海之子一家：唔怕畀仔女輸
撰文︰朱小博
攝影︰Day Chan（部分相片由受訪者提供）
場地提供：高興 （tel：26500028）
做醫生見證人生無常
其實風趣幽默的背後，Alex是心臟科醫生，從赤柱海旁鐵皮屋出世、到港大醫學院畢業，捱過苦又見盡人生無常，最明白「贏在起跑線」那一套根本行不通：「我喺醫院見過有年輕醫生一路喊，一路打電話叫媽咪快啲嚟，呢啲贏在起跑線但係輸唔起嘅人，根本唔配做醫生！所以我唔怕畀仔女輸，重點係教佢哋下次點贏番，做人應該要贏得精彩輸得起！」
外貌，我畀自己100分
是醫生、是爸爸、是丈夫，也是電視台新興笑彈。Alex說自己的特長始終是做手術，從小到現在的目標依然是救死扶傷，從手術枱轉到幕前發展還是免了，不如用風趣幽默那一套繼續和病人溝通、紓緩家屬情緒更物盡其用。Alex搞gag係好笑嘅，不過副尊容又實在低於水平線，我問Alex給自己外貌多少分，他竟然二話不說：「肯定係100分！」
「呢個世界如果連我都唔覺得自己靚仔，就冇人話我靚仔囉！好多人問我哪裡來的自信追到咁靚嘅老婆……我想話人一世物一世，點都要向難度挑戰一次嘅。追女仔最緊要溫柔，又要畀佢見到自己認真一面，覺得放心，七分放就三分收……其實講到外貌，我都吃過唔少苦頭。」女仔對男仔的第一印象，大多是外貌行先，Alex這類外形一定好蝕底，他藉機會過兩招給同路人。「當你外形低於Average，一定要玩吓球類活動彌補自己外形不足。要玩一定係足球同籃球，唔好似我一樣打羽毛球，打到入港隊都冇女仔吼；仲有睇吓瓊瑤小說啦！學吓生活浪漫化，最細眉細眼嘅嘢最容易令女仔刮目相看。」
全職媽媽與醫生一樣辛苦
除了外貌給自己一百分，Alex說做醫生自己盡心盡力又看重和病人及病人家屬溝通，亦都屬於高分。不過說到做爸爸和丈夫，就真的力有不繼甚是慚愧：「人哋成日同Rainbow講：『你就好啦做醫生太太！』實情做醫生太太唔容易，需要心胸廣闊。我好少返屋企食飯，有時就算收咗工，物理上個人喺度，但思想根本唔喺度……再加上我又風趣幽默呢，返到醫院成日畀女仔圍住……哈哈，講笑啫，圍我嗰啲多數係阿嬸嚟！」
身為全職媽媽的Rainbow也說，家庭日常老公總是缺席，自己也身心俱疲：「一個星期起碼有三晚唔見人，有時返咗屋企又畀醫院急call返去。我都覺得攰，由朝到晚湊住細路，幾時輪到我抖一抖？幾時可以畀我沖番個涼？不過明白嘅，佢自細睇《妙手仁心》立志做醫生，收到病人家屬一抽提子、一張感謝卡，或者簡單一句多謝都好有成功感。佢嘅志願係幫人，當小朋友投訴『點解爸爸又唔喺度？』時，我會同佢哋講，因為病人需要爸爸，爸爸去咗幫人囉！」
要贏得精彩輸得起
潮流興養育下一代要「贏在起跑線」，更有甚者話要「贏在射精前」，Alex和Rainbow都說對這一套完全不買帳，因為自己的成功就是最好的例證：「我叫自己海之子，係因為我喺赤柱海邊嘅鐵皮屋長大，生活咗幾年至上樓搬去大圍公屋，然後居屋、然後自己買樓。我爸爸係公務員、媽媽就揸過小巴做過衫，因為教育水平唔高，能屈能伸樣樣肯做。作為父母，我哋唔應該為佢打造最好環境，佢哋要乜都提供好晒。」
