SEN仔讀書無心機 擔心爸媽離婚 母隱瞞實情 2招學放低 親子坦誠相對

煩惱 兒子擔心爸媽離婚

遇到父母的擔憂或訴求，我通常會避免立刻質問學生，因為我想先不帶假設，從他們的角度了解同一件事。在尊重和保護他們的情緒的同時，這樣做往往給我更真實和完整的理解。

Carl看上去有點頹喪。我如常了解他的近況：「你哩兩星期點啊？」
他帶倦意地說：「麻麻地。」
我問為什麼，他解釋：「我呢排專心唔到讀書，但係我又唔係好知點解……」
原來Carl也關注自己注意力下降的問題，我便引導他思考原因：「近排有冇乜嘢發生，或者有冇啲咩煩惱呀？」
他想了想，欲言又止，最終低著頭吐出心聲：「我覺得阿爸阿媽已經分開咗，我想知佢哋究竟係咪離咗婚……」

由於Carl和媽媽從未提及家庭關係的問題，他的煩惱是我意想不到的（所以開放式/不作假設的提問真的重要）。
我問Carl為什麼有這個想法。他說他留意到父母對他很溫柔，總是充滿笑臉，但面對彼此則非常嚴肅，甚至表現冷漠。他知道父母這幾年的關係並不好，但起碼表面看上去還是一家人。

直到最近，爸爸甚少回家，Carl亦常常看到媽媽與爸爸電聯後，一臉傷心和氣憤的表情，讓他擔心父母關係進一步惡化。

騙不過孩子

Carl喃喃自語：「可能阿爸阿媽覺得我年紀細，唔想同我講咁多，或者覺得我唔會明，但係我梗係睇得出啦！我想阿媽坦白同我講佢哋嘅關係，不過我又有啲驚聽到佢哋真係要離婚。因為佢哋兩個都好錫我，各有優點同缺點，我唔知應該跟邊個住……」

Carl說他苦思這個問題許久了，卻想不到答案。他不知應否主動問媽媽，還是等她找他聊。無論是上學、做功課、溫習的時候，擔心父母和自己未來的想法總會不受控地出現，阻礙他的學業。

聽著Carl的剖白，我深深感受到他內心的矛盾，便提出：「你想唔想我同媽咪了解吓佢同爸爸嘅關係？或者我可以話俾佢聽，你想同佢傾吓？」

Carl猶豫了半晌，緩緩地點頭。

爸媽離婚 媽媽坦言接受不了

我決定稍微提早完成Carl今天面見的部分，預留更多時間與他媽媽傾談。我坦白向媽媽分享Carl的苦思及其影響。媽媽沈默了一會。

她望向地面，深深吸了一口氣，嘆了一口氣後說：「其實我同Carl爸爸已經離咗婚一段時間…… 但係我到而家都仲未接受到呢件事。我覺得自己好失敗，好無面，所以無同人講過……」
說罷，媽媽的眼淚瞬間掉下。看得出她仍未走出傷悲，壓抑了不少情緒。

我沒有說話，讓Carl媽媽抒發感受，之後輕拍她的上臂，才安慰了她幾句。
由於她非常在乎Carl，我便鼓勵她：「父母嘅情緒，同埋夫婦之間嘅關係，都會直接影響小朋友嘅感受，儲埋太多負面情緒就會降低佢哋學習嘅狀態。仔女係唔清楚情況，估估吓嘅時候，會諗同擔心得更多。媽媽你可以考慮用唔同方法，先處理同消化自己嘅情緒。係你準備好之後，嘗試同Carl分享。咁樣做可以消除Carl嘅疑慮，降低佢嘅壓力，專心啲學習。另外，我見佢都好錫你，又開始大個仔，其實你哋可能試吓互相支持，甚至解決問題。」

媽媽含淚點了點頭，好像想通了一點。她說她會慢慢嘗試和Carl坦白。臨別前，我給了她一些為家長而設的情緒支援資源（如「Shall we talk陪我講」平台、「在家·好精神」短片、「SOW壤逸誌」app等）。但願她盡快找到她需要的支持，讓她和兒子都能身心健康。

註：為保障學生的身份，文中的個人資料及內容經過改動。