森美同太太恩愛23年：我老婆比發嫂要次一級！
原文：東方新地｜圖片來源：新傳媒圖片庫、森美FB
森美 帶太太扮助手出國
生活被工作和兒女佔去大部分，問到森美同陳豪仲有冇時間同太太拍拖？森美話：「係少咗嘅，不過可以自己爭取。我最近開始帶團去四國玩，人哋畀我帶一個助手，我就當太太係助手，帶埋佢一齊玩囉！不過呢個助手好唔合格，第一個trip唔記得帶passport，第二個trip就狂買嘢，搞到我推住篋仲要手拎七袋手信同零食！」
陳豪笑答：「哈哈⋯⋯其實仔女瞓咗之後，我哋都會去吓街、睇吓戲。不過老老實實，自從四年前大仔出世，我哋兩公婆都學識咗片斷睡眠，未試過有一覺係可以瞓耐啲。屋企好熱鬧，由朝早五、六點開始阿女醒，一直嘈到夜晚八點三個瞓晒覺，依家一有時間，我同Aimee都係爭取時間瞓咗先，因為第二朝又打仗。」
問佢哋仲記唔記得第一面見太太嘅情景？第一下過電又係點解？森美憶述：「我一入行就識太太，成23年前，不過仲記得好清楚。第一次見面係商台大堂，佢喺度派緊果汁橡皮糖，周圍問人食唔食，嗰次我係冇食到嘅⋯⋯真係有感覺就係幾個月後我哋呢班DJ訓練班準備上台比賽，我係佢前一個出場，臨出去，佢叫我幫佢綁鬆咗嘅蝴蝶結。條裙係條碎花長裙，個蝴蝶喺佢背後，就係嗰一下，綁出事。」
陳豪：欠老婆一世
而陳豪就話：「咁我又冇一個moment，我同Aimee拍劇認識，感情係透過相處同認識慢慢建立，拍拖後我已經feel到呢個會係我太太嚟⋯⋯其實再早啲，未開始拍拖，即係追佢時，我已經好似日劇咁，請佢以結婚為前提同我交往⋯⋯我一直覺得欠咗呢個女人一世，因為喺佢事業最高峰時，將佢喺馬背上掹咗落嚟、同我生咗三個小朋友。我諗好多人唔知，Aimee對演戲好有熱誠，其實佢想攞獎㗎，我亦都相信佢能力，如果做，一定會做到。」
讚發嫂投資有道
森美笑言：「有啲男人對太太好著迷、時時刻刻都覺得太太好好，但我又唔係喎。我係成個大叔咁款，日日見親佢就吟吟沉沉，吟佢呢樣吟佢嗰樣。但出去開工十幾廿個鐘，又會好掛住佢，不過打去就係粗聲粗氣咁問：『做緊咩吖？』見唔到太太時，我成日都有一個畫面，就係一間花店、佢好仙氣咁坐喺度，幫人包吓花、同客人傾吓偈⋯⋯唔知點解係花店，佢都冇話過想開花店。不過我太太都有個好處，就係知慳識儉，從來要求都唔高、平時又會同我坐廉航出去玩吓。我成日話發嫂嗰啲慳家得嚟又投資有道，我老婆呢啲就淨係知慳識儉守住我啲財，比起發嫂，次咗一級。」
陳豪表示：「我屋企都一樣，太太主內，我主外。但係我份人好優柔寡斷， 好多時做決定之前太冇主見，感謝個天畀我遇到呢個女人，我 哋一凹一凸，雖然佢主內，但係凡有大嘅決定，我都會同佢商量、一齊分析，一齊做決定。」
唔敢搞搞震：因為淆底
森美同陳豪都出名專一又專情，森美話過，會搞搞震嘅男人係因為開咗channel接收其他女人信號：「應該咁講，個channel我係打開咗，但係冇發出信號。我見到靚女都會望，唔搞搞震，你哋唔好誤會，唔係因為我專一，係我怕煩啫。啲人做錯事，係因為計錯數，一夜風流得不償失，有理智嘅男人都唔會咁做。老實講，呢個年紀啲男人坐埋一堆，個個話唔敢搞搞震，都係因為兩個字：淆底！」
陳豪笑爆：「哈哈哈⋯⋯我唔係淆底，我係條channel由頭到尾都冇打開過！男女授受不親，我由細到大係接受呢種教育，我哋做男人，係要對身邊女人有個交代。」
愛係本能，感覺嚟到就冇得阻止
問到森美做節目經常聽到好多求愛電話，幾光怪陸離都有，其實都係因為愛，問佢覺得係勇敢定無恥？森美答：「我覺得愛係本能，感覺嚟到就冇得阻止。但係關係係理智嘅，唔可以只講感覺。人哋問我有朝一日會唔會愛第二個，我話我唔排除呢個可能性。但係會唔會追佢、包二奶？咁我又唔會喎，人有理智㗎嘛！啲人做錯事係犯蠢，畀獸性蓋過咗理智！」
千祈唔好原地踏步
講到森美同陳豪以前都肥肥白白過，因為一套《誇世代》keepfit，拍完劇都繼續健身，係唔係因為男人四十，至知道認清自己嘅最佳狀態？森美笑言：「我純粹係為咗工作，監製開拍前話希望我咁做，作為一個專業演員，就應該盡力而為，呢啲係基本嘢。其實我都未盡一百分全力。幾年前一場抑鬱症，你問我學到啲咩，其中一個就係凡事唔係push得自己太盡，要識得享受過程，做到八成已經好好。除此之外，真係老生常談，原來健康唔係必然，唔係個個都會長生不老，人會病、會死，仔女都有朝一日會離開，我哋要成日提醒住自己，要珍惜眼前。」
陳豪就話：「我年紀唔細，喺幕前拍電視都好長一段日子，我好驚自己『滑咗牙』，一個人冇咗戰鬥心，觀眾都感受得到。我係透過健身挑戰自己，亦都帶畀觀眾新鮮感，仲有呢，都係一份責任感，作為一個父親，我需要有更強健體魄同事業去支撐呢個家庭。」
森美：做人，最快樂就係呢一刻
最後講到到咗呢個年紀、各自有家庭負擔，又已經喺行業內有今時今日地位，係唔係打安全牌最穩陣？森美表示：「對於呢樣嘢我其實好掙扎，一個人如果喺comfort zone原地踏步，就只會退步。做人唔應該係咁，但係有新嘗試，就少不免要犧牲家庭，所以我相信個天安排，我從來未試過帶團出trip，又可以帶埋老婆喺身邊。幫卡通片配音，又可以帶埋仔女一齊去睇戲喎，我諗我做人，最快樂就係呢一刻。」陳豪就直言：「我唔係嗰啲打安全牌嘅人，做人千祈唔好怕嘗試新嘢，我有一樣嘢好，從來都唔怕輸、唔怕從頭嚟過。呢個都係一種身教，教仔女都係咁話，應該要努力嘗試，失敗唔叫失敗，而係話畀你呢種方法嘅後果未必係最好啫！」
