楊洛婷 X Dear Jane 主音Tim 合組雞仔家庭

同樣雞年5月出世的Tim與Rabee’a，好希望製造到今年5月出世的「雞仔」，可惜肚皮無聲氣，放下心情隨遇而安，幾個月後「雞仔」終於敲門，二人趕得及今年誕下雞BB，建立「雞仔之家」，開心到不得了！Tim笑老婆懷孕後比以前開心、放鬆，完全沒有情緒問題，「老婆開心咗，我都開心！」Tim更揚言已ready 陪BB 去玩，被老婆質問：「你ready做爸爸喇咩？又話作首歌送BB。」Tim 話最緊要照顧好小朋友先，慢慢再作首歌，更期待將來與BB玩音樂，幫助BB 腦部發展之餘，有多一個渠道表達自己。

●撰文：Ling

●攝影：Issac Poon（部分相片由受訪者提供）
●場地：Blackroom By DM（tel: 9179 0667）

港姐媽媽 齊心勸少甜

距離預產期尚餘三個月，Tim和Rabee’a的心情愈見興奮緊張，因為未準備好BB物品，二人已立定決心今個月要執好屋迎接BB出世。Rabee’a自懷孕後，忙於完成手頭上的工作，又忙於向朋友取經，同屆港姐冠軍曹敏莉更做速遞上門，送上大批孕婦衫，Rabee’a說：「佢一知道我有咗就拎大袋孕婦衫畀我，好開心呀，因為當時我身形喺肥同大肚之間，好尷尬冇衫啱着，佢仲畀咗好多貼士我，之後張嘉兒都話要搵我食tea分享。」Rabee’a亦好感激兩子之母周家蔚，密密短訊她派貼士，「我哋喺WhatsApp講足幾個鐘，佢不斷教我好多嘢，身邊真係有好多朋友錫我，個個都話有問題隨時WhatsApp嚟，幫到一定幫。」多位港姐朋友的貼士最齊心是叫Rabee’a「唔好食咁多」，多吃蔬果少食甜，否則想順產的話，BB太大隻會好難生，媽媽之後又好難減，患上妊娠糖尿嘅機會又高些。

家族信奉回教

不過，一向不好甜食的Rabee’a懷孕後轉口味，竟然跟足老公愛上牛油果及甜品，兩口子的口味突然變得好夾，她說：「佢係餐餐都要加甜品、加雪糕，我就唔會嘅，但依家嘅我都係每餐之後要食甜品，其實唔係一件好事嚟㗎！」Rabee’a緊記好友的提醒，盡量控制食量，亦乖乖戒掉海鮮、生冷食物和凍飲，只間中淺嘗幾口雪糕。

Rabee’a今胎陀得幾舒服，頭三個月無嘔過，只偶爾未食早餐前會有作嘔感覺，所以她床邊放有餅乾，一起床就吃少許頂肚。這段時間她更愛上陳皮，食足一個月，Tim笑說：「未試過屋企長期起碼有五包陳皮stand by，架車又有。」

家族信奉回教的Rabee’a自小不吃豬肉，但沒有特別的懷孕禁忌，「我嫲嫲有時會提點我，有咩要小心啲，有咩應該做，但懷孕後佢都冇特別嘢同我講。」Rabee’a生於香港，祖先來自北京，一代一代漸漸來到香港，家族族譜非常厚，所以她跟從家族信奉回教，但她不會強迫孩子跟從，讓孩子自由選擇。

想 Facebook 直播BB 出世

自離開TVB後，Rabee’a主力接洽活動司儀工作，受BB帶旺之下，她亦頻頻出席活動賺奶粉錢，要完成手頭上的工作才能乖乖養胎。「我係一個工作狂，好鍾意做嘢，反而你叫我淨係坐喺屋企安胎仲唔自在，依家就算無工作嘅日子，我都會plan啲嘢畀自己做，例如出去學瑜伽、叫老公陪我游水，每晚又同我隻狗仔出去散步。」Tim的妹妹恰巧是一名瑜伽導師，現經常教阿嫂做孕婦瑜伽，有助順產。

Rabee’a未生第一胎，已期望生第二胎，希望盡快三年抱兩，所以她希望今次能順產，身體能快一點復元，對BB亦有更大益處。Tim透露好想當日拍facebook live直播BB出世，「但主要係拍我自己個樣，哈哈！」生產過程不會公開直播，但一定會陪產及拍片記錄，為「雞仔之家」留個美好回憶。

