熊黛林影孕照留念 讚老公貼心 Lynn：我無嫁錯人！
原文：東方新地
圖片來源：相關機構提供
熊黛林讚郭可頌貼心 Lynn：我無嫁錯人！
去年年尾宣佈懷孕的熊黛林（Lynn），預產期愈來愈近，日前Lynn就同老公郭可頌拍了一輯靚相留念，相中見Lynn笑得開心燦爛，雖然腹大便便但四肢仍然纖瘦，絕對是準靚媽咪，而穿起吊帶裙的Lynn，上圍都升級了不少。至於爸爸郭可頌亦愈來愈fit，手臂肌肉盡現，看來做型爸單手抱B都無問題。Lynn話：「一直老公都好照顧我，有了BB後老公更事事以我為先，我覺得好開心，睇得出自己真是無嫁錯人。」
作為準媽咪，Lynn現在未覺緊張，反而非常期待BB到來，但同時又有點捨不得與BB身心相連的親密關係，「每次BB在我肚入面郁我都好興奮。」問到Lynn有否特意看書學習湊B及教小朋友技巧，Lynn表示自己只看了小量關於育兒書籍，平日反而多向有經驗的朋友請教，「我們都想順其自然，第時再一步步學習，我不想給太大壓力家人及BB。」果然是貼心溫柔的媽媽及老婆。
熊黛林 幸福準媽媽
準媽媽熊黛林(Lynn)陀B七個月時，同經理人Kim合照，晒出籮咁大嘅巨肚，Kim仲摸住熊黛林個巨肚留言：「漂亮準媽媽」對比之前大肚近五個月時嘅瑜伽照，Lynn個肚脹真係大咗唔少，上圍亦極速升cup！但Lynn手腳依然纖幼，面容亦未有特別發福，真係肥肚不肥身，令不少孕媽羨慕！相信係因為Lynn好勤力，大住肚都keep住做瑜伽！
龍母廟叩頭還神
由於Lynn 37歲高齡陀B，奶奶更緊張到日日煲湯去兒子屋企睇實新抱。不過熊黛林不時都搵老公陪伴外出鬆一鬆，早前就加埋腹中B仔享受三人世界！據知去年中，熊黛林同老公曾到荃灣龍母廟跪叩求子，據知現成功B，故上個月郭可頌聯同親友帶埋燒肉果籃等祭品，到龍母廟叩頭還神，為未出世的小朋友祈福，咁大陣仗，唔通係陀仔？
熊黛林 獲奶奶錫到燶
近年已接手打理屋企家族生意的郭可頌，上有兩個胞姊，及一個妹妹，當中家姐郭可盈早已出晒名，由於係家中唯一男丁，如果熊黛林成功陀住金叵羅，幫郭家開枝散葉，奶奶一定錫到燶啦！據知熊黛林未嫁時已經融入郭家，成日出席男友家庭聚會，同未來奶奶姑奶關係好好。結婚之後奶奶更加錫佢，知道新抱有咗，就幾乎日日煲湯水過去阿仔屋企，又吩咐工人要煮啲清淡菜式畀新抱食！
