洪天明 周家蔚 阿爺催再追女

10月31日就是「哈佬喂」萬聖節，父母都喜歡為仔女扮成小嘩鬼應節，三年抱兩的洪天明和周家蔚（Janet）都不例外，去年將大仔洪大仁（TJ）扮成女仔參加派對，今年TJ懂性了，知自己是男子漢，拒絕再扮女孩！天明在離港北上拍戲前，一家三口決定去主題公園提早慶祝，感受嘩鬼節日氣氛，不過六個月大的細仔洪竟琋（JT）無得玩，驚嚇親呀！
天明和家蔚三年抱兩，最開心是爺爺洪金寶，日夜都掛住兩個孫仔，爺爺和家蔚都想追多個女，但天明對此審慎，「我覺得生兩個仔都好夠，唔係有冇金錢能力去養，而係有冇時間陪佢哋，我唔想小朋友好似我細個咁，我想盡量參與囝囝嘅活動，俾多啲親子時間佢哋。」

洪金寶日日拍片搵孫

TJ和JT一出世，個樣似足爺爺洪金寶，難怪爺爺錫孫錫到燶，經常致電天明和新抱問候孫仔，天明笑說：「有時我做完嘢返香港，我同老竇講啱啱做完嘢返嚟喇，跟着佢問近排點呀？我話我OK吖，佢話我唔係問你呀，我問個孫呀！」洪金寶日日夜夜都掛住個孫，每次從外國返港，都會第一時間搵孫，天明說：「佢依家咩都唔玩㗎喇，淨係玩個孫，日日都拍片send來話：『洪大仁，爺爺好掛住你，做緊咩呀？』見到老竇真係好開心！」天明坦言，家中多了兩個小朋友，拉近了三代人的距離，「呢兩三年多咗去family trip，以前好少㗎，我記得我6歲、10歲先有family trip去，近廿幾三十年都冇，但TJ一出世就多咗好多。」天明覺得因為兩個仔，令一家人更親密，彌補了以前空白的家庭樂。

童年片場搵老竇

「我哋幾兄弟姊妹細個好少見老竇，我日頭起身，佢一係瞓緊覺，一係喺片場，我放學返嚟佢已經唔喺屋企，逢星期六日先可以去片場見佢，其實係我哋去片場俾機會佢見我哋。」天明是長子，有兩弟一妹，他覺得兄弟姊妹多，亦分薄了父母的關心，所以天明不希望生太多，令仔女缺乏關心。
自誕下兩子後，家蔚淡出幕前專心照顧兒子，天明堅負養家重任，經常中港拍劇兩邊飛，當日訪問一完成後，他亦立即趕飛機上內地拍劇，一走三個月。「其實今年多咗時間喺香港，開咗兩套TVB劇集，嚟緊會走得多啲，會盡量抽時間返香港陪佢哋，湊吓返學放學，我已經好少做自己嘢，打機都戒咗好耐，一有時間都係陪家人。」天明坦言，現在做演員的趨勢都要返內地發展，收入和市場都大得多，「壓力一定有，但同時係一個推動力去做好自己。」

體罰囝囝打人

爺爺爸爸皆拍武打戲出身，耳濡目染下，TJ年紀少少已經郁手郁腳，嚇得天明和家蔚嚴禁粗魯，「老婆好討厭佢打交，但有時佢睇其他嘢都會學到，小朋友學嘢太快，我哋覺得玩係可以，但唔可以郁手郁腳打人，我哋都擔心佢以為打交係玩，呢啲我哋會好小心去教。」TJ在家試過出手打人，天明立即罰打手板，要他知痛知錯，不能再犯，「佢試過掉嘢落地同用手打人，一見到我哋即刻話佢，掉嘢落地會爛，打人會打到人哋痛，罰佢打手板係俾佢知道痛嘅感覺係點。」
天明覺得適當體罰是有需要，打手板、打patpat可以，但滕條炆豬肉就過火了，「當你打過一次佢知痛，下次再見到佢掉嘢落地或者打人，就叫佢攞隻手出嚟，佢已經喊晒㗎喇，再唔聽話就罰企，希望佢印象深刻啲。其實亂打仔冇意思，小朋友有嘢唔明，淨係體罰係冇用，只係強迫性要佢屈服，應該要用道理去令佢明白。體罰唔可以完全冇，父母要衡量個程度，兜巴打面、一腳伸埋去梗係唔得啦。」

爺爺馬鞭打仔

天明回憶小時候，打手板好小事，爸爸體罰會命令他們踎馬桶，再出動馬鞭、粗皮帶打仔，「以前係阿媽惡啲，老竇成日都唔喺度，如果老竇一出手就好嚴重，直到十幾歲就冇打喇，要我坐低同佢講道理，令我覺得好知錯，咁先會去改，呢個方式我都會用喺兩個仔身上。」
洪氏教仔法以講道理為主，上一代重視規矩、禮貌、道德，洪金寶經常向天明強調，「你想人哋對你好，就要先學識對人好，要有禮貌，好多基本嘢一定要學識。」

N班開學不合群

好多小朋友尤其男仔，都會出現「打人當玩」的情況，TJ可能未適應群體生活，令他開學時情緒有點失控，甚至想出手推人。負責囝囝學業的家蔚指，他剛剛返St. Catherine’s國際英文幼稚園PN班時，出現了很多尷尬情況。「第一個星期家長會帶小朋友返學，我幾擔心呀，佢直情不受控制唔聽人講嘢，叫佢做呢樣，佢就做嗰樣，又唔合群啦，仲推開其他小朋友，去廚房搶晒人哋手上嘅嘢，仲想推跌人！我見到有媽咪望住我，幾尷尬呀！」
其實TJ自13個月大時，已開始返playgroup，但家蔚適逢懷了第二胎，臨盆前幾個月行動不便，難以湊TJ返學放學，停學了數月，影響了其群體生活，令她有點自責。幸好返St. Catherine’s第二個星期，TJ開始適應群體生活，有明顯進步，「暫時老師都冇打俾我投訴佢任何嘢，係有次打嚟問佢做乜唔返學，我話佢病咗，即刻問番老師佢有冇曳呀？有冇做惡霸呀？好彩老師話佢好乖，我好驚佢蝦人，我同佢睇多啦A夢會叫佢唔好學胖虎蝦人呀，呢個係bad guy嚟㗎。」

兩兄弟每朝錫錫

最令天明和家蔚安慰的是兩兄弟健康快樂、和睦相處，早在細仔JT出世前，他們為免TJ呷醋，時常借細佬之名去送禮給他，天明笑說：「買玩具俾佢就話細佬買俾你㗎，杯雪糕都係細佬買俾你，所有嘢都係細佬嘅，喺佢心目中原來細佬對佢好好，所以細佬一出世佢去到醫院，即刻衝埋去睇吓細佬個樣係點，好緊張咁摸佢。」
代細佬送禮這招非常奏效，兩兄弟現在相親相愛，每朝都要錫錫才安樂，「每朝都話要同細佬講good morning先！今日佢見到細佬有啲唔開心，又去抱吓細佬，見到佢哋真係好安慰。」

玩轉哈佬喂
萬聖節就快到，天明趁北上拍劇前帶妻兒去海洋公園哈佬喂應節，見到一班多啦A夢角色，都特別提點他不要學胖虎蝦蝦霸霸，要學多啦A夢熱心助人！TJ身為小小男子漢，見到嘩鬼竟然縮沙，天明笑他好鬼渣！即刻去片睇睇TJ的見鬼搞笑樣！

●撰文：Ling
●攝影：Sing Ho（部分相片由受訪者提供）