熊黛林陀五個月慈姑椗 老公叩頭還神
廣告
熊黛林15年嫁家族擁百億身家的郭可頌，肩負幫郭家開枝散葉重任，兩公婆努力一年，上年11月終於宣佈有喜！由於37歲高齡陀B，奶奶更緊張到日日煲湯去兒子屋企睇實新抱。不過熊黛林不時都搵老公陪伴外出鬆一鬆，早前就加埋腹中B仔享受三人世界迎新年！據知去年中，熊黛林同老公曾到荃灣龍母廟跪叩求子，現成功陀住五個月慈姑椗，故日前郭可頌聯同親友帶埋燒肉果籃等祭品，到龍母廟叩頭還神，為未出世的兒子祈福。
原文：東方新地
相片：新傳媒資料室
熊黛林 獲奶奶錫到燶
近年已接手打理屋企家族生意的郭可頌，上有兩個胞姊，及一個妹妹，當中家姐郭可盈早已出晒名，由於係家中唯一男丁，熊黛林成功陀住金叵羅，幫郭家開枝散葉，奶奶幾乎每天都煲湯水照顧新抱！據知熊黛林未嫁時已經融入郭家，成日出席男友家庭聚會，同未來奶奶姑奶關係好好。結婚之後奶奶更加錫佢，知道新抱有咗，就幾乎日日煲湯水過去阿仔屋企，又吩咐工人要煮啲清淡菜式畀新抱食！
熊黛林郭可頌撐枱腳
12月30日傍晚，閉關安胎多時的熊黛林，先陪老公返柴灣公司，逗留約20分鐘，之後二人再坐車去香港遊艇會，原來當晚郭可頌已經book定枱，同老婆撐枱腳迎接新年，與腹中BB過三人世界！
熊黛林 摸龍床寫願望
熊黛林同老公婚後都心急生B，據知去年中兩人專誠到荃灣龍母廟求子，在廟裏跪地又叩頭，之後亦跟足規矩去摸龍床寫願望。點知真係唔夠一個月，熊黛林就成功陀仔，所以好緊張計劃返廟還神！不過，為免老婆挺住五個月肚操勞，日前郭可頌就聯同親友帶齊燒肉及果籃，到龍母廟誠心叩頭還神，答謝龍母娘娘賜福！
求子必拜
位於荃灣上角山的龍母廟建寺60年，雖然位處偏僻，不過長年香火鼎盛，好多明星名人如張智霖、楊怡、黎諾懿都是信眾。人們多拜龍母娘娘求子，更必定摸龍床求好運求生子，而龍母亦對小孩特別眷顧，所以亦有不少家長帶埋子女上山拜龍母，求子女健康成長。