懷孕先Cupsss 老公最開心

究竟BB是雞仔或雞女？二人大賣關子，留待暑假舉行的babyshower揭開神秘面紗，Rabee’a計劃以切蛋糕形式公布，「粉紅色蛋糕係女，粉藍色就係仔。」在《Sunday Kiss》facebook直播訪問當日， 有見Rabee’a的肚子圓潤，size適中， 仔女都有人估，Rabee’a指有親友認為她似陀仔，因為她懷孕後變得活躍，而且容貌有變……「我奶奶個姐姐覺得我似生仔，因為我冇以前咁靚……其實可能嗰日我冇化妝啫，以後我見到佢都要畫番條眉，搽番唇膏，會唔會咁樣似番生女？哈哈！」

眼見Rabee’a都沒有走樣，外表容光煥發，身形適中，有甚麼保養心得？「我好勤力，每星期都去做針灸，主要針塊面同對腳，幫助血液循環，長胎唔長肉，我都唔想肥呀，所以會繼續做針灸。」Rabee’a懷孕未夠七個月重了十幾磅，她覺得多了一點，但這些重量或多或少來自上圍升Cup，老公最開心：「係升Cupsss，係豐滿咗嘅，有少少唔同嘅感覺啦，原來佢可以咁勁，老婆開心咗，我都開心。」Rabee’a稱要換過所有胸圍和內衣，她即場叫老公科水入貨，Tim笑她不要花費太多，生完就打回原形。

老公爭用孕婦枕

愛妻粗身大細，Tim當然服侍周到，將於月中與Dear Jane在澳門開演唱會的他，仍每日為老婆按摩，不過睡覺就有點自私了！Tim原本體貼地為老婆購入一個C字形的孕婦枕，最後竟因攬枕太舒服自己佔用，Rabee’a笑說：「個枕可以包住條腰，打側瞓又可以攬住，等孕婦可以瞓得舒服啲，點知我瞓咗兩日就唔見咗！原來係老公用咗！」Tim笑指該攬枕太舒服，已連續攬着睡了數晚，「我好羨慕所有用緊呢隻攬枕嘅孕婦，真係好舒服，老婆頭兩日係有用，但到夜晚三四點個枕已經跌咗落床，證明佢唔係好需要啦，咁我用得唔好嘥。」

可能想繼續用孕婦枕，Tim對老婆不斷賣口乖，又大讚老婆懷孕後皮膚更白滑。「好咗好多，之前都好，依家直情冇乜面油、冇瘡，摸佢塊面係滑過檸檬！」怎樣滑過檸檬？似檸檬皮不是好事喎！「搽咗檸檬汁嘅地方會滑啲㗎嘛……」勉強講得過去啦！

從未試過咁開心

婚後二人一直糖黐豆，拍攝當日亦不時深情對望，笑容甜到漏，Tim話老婆懷孕後笑得更多，比其他懷首胎的孕婦放鬆。「我從來未見過佢笑咁多，日日都咁開心，個人冇咁緊張，以前喺工作同處理其他事情上，佢會好細心去確保唔會出錯，有咗之後反而放鬆咗好多。」Rabee’a笑稱可能有Tim的基因在肚內，令她性格改變了，「我期待做媽媽好耐，終於得咗好開心，成日提醒自己要放鬆啲，自己心情好啲，BB都會開心啲。」Rabee’a亦沒有受荷爾蒙影響變得易喊、情緒波動等問題，「淨係見到靚嘅孕婦衫讚『靚到喊』，難得着靚衫影相唔使縮肚！」

遺傳爸爸愛音樂

腹中BB的確受Tim的基因影響，對音樂特別敏感，只要一有音樂走近肚皮，BB就會不停踢肚，Rabee’a指即使她上網睇化妝片，BB對背景音樂都大有反應！「佢聽任何音樂都喺度郁，聽到爸爸唱歌佢又踢。」

凡事都有例外，個個孕媽媽都推崇的莫扎特classic音樂，BB卻一點反應也沒有，證明BB應該跟爸爸做Rock友！Tim揚言一定會教孩子學音樂，因為音樂有助小朋友思考及腦部發展，「可以有多一個方法表達自己，仲會識聽同感受周遭環境。」

除了音樂之外，Tim更寄望孩子「跌倒唔好喊」，點解呢？「呢句有好多意思，講出嚟勁啲！」Rabee’a也認同孩子要堅強一點，不怕失敗，最重要孩子健康快樂成長，在少壓力的環境下自由發展。