Alex和Rainbow告訴孩子，所有東西得來不易，要靠自己一步一步爭取。「贏在起跑線又如何？做到醫生又如何？我試過喺醫院見到有個年輕醫生喺度喊，一路喊一路打畀媽咪：『媽咪你快啲嚟啦！我畀人鬧吖！』新一代醫生好多都係畀屋企重點培育出嚟，一世贏慣一世畀人照顧慣，所以去到醫院經歷唔起失敗，出事就只會推卸責任或者怕孭鑊，就少做少錯唔敢做決定去救人，根本就唔配做醫生！所以我同小朋友玩遊戲，從來唔會畀佢哋贏晒，有時仲要佢哋試吓輸到貼地。重點係輸得嚟唔好打擊自信心，要教佢哋下次點樣贏得番，靠自己贏番嘅感覺仲有滿足感，學到更多嘢！」
學習要有興趣才有動力
睿睿四歲、千千三歲，兩兄妹除了上學，平時都有課外活動。哥哥學拉丁舞和溜冰、妹妹學芭蕾舞，每個星期三又有老師上門教普通話。Rainbow說，堅持星期六日不學習只玩樂，還有學甚麼都好，前提都要兒女自己樂在其中：「好似爸爸做醫生一樣，係因為自己有理想有目標，所以佢有韌力寒窗苦讀。作為父母，唔係逼佢哋去學，而係要佢哋學得開心，從中搵到樂趣，最重要係要幫佢哋搵到自己鍾意嘅嘢，為目標去努力。」
Alex和太太想法也一樣：「佢哋學咩都好，我成日keep住問鍾唔鍾意？每日放學上完堂，我哋唔係問佢哋學咗啲乜，而係問佢哋今日有咩最開心。持之以恒，見到佢哋真係識得尋找快樂同享受學習。鍾意學習同有目標真係好緊要，我冇讀過Bio入醫學院，讀起上嚟真係吃力過人；屋企唔係好有錢，爸爸媽媽幫補咗學費，雜項生活費都係我一路讀書一路搵番嚟。地盤啦、茄喱啡啦、補習啦，一日做幾份工夜晚再溫書，但我唔覺得辛苦喎，因為我想讀醫，做醫生就係我嘅原動力！」
海之子：初為父母迷失過
自己成功走到醫生這一步，Alex也承認，潛意識裡當然希望兒女能繼承衣鉢做醫生。不過更清楚的是，兒女是獨立個體，把自己的願望強加兒女身上既成了珈鎖，也令小孩子心智長期處於繃緊狀態。「啱啱開始為人父母，我同Rainbow都迷失過。見人哋報名校，我哋又喺九龍城買樓，又試過凌晨走去名牌幼稚園攞報名表，以為入到名校一定好。不過面試時見到校園氣氛好緊張，個個家長帶住仔女都好似『不知鹿死誰手』咁樣，我至開始明白，就算入到名校，仔女都要獨自面對呢種競爭壓力，真係開心咩？做人又好、學習又好，冇嘢重要得過樂在其中。最後，我哋咪揀咗區內街坊幼稚園囉。」
要小朋友享受學習，培養良好學習態度，最重要還是身教。「可以做到自己想做嘅職業，堅持同有目標至會進步。我叫佢哋堅持，淨係靠把口冇用，我會陪佢哋一齊玩親子馬拉松，一齊玩去話畀佢哋知咩叫堅持，希望佢哋勇於承擔，唔怕面懵，仲會喺佢哋面前承認錯誤，話畀佢哋聽就算大人都會犯錯。」
做新騷繼續快樂致勝
繼《全職媽媽放大假》後，最近Alex和Rainbow又被ViuTV邀請在全新節目《Baby Rider》中擔任名人經理人，和連詩雅、鄺俊宇同鄭麗莎齊齊訓練自家隊員進行平衡車比賽。節目於12月4日剛剛播出，賽果未劇透得住，不過Alex兩公婆細細聲話我聽，原來自己嗰套玩樂中學習與進步的方法，用於比賽中一樣奏效：「成件事就好似《中國好聲音》一樣，分別係我哋物色小朋友去受訓參加平衡車比賽。人哋嗰套係training再training，一有得試賽道就落晒場熱身，然後有一兩個小朋友突出，就場場派佢哋出賽爭勝。我哋兩個唔係，盡量令每個小朋友都有上場機會，人哋去訓練，我哋就組織小朋友同爸爸媽媽野餐、整曲奇；人哋試緊賽道，我哋就喺側邊玩得好開心……唔係我哋唔想贏，而係我哋希望每個人都可以開心參與同快樂地贏。」
不過Alex對賽果也劇透了一點點，「賽果其實反映到教育制度不足，成日操班小朋友，原來持久唔到幾耐，keep住大家心情好，落到場原來個個都好平均，反而發揮到水準！」
