相信自己係有啲幽默感嘅，同朋友一齊嘅時候，通常都係負責搞笑、搞氣氛。」直到現在，Matina仍然會與一群志同道合的朋友作定期表演，素材就主要圍繞自己的家庭生活，而她也很珍惜可以上台表演的時間。「因為我知道每一次可以出門口，做自己嘅嘢都係一種恩賜！好多謝我先生嘅支持，如果佢知道我要出show，一定會早啲返嚟湊女。」
想阿女每日大笑一次
以自己的家庭生活，作為娛樂觀眾的材素，那Matina又會如何令到家中兩個女兒活得快樂呢？「我會盡量提醒自己，唔好咁忟憎，盡量將幽默感早啲灌輸俾佢哋。喺屋企我成日都會同佢哋做啲好Silly嘅嘢，例如作啲好傻嘅歌呀，得閒就同佢哋好即興咁跳舞，亂咁跳，咁佢哋就會好開心架喇。」
「我曾經寫過啲目標俾自己，每日嘅目標，就係每日引到佢哋大笑一次，如果做得到，咁我就好開心喇！」
母親節開Show
下一頁︰爸媽陪罕見病兒成長 滿載小確幸